9 nyied 21 hauh, daihseiq gaiq Liujcouh Si ruzlungz doxdax nem Yungzanh Yen daihcibcaet gaiq ruzlungz doxdax youq Yungzanh gawjbanh, ciengzdieg doxdax dwg youq gwnz raemx gvangqlangh baihbaek Giuzcangzanh yienhsingz. 65 aen ruzlungzdui daj Yungzanh、 Yungzsuij、 Liujcwngz daengj dieg daeuj haenx caez comz Dahyungzgyangh haiguh doxdax. Youq seiz doxdax gaxgonq caeuq seiz doxdax yietnaiq, gwnz raemx miz vunz mbin biujyienj、 mozdozdingj biujyienj daengj, hawj 5 fanh lai bouxyawj yawj dwk da cungj mbouj yaep.

Youq seiz gaihmusi, Yungzanh Yen vwnzyidui biujyienj fouxlungz、 caijdiu、 gyong daengj vwnzyi cezmuz, vih ruzlungz doxdax cauh’ok gij heiqfaenh angqhoh、 angqyangz he.

Ciuq cam rox, Yungzanh vwnzva ruzlungz daengz seizneix gaenq miz bak lai bi lizsij , daj bi 1978 hainduj, Yungzanh Yen youq Cangzanh Gujcin gawjbanh gaiq daih’it ruzlungz doxdax, daengz seizneix gaenq gawjbanh baenz 17 gaiq ruzlungz doxdax lo.

(Veiz CujSwz/韦祖祠 Vangz Bingjgvanh/黄柄官 Houz Houminz/侯厚民）