Duenh gonq, gicej youz Hwngzyen Gyauyenzsiz Cuengh Gun song saw vah gyauyenzyenz Liengz Meizginz daiqlingx, daj yienhsingz naengh ci 40 lai faencung, bae daengz Bingzmaj Cin Cungsim Yozyau (Fwnhyau).

Dangseiz boux yaucangj Vangz Genh ciepdaih dou, de lwnh dou: Aen hagdangz neix dwg aen siujyoz Mbanjcuengh, youq diegbya haemq hoj; gaxgonq dwg Bingzmaj Cungsim Siujyoz, dwg Hwngzyen aen Cuengh Gun song saw vah saedniemh yozyau daih’it. 2000 nienz, aen hagdangz neix gaij mingz lo, heuhguh Bingzmaj Cin Cungsim Yozyau(Fwnhyau).

Ciuq cam rox, aen hagdangz neix gvi Bingzmaj Cin Bingzmaj Segih guenj, fuzvu 6 aen mbanj(seizneix daengx cunh gungh miz 5000 lai vunz). Gungh miz 9 aen ban (baugvat 3 aen yozcenzbanh), 440 boux hagseng, 14 boux gyau cizgung. Lauxsae yozliz cienzbouh hab iugouz, 8 boux lauxsae miz daconh yozliz roxnaeuz daconh yozliz doxhwnj, 11 boux lauxsae miz cunggaep cizcwngh, 8 boux lauxsae nienzgeij 40 bi dauqndaw. Hagdangz ciemqdieg 9 moux, gencuz menciz 3150 bingz- fanghmij. Hagdangz miz dohmeizdij gyauyoz sezbei dauq ndeu, saw 2000 lai bonj.

Aen hagdangz neix guh Cuengh Gun song saw vah sonhag gaenq 30 bi. 30 bi gvaqdaeuj, hagdangz laeb- daeb ciuq aen fuengcim“cibroek cih”bae guh Cuengh Gun song saw vah sonhag, daihdamj sawq guh gaijbienq, ceng aeu Cuengh Gun song saw vah sonhag cungj ndei.

Guh Cuengh Gun song saw vah sonhag baenzneix nanz, aen hagdangz neix gonqlaeng ndaej bingzguh si gaep、yienh gaep Cuengh Gun song saw vah sonhag saedniemh gunghcoz senhcin cizdij; coengh dieg Boux- cuengh beizyangj haujlai vunzcaiz maenhndei. Doenghboux vunzcaiz hag Sawcuengh de, daengzlaeng miz 30 lai boux guh hong sonhag, gyoengqde youq ndaw cin gak aen yozyau, dang lingjdauj roxnaenz lauxsae daeuz, lij miz haujlai vunzcaiz guh hong wnq hix gig maenhndei; hagseng gauj hwnj dayoz conhgonh、bwnjgoh、yenzgiuswngh miz 60 lai vunz, beij guh Cuengh Gun song saw vah sonhag gaxgonq gyalai 3 boix doxhwnj.

Aen hagdangz neix laebdaeb dawz hong Cuengh Gun song saw vah sonhag dangguh hong daeuz, sawj lauxsae ceng guh boux lauxsae miz“Cuengh Gun song saw vah”daegsaek. Gaenh bi daeuj, miz mbangj lauxsae coz, guh swcigih gaep gak yozgoh vixyinx doxdax, sij Cuengh Gun song saw vah sonhag lunvwnz, cungj ndaejciengj. Lumjnaeuz 2014 nienz, daengx gih siujhagseng aeu Vahcuengh byauhcunj gangj gojgaeq doxdax, boux hagseng Yiz Ligez ndaej ngeihdaengjciengj; camgya sij Cuengh Gun song saw vah sonhag lunvwnz doxdax, Vangz Siujyiz、Vangz Ginz、Veiz Meizfangh daengj lauxsae cungj ndaejciengj; Vangz Siujyiz lauxsae camgya daengx yienh Cuengh Gun youhcizgo doxdax, ndaej daeg- daengjciengj.

Lai bi daeuj, aen hagdangz neix laebdaeb ciuq aen fuengcim“cibroek cih”bae guh Cuengh Gun song saw vah sonhag, aeu neix daeuj doidoengh gyauyuz fazcanj, hawj gyauyuz cizlieng ndaej daezsang, moix baez daengx cin geizmued gaujsi, gak yozgoh cingzcik ca’mboujlai cungj baih youq baihnaj daengx cin.