Yizcouh Si Lozdungh Cin Banjloz Siujyoz laeb youq 1965 nienz, dwg aen hagdangz lizsij haemq raez. Aen hagdangz neix dieg youq Lozdungh Cin giz depgyawj Bingznanz Yangh, youq ranghdieg cunhveij giz cungqgyang. Hagdangz fuzvu ndaw cunh 7 aen mbanj. Seizneix miz 106 boux hagseng, ndawde hagseng saujsu minzcuz ciemq cungjsoq 99.6%. Miz it daengz roek nienzgaep, moix nienzgaep aen ban ndeu, gungh miz 6 aen ban. Ndaw hagdangz gungh miz 7 boux lauxsae. Hagdangz gvangq 3343 bingzfanghmij, menciz ranzhag- dangz 454 bingzfanghmij, miz doengh laeuzsonhag ndeu.

Banjloz Siujyoz comz rengz beizyangj bang lauxsae gig caizhangz ndeu, aeu neix daeuj doidoengh hagdangz ndaej hwngfat. Beizyangj bang lauxsae sonhag Cuengh Gun song saw vah suciz maenhndei, dwg ndaw hagdangz aen cosih ceiq youqgaenj gvendaengz hongsaeh Cuengh Gun song saw vah sonhag.

Vihliux engq ndei beizyangj lauxsae, aen hagdangz neix dawz doenghboux lauxsae sonhag Cuengh Gun song saw vah faen baenz geij bang. Bang daih’it: Vahgun Sawgun cungj sugseg, youh miz sonhag gingniemh; bang daihngeih: Vahgun Sawgun cungj sugseg, danhseih sonhag gingmienh noix; bang daihsam: miz Vahgun Sawgun gihcuj, gaenxmaenx sonhag.

Youq seiz guh hong sonhag Cuengh Gun song saw vah, aen hagdangz neix lauxsae conhyezva suciz cugciemh gyoebbaenz, caemh- caiq cug ngoenz gya ndei. Lauxsae lai rengz bienq ak, aen hagdangz neix sonhag hix lai ak lai giengz.

Banjloz Siujyoz Cuengh Gun song saw vah gyauyenzcuj seizneix miz lauxsae 6 boux, hagdangz mbouj dinghseiz dwk comz gyoengqde camgya swcigih minzcuz gyauyuz lauxsae beizyinbanh, bae Vanz- gyangh、Dunghlanz daengj yienh, daengz gij hagdangz doxgap de beizyin. Ginggvaq beizyin, gyoengq lauxsae neix gaenq baenz bang lauxsae ak ndeu, caizhangz sonhag Cuengh Gun song saw vah. Gyoengqde youq ndaw hagdangz gawjbanh lai baez Cuengh Gun song saw vah sonhag beizyin, sawj aen hagdangz neix hong sonhag Cuengh Gun song saw vah hwngfat ndaej ndei.

Laeb Cuengh Gun song saw vah gyauyenzcuj, gyoebdoih doxcoengh doxcienz guh beizyin. Aen gyauyenz- cuj neix lauxsae song boux guhdoih, doengzcaez laemxsim doxyaeng baenzlawz bwh hong hwnj dangzgoq, baenzlawz hwnjdangz, neix hawj lauxsae sonhag Cuengh Gun song saw vah ndaej daezsang sonhag naengzlig.

Bingzciengz guh Sawgun nem Sawcuengh sonhag beizyin. Aen hagdangz neix bonjlai gvidingh moix singgeiz moix boux lauxsae sonhag Cuengh Gun song saw vah aeu hwnj 1 daengz 2 dangz Cuengh Gun song saw vah, seizneix gvidingh moix boux lauxsae moix hwnj dangz goq ndeu cungj aeu sonhag Cuengh Gun song saw vah. Youq seiz sonhag, aen hagdangz neix comz gij sawloih、vahgawq gingciengz yungh, bien baenz sawson, aeu daeuj son’gyauq daengxcungq lauxsae, hawj moix boux lauxsae cungj rox gangj Vahcuengh、aeu Vahcuengh hwnjdangz.

Guh hozdung Cuengh Gun song vah saw sonhag, lauxsae ndaej daezsang son’gyauh ginaengz; hag- seng youq gwnz goqdangz doxdax, ndaej daezsang naengzlig rox yungh Vahcuengh Sawcuengh, neix couh lai rox Vahcuengh Sawcuengh gig youq- gaenj. Lauxsae nem hagseng doxcoi doxyaeng, sawj Cuengh Gun song saw vah sonhag ndaej lai hwngfat.

Ginggvaq lai bi saedniemh, aen hagdangz neix roxyiuj baenzneix: Yaek guh ndei Cuengh Gun song saw vah sonhag, aeu miz dauq sawson habngamj ndeu. Dangqnaj, youq seiz- hoengq, Cuengh Gun song saw vah gyauyenzcuj doenggvaq soucomz、senjaeu、sijbien daengj banhfap, dingh le《Banjloz Siujyoz Yozgoh Cuengh Gun Song Vah Saw Sonhag Muzbyauh》, ndawde yozgoh baugvat Vahcuengh Sawcuengh、yijvwnz (Sawgun)、sij faenzcieng、suyoz、swyenz daengj, neix hawj gyauan Cuengh Gun song saw vah gvendaengz gij yozgoh neix lai caezcienz.

Daj aen hagdangz neix hai ban sonhag Cuengh Gun song saw vah daeuj, hagseng ndaw ban gauj ndaej ndei, mizdi gauj ndaej faensoq sang, ndaej haeuj ndaw si gak cunghyoz minzcuzbanh. Gyoengq hagseng neix youq ndaw hagdangz caep ndei giekdaej maenhna, okbae le doeg daengz gauhcungh hag ndaej lai ndei, mizdi lij gauj ndaej hwnj dayoz mizmingz. Hagseng gauj ndaej ndei, vunzmbanj lai haenhndei, gyoengq vunzmbanj couh lai haeujcoengh hagdangz guh hong sonhag Cuengh Gun song saw vah. Ndaej vunzlai dangdieg haenhndei nem haeuj- coengh, gyoengq lauxsae ndaw hagdagnz sim engqgya angqyangz, hix lai miz sim lai roengzrengz guhhong. Neix raeuz couh saenq aen hagdangz neix gij hongsaeh sonhag Cuengh Gun song saw vah haengjdingh hwngfat gya ndei.