9 nyied 22 hauh banringzgvaq, Gvangjsih Swhfan Yozyen gawjbanh gaiq daih’it singsang doeg byauhcunj Vahcuengh doxdax, aen hagdangz neix cuhdwngj gyauyuz yozyen 2014 gaep ban Cuengh Gun sueng vah 40 boux doengzhag camgya doxdax.

Hagseng 2014 gaep ban Cuengh Gun sueng vah camgya baez doxdax neix dwg gaiq daih’it dinghyiengq guh siujyoz Cuengh Gun sueng vah lauxsae gungganq mbouj aeu cienz, baez doxdax neix muzdiz dwg niemhdingh Sawcuengh Vahcuengh hagsib cingzcik gaiq daih’it hagseng ban Cuengh Gun sueng vah, doengzseiz daezsang hagseng suijbingz singsang doeg, lienzdaengz daezsang hagseng yungh Sawcuengh Vahcuengh naengzlig.

Doxdax yienhciengz, gyoengq hagseng camgya doxdax haenx daenj buhvaq Bouxcuengh saek rongh yiengh lai, gagsaenq simdingh, youq gwnz daiz singsang doeg byauhcunj Vahcuengh, ginggvaq doxdax, bingzok it daengj ciengj 5 boux, ngeih daengj ciengj 10 boux, sam daengj ciengj 25 boux, bingzveij lij fat ciengj hawj gyoengq hagseng ndaej ciengj haenx.

Doxdax sat le, youq gyoengq hagseng iucingj baihlaj, Sam Nyied Sam Cazcise cungjbenh Cinz Siengzcouh boux cingj bae guh bingzveij neix vih baez doxdax neix eu fwen, gujli gyoengq hagseng gaenxgoemx camgya doxdax haenx. Gij goswz cingzeiq naekna doq bien doq eu haenx ndaej daengz yienhciengz bouxyawj haenh ndei.(Liengz Cingz/梁 晴）