Sanglinz Yen Vangzcouh Siujyoz dwg youq ndaw yienhsingz, dwg aen hagdangz yungh Cuengh Gun song saw vah daeuj sonhag ndeu. Banhhag gvaqdaeuj, aeundaej cingzcik hung- raeuh. Youq gak cungj mbouj ndei hingqseiz yingjyangj lajde, gaxgonq Sawcuengh sonhag hix deng yingjyangj gig daih, haujlai cawjranz faenfaen soengq lwgnyez swhgeij bae lingh aen hagdangz doeg Sawgun, lauheiq hagseng hag le Sawcuengh mbouj rox Sawgun, caemhcaiq lauheiq hag Sawcuengh cijnaengz dwg yaepseiz he, raemx gvaq laeng bit, seizneix cungj doigvangq bujdunghva lo, caemhcaiq Yinghyij sonhag gauj ndaej hoenghhwd dem. Cimdoiq gij saedcaeq vwndiz neix, hagdangz lingjdauj banhswj caeuq daengx- gyoengq lauxsae ginggvaq mbouj- duenh roengzrengz caemhcaiq mboujduenh damqra, daengzlaeng byaij ok diuzroen moq ngamjhab hagdangz fazcanj ndeu. Haenx couh- dwg:

Genhciz vahcoj sonhag, gaih- canj minzcuz funghcingz haeuj hagdangz hozdung. Hagdangz nyinh- caen gvancez cibroek cih sonhag fuengcim. Hagseng aen hagdangz neix dingzlai dwg lwg Bouxcuengh, vih gikfat gyoengq hagseng bae guh ndei minzcuz doxgiet, ndaw hagdangz moix bi cungj gawjbanh baez minzcuz funghcingz haeuj hagdangz hozdung ndeu, lumj gaihcanj diuq foux faexsaux、dwklongj、foux haizgieg、doiq Fwencuengh、diuqcag、diklwg- gienq、gveng daehsa、banh“sam nyied sam”meijsizcez daengj ithaehlied hozdung, hawj daengx aen hagdangz miz vwnzva Bouxcuengh noengqnwt.

Cauxguh Cuengh Gun vwnzva daegsaek hagdangz. Doiq hagdangz vwnzva faqciengz、vwnzva luengq- byaij、vwnzva bangaep、vwnzva banhgunghsiz daengj sezsih, insik moix faen ngaenz, ceng’aeu hwnj aen hanghmoeg ndeu, dem caux faenh gingj ndei he, caenhrengz guh daengz “moix faqciengz cungj rox gangjvah, moix giz gungxgox cungj ganq vunz”, hawj hagseng giz yawj ndaej daengz、giz byaij daej daengz、giz dingq ndaej daengz cungj miz Cuengh Gun vwnzva noengznwd daeuj oenq caeuq nyumx, son saeseng baenz- lawz gangjvah, baenzlawz guhvunz, gak aen ban hwzbanjbau、senh- conzlanz、meijsuz cozbinj daengj, hix dwg yungh aen hingzsik aeu vah Cuengh Gun giethab hwnjdaeuj, hawj aensim hagseng lai fuengmienh ndaej daengz iemqnyinh.

Gaenx ganq mak duengh rim go. “Cib’it. Haj” gvaqdaeuj, hagdangz youq cauxguh Cuengh Gun vwnzva daegsaek hagdangz doengzseiz, sonhag cingzcik ndeiraeuh, miz 31 boux lauxsae gonqlaeng aeundaej swcigih、si、yienhgaep senhcin gyauyuz gunghcozcej、lauxsae maenhndei、yozgoh bouxdaiqdaeuz、maenhndei conhyez gisuz yinzcaiz、minzcuz doxgiet senhcin goyinz daengj cwnghauh miznaj; miz 17 bien gyauyenz lunvwnz youq sengjgaep doxhwnj haedsim gyauyuz ganhvuz gwnzde fatbiuj; miz 15 boux lauxsae camgya yienh、disi、swcigih gih- bwnjgungh daengj doxdax ndawde ndaej ciengj; 2010 nienz daengx gih gaihcanj Cuengh Gun song saw vah gangjgoq doxdax, 3 boux lauxsae faenbied aeundaej ngeih、sam daengj ciengj; 2011 nienz, miz 8 boux hagseng camgya daengx guek sijcih vehveh doxdax ndaej ciengj, 18 boux hagseng camgya daengx gih cozvwnz Cuengh doxdax ndaej ciengj, ndaej ciengj cozbinj ndaej daeng hwnj gwnz 《Gvangjsih Minzcuz Bau》bae; 2011 nienz 5 nyied 25 hauh, Vwnh Meijgenh lauxsae hawj Cunghyangh Densidaiz daengj 16 gya meizdij hwnj dangz Cuengh Gun song saw vah yenzdaujgo ndeu, hagdangz Sawcuengh sonhag ndaej byaij bae coh daengx guek lo. Seizneix aen hagdangz neix yungh cingzcik daeuj gangjvah, cawjranz mbouj yungh coi gag faenfaen soengq gyoengq lwg haeuj aen hagdangz neix daeuj doegsae lo.