Geij ngoenz gonq ndaejhoengq, gou dauq ranzcoj gvaq couhmoz.

Haetromh, mbwn gvengqlili, daxmeh heuh gou caeuq de bae ndaw suen mbaet duh.

Gou gaenq geij ndwen mbouj ma ranzcoj lo, doenghnaz dauqcawq bienq ndaej heuswdswd. Gou caeuq daxmeh miz gangj miz riu, byaij gvaq henz ranz byaij daihloh. Caj dou hamj gvaq daihloh, couh byaij daengz gaiq dieghoengq bingz gou cungj caengz raen gvaq ndeu. Gou cienq aenndang, caiq sijsaeq yawj le yawj, ngeizvaeg dwk cam daxmeh:“Gaiq dieg neix dwg dieg ranz lawz ha? Geiq ndaej henz aen suen raeuz mbouj miz gaiq dieghoengq gvaq ne?”Daxmeh dingq le loq gvaiq loq riu dwk lwnh gou:“Bouxlawz heuh mwngz baenzlai nanz mbouj dauq ranz, mwngz lumz la? Gaxgonq gizdieg neix dwg aen mboqlaux ndeu, bi’gvaq daeglan aungux youq henz mboq guhcaemz deng doek roengzbae dai lo, vunzmbanj couh comz daeuj doxyaeng, nyinhnaeuz seizneix vunzmbanj gaenq yungh swlaizsuij lo, aen mboq neix louzce hix yungh mbouj daengz, lauheiq baezlaeng lij miz nyeziq bae henz mboq guhcaemz doek mboq, doeklaeng couh gietdingh dawz aen mboqlaux daenz hwnjdaeuj, neix couh dwg aen mboqlaux haenx daenz baenz.”

Dingq daxmeh baenzneix gangj, gou cij dauqngeix hwnj aen mboqlaux raemx sawliklik gaxgonq. Gou youq gwnz dieghoengq ndwn dwk, sawqmwh dingqnyi miz sing raemx laesisi, gou swnh sing raemxlae byaij gvaqbae, youq bien diegbingz baihswix, miz raemx daj laj diegbingz roenx okdaeuj, riri rere baenz diuz mieng iq lae bae coh gizgyae, mboqlaux yienznaeuz deng daenz baenz diegbingz lo, raemxmboq lij dwg daenz mbouj youq, de lij mbouj lau sinhoj dwk daj geh rin gungx namh roenx okdaeuj, lae bae nyinh faex nyinh rum nyinh doenghgo.

Mboqlaux youq najmbanj, liz mbanj mbouj geijlai gyae. Mbouj miz bouxlawz rox de daj gizlawz lae daeuj, hix mbouj miz bouxlawz rox de daj ciuh lawz couh youq gizneix baenz mboq. Daj gou roxsaeh hwnj, couh raen vunz ndaw mbanj bae ndaw mboq rap raemx rwed byaek rwed mak, aeu raemxmboq bae dwk reih rauq naz, mbouj raen mboq duenh raemx gvaq, couhdwg seiz mbwnhwngq faex roz rum sauj, raemxmboq lij dwg lae dwk mbouj dingz mbouj duenh.

Daxmeh naeuz, gaxgonq ndaw mbanj caengz miz swlaizsuij, daxgoeng daxboh mwngz couh dwg gwn gij raemx aen mboqlaux neix majhung. Raemxmboq it bi seiq geiq cungj youq najmbanj dinghdingh lae dwk, hwnzngoenz hawj gyoengqvunz aeu raemx yungh raemx, ciengx hung vunzmbanj daih dam daih, hoeng de cungj mbouj cam gyoengqvunz aeu saek yiengh gvaq.

Gou fwt siengj daengz gyoengq lauxsae son vunz ganq vunz haenx, gyoengqde couh lumj aen mboqlaux ityiengh, vihliux son hagseng rox saw rox laex, gyoengqde hwnzngoenz sinhoj guhhong, bi daengz haemh youh hag youh son.

“Nonsei daengz dai sei cij caenh, labcuk baenz daeuh cix ganhawq.” Gyoengqvunz gangj daengz lauxsae cungj haengj dwen daengz coenz vah neix. Dwg ha, gyoengq lauxsae raeuz cungj dwg yienghneix mbouj gouz hoizbauq, mbouj geiq saetbae.

Gou nyinhnaeuz gyoengq lauxsae couh lumj aen mboq najmbanj gou ityiengh, vunz daek bae doengj he, raemx couh rox gag swng hwnjdaeuj doengj he, hix mboujguenj daek bae geijlai doengj, de ciuqyiengh gag lae okdaeuj rimrwd. Cijaeu vunz sawjyungh, de seizseiz hix cungj mbouj rox hawq, mbouj rox sauj.

Ngoenzneix gou hix dwg boux lauxsae ndeu, gou roxnyinh cihgeij hix aeu miz cungj cingsaenz fouzsei mboqlaux:

Raemxmboq ndaej ndiep vunz ciengx vunz, gou aeu gyaez seng ganq vunz; mboqlaux ndaej hawj vunz gwn ndei maj ndei, gou aeu son ndei ganq ndei hagseng ndaw ban, hawj gyoengq hagseng hag ndei maj ndei.

Aen mboq daek bae mbouj rox mboek, gyoengqvunz siengj gwn geijlai gonh geijlai. Gou guh boux lauxsae“lix daengz laux hag daengz laux”, seizseiz bwh ndei cihsiz, son hawj gij cihsiz hagseng yaek hag haenx. Aenmboq de miz cungj cingsaenz dijbauj giemhaw vunzraeuz. De son raeuz guh vunz mbouj ndaej dasang hix mbouj ndaej daekeiq, aeu hag rox giemhaw. Gou aeu lai hag lai lienh, guh daengz vunz mbouj gou miz, vunz miz gou ak, dawz gij hong bonjfaenh ganq vunz guh ndei guh maenh.