Lozyez Yen Dungzloz Cin Giujli Siujyoz youq ranghdieg baihbaek yienhsingz, liz yienhsingz 3 goeng- leix, dwg aen hagdangz cunh gaep ndaw dieg Bouxcuengh comzyouq. Aen hagdangz neix laeb youq 1956 nienz, dieg gvangq 2524 bingz- fanghmij, seizneix miz song doengh laeuzsonhag、funghranz sizdangz ndeu、funghranz den’gyausiz ndeu. Seizneix hagdangz miz 7 aen ban, 127 boux hagseng, ndawde 117 boux dwg Bouxcuengh, hagseng Boux- cuengh ciemq cungjsoq 92%. Gungh miz 23 boux lauxsae, ndawde 16 boux dwg lauxsae Bouxcuengh, 6 boux dwg lauxsae Bouxgun, boux ndeu dwg lauxsae Yauzcuz. Lauxsae Boux- cuengh ciemq 70%. Ndawde 16 boux miz daconh yozliz, 6 boux miz bwnjgoh yozliz, lauxsae hab iugouz caez. Lai bi daeuj, aen hagdangz neix ciuq dieg guhhong, sonhag Cuengh Gun song saw vah, cingzcik haemq ndei, couhdwg ciuq dieg“dajndaem”ndaej mak lai.

Daj 1984 nienz sonhag Cuengh Gun song saw vah daeuj, aen hagdangz neix ciuq fuengcim hengz, couhdwg“aeu Cuengh guhcawj, Cuengh Gun doxgap, baengh Cuengh daiq Gun, Cuengh Gun caez rox”, laebdaeb guh Cuengh Gun song saw vah gyauyuz, ndaej baenz haujlai daegsaek.

2012 nienz, aen hagdangz neix dingh le aen banhhag muzbyauh, haemq miz daegsaek, couhdwg haenqrengz banh baenz aen hag- dangz lajmbanj fatyiengz vwnzva Bouxcuengh. Bingzciengz, sonhag Sawgun liuxle lauxsae lij aeu hagseng roxyiuj vwnzva Bouxcuengh, hawj gyoengq hagseng daj iq couh rox giz mboujdoengz gvendaengz vwnzva Bouxcuengh, mizsim swnjcienz nem fatyiengz vwnzva Bouxcuengh.

2013 nienz 9 nyied daengz 2014 nienz 7 nyied, aen hagdangz neix ciuheuh lauxsae nem hagseng, soucomz doenghyiengh dangdieg miz daegsaek Bouxcuengh, baugvat doxgaiq、saw、fwen、gojgaeq daengj, cingjleix ndei liux, baij coq ndaw funghranz yawjsaw. Hagseng ngonzyawj, couh rox vwnzva lizsij Bouxcuengh noengzna, dazyinx gyoengqde gyaezmaij vwnzva Boux- cuengh、gyaezmaij mbanjranz. Linghvaih, aen hagdangz neix lij guh haujlai hozdung, fatyiengz vwnzva Bouxcuengh, lumjnaeuz eu fwen、dwk lwggyangq、gangj gojgaeq daengj. Hawj hagseng camgya vunzlai hozdung liuxle lai rox vwnzva Bouxcuengh, doengzseiz hawj hag- seng lai mizsim swnjcienz nem fatyiengz vwnzva Bouxcuengh. 2014 nienz 9 nyied dauqlaeng, ndaw hagdangz neix vwnzva Bouxcuengh gig noengzna.

Lai bi daeuj, aen hagdangz neix laebdaeb caezcienz gak hangh hongsaeh son’gyauq nem yenzgiu. Hagdangz anbaiz seizgan hwnjdangz bauj gaeuq, lauxsae son’gyauq Cuengh Gun song saw vah, ciuq gveihliz sonhag saw vah, sawj Cuengh Gun doxhoiz doxbienq ndaej cinjdeng. Laebdaeb gaemdawz aen yenzcwz“Cuengh gonq Gun laeng”. Fatok Sawcuengh youhsi, ciuq“cibroek cih”fuengcim bae sonhag, anbaiz ndei hongsaeh gonqlaeng, haeujsim yenzgiu fuengfap sonhag, gemjnoix hong hagseng, haenqrengz hawj Cuengh Gun song saw vah sonhag lai miz cingzcik. Doenggvaq yenzgiu baenzlawz guh ndei sonhag, gujli lauxsae guh godiz yenzgiu gvendaengz Cuengh Gun song saw vah sonhag. Mboujduenh cungjgez gingniemh, mboujduenh cauh fuengfap sonhag moq、guhfap moq, haenqrengz hawj hagdangz mbanj Bouxcuengh ndaej daezsang sonhag cizlieng.

Aen hagdangz neix gyauyenzcuj gaenxmaenx guh gak cungj hozdung doxdax sonhag Cuengh Gun song saw vah. Doenggvaq doxdax hawj lauxsae nem hagseng、hagseng nem hagseng gyalaeg doxgyau, dazyinx hagseng lai maij hag Sawcuengh. Aen hagdangz neix yawjnaek hong beizyin lauxsae son’gyauq Cuengh Gun song saw vah, baengh beizyin hawj lauxsae daezsang cunghab suciz.

2013 nienz, aen hagdangz neix ban bizyezbanh gauj Vahcuengh Sawcuengh, hagseng gauj ndaej gig ndei. Baez gaujsi neix youz Swcigih Gyauyuzdingh cujciz, ndaw hagdangz ban bizyezbanh hagseng cungj camgya, gyoengqde gauj ndaej ndei, cienzbouh gizgwz, cienzbouh ndaej youhsiu, ceiq sang ndaej 98 faen, ceiq daemq ndaej 87 faen.

Gaenh geij bi neix, Swcigih Gyauyuzdingh gawjbanh daengx gih aeu Vahcuengh gangj gojgaeq doxdax, aen hagdangz neix baij vunz camgya, hagseng Vangz Fanghfangh、Vangz Swlunz cungj ndaej itdaengj- ciengj, lauxsae Vangz Yezmeiz hix dangguh boux lauxsae sonyinx ndaej ngeihdaengjciengj.