Bouxlaux itcig son raeuz: Yaekaeu hag rox soengqhawj, hag rox ceiok, hoeng mbouj gouz aeu doxdauq. Seizneix, raeuz cungj cij rox ceiok, cij rox soengqhawj, hoeng aenvih mbouj gouz aeu doxdauq, couh menhmenh lumz bae, gizsaed ciepsouh hix ityiengh youqgaenj.

Fouzsei soengqhawj, aen dauhleix raeuz daj nomj couh ndaej son rox. Raeuz youq ndaw yienhsaed swnghhoz hix yunghrengz bae guh daengz. Leiz Fungh、Ciuh Yiluz daengj, cungj dwg aen yienghndei raeuz daj nomj couh aeu hagsib haenx. Vunz ndawsingz cungj mboujduenh bienq ndaej yienhsaed, doeklaeng couh dwg fouzsei. Vunz fouzsei ndaej mboujduenh senhyangz, vunz yienhsaed couh deng baebuenq.

Ndigah, gyoengqvunz menhmenh couh lumz bae lo, gizsaed vunz raeuz hix yaekaeu hag rox ciepsouh.

Hag rox ciepsouh, mwh mwngz nip noh roengz aenvanj bouxvunz mwngz simgyaez caemhcaiq yawj de gwn roengz- bae seiz, ndawsim mwngz itdingh gig diemz. Mwngz hix roxdaengz, ndawsim de hix itdingh gig diemzsub. Hoeng, dangh- naeuz mwngz itcig soengqhawj, cix doiswz de soengqhawj doxgaiq, couh rox daiq daeuj mazfanz. Cijrox ceiok、soengqhawj, hoeng mbouj rox ciepsouh, neix gizsaed couh sieng daengz song baih.

Hag rox ciepsouh, mwh bouxgvan (roxnaeuz mehyah) nip noh hawj, swhgeij henx ndok seiz, gaej lumz coh de riu, doeklaeng angq dwk nip noh haeuj bak, daiq faenh gyaez de, cig haeuj daengz sim. Neix hix dwg cungj ndiepgyaez he.

Gyaez mboujdanh sihyau soengqhawj, miz saekseiz, ciepsouh hix dwg cungj fuengsik gyaez ndeu.

Soengqhawj dwg saehndei, mbouj- duenh soengqhawj hix mbouj miz loek, cijdwg, soengqhawj caemhcaiq hag rox ciepsouh, ciepsouh bouxwnq doiq mwngz gij gyaez. Yienghneix seiqvunz cij rox bienq ndaej engq gyaeundei.