9 nyied 23 hauh, Swcigih Minzyijveij hai aen hoih saemjgauj 《Sawloih Cuengh Gun》(Banj Daihngeih). Swcigih Minzveij、 Minzyijveij cujyin Luz Yenbenj camgya aen hoih neix, vanzlij doiq hong biensaw daezok engq sang iugouz, Swcigih Minzyijveij fucujyin Yangz Gijbyauh camgya haihoih, 30 lai boux lauxhangz Sawcuengh Vahcuengh、 bouxbien doiq gaujsaw daejlaeh saeqset daengj vwndiz guh yaenglwnh.

Luz Yenbenj gangjnaeuz, aeu daj giz sang guh ndei hong saw vah minzcuz bae guh hong biensaw 《Sawloih Cuengh Gun》. Dangqnaj, gij hong cujyau gih raeuz minzyij bumwnz guh hong minzcuz ndawde hangh ndeu, couhdwg gyagiengz hong giekdaej Sawcuengh Vah- cuengh, guh ndei hong coihdingh 《Sawloih Cuengh Gun》, doiq guh saeq guh saed hong giekdaej Sawcuengh Vahcuengh gig miz ik. Luz Yenbenj giengzdiuh, hong coihdingh 《Sawloih Cuengh Gun》 daengz seizneix gaenq aeu ndaej gig ndei cingzcik, ciep roengzdaeuj aeu guh engqgya caezcienz di, aeu roengz cienz gaeuq, baujmaenh biensaw cizlieng, haenqrengz guh daengz engq ndei engq hawj vunz angqcoux.

Ciuq cam rox, coihdingh 《Sawloih Cuengh Gun》 dwg Guek- gya Yijveij “cibngeih haj” gohyenz gveihva hanghmoeg, daengx bonj saw daihgaiq miz 160 fanh cih saw, de dwg guek raeuz bonj sawhongdawz Cuengh Gun song cungj saw doiqciuq souloeg sawloih ceiq lai he, muenxcuk sonhag Sawcuengh Vahcuengh、 biensaw、 okbanj daengj lai fuengmienh iugouz.

(Veiz Yennaz/韦愿娜）