Fuzsuih Yen Cunghdungh Cin Cungsim Siujyoz youq 1906 nienz banh, daengz seizneix ciemqdieg 46026 bingzfuengmij. Ndaw hagdangz hwnj miz laeuzsonhag、laeuzrugninz hagseng、laeuzgwnngaiz hagseng; hwnj miz funghranz yaemvah、 funghranz doxcomz bwhgoq、 funghranz lai- meizdij、funghranz yawjsaw、funghranz yizgi、funghranz sausenhdui hozdung、funghranz banhgoeng lauxsae daengj funghranz lai goengnaengz. Hagdangz banhhag diuzgen ndei, lauxsae sonsaw ndei, guenjleix gveihfan, dwg aen hagdangz hagseng gyaez daeuj haglienh ndeu.

Dangqnaj hagdangz miz yoz- cenzbanh caeuq it daengz roek nienzgaep gungh 27 aen ban, miz hagseng 1288 vunz, ndawde 1275 vunz dwg hagseng Bouxcuengh, miz lauxsae cizgungh 80 boux, ndawde miz 7 boux dwg Sawcuengh conhyez cunghconh bizyez, dangqnaj lij miz 10 lai boux lauxsae doeg hanzsou Sawcuengh bwnjgoh conhyez. Aen hagdangz neix daj 2012 nienz hwnj, hai ban Cuengh Gun song saw vah ngeihloih mozsi saedniemh sonhag.

Hagdangz guh ndei minzcuz vwnzva gyauyuz hozdung, hwngfat daegsaek gyauyuz, aeu Vahcuengh、Fwencuengh、foux minzcuz daengj coqhaeuj gwnzdangz bae sonhag, sawj hagseng ndaej hag daengz haujlai minzcuz vwnzva, aeu ndaej cwngzyau ndei. Aen hagdangz neix hagseng youq 2012 nienz Gvangjsih siujhagseng Vahcuengh byauhcunj caizyi byauj- yenjsai ndawde ndaej ngeih daengj ciengj; Lij Gen caeuq Vangz Dingfungh song boux lauxsaae ndaej youhsiu cijdaujciengj. 2009、2010、2012 nienz faenbied ndaej Cungzcoj Si cungh siuj hagseng vwnzyi veiyienj “golwgnyez moq、 gojdamz- raih lwgnyez” cangcoz biujyienj doxdax sam daengj ciengj, Lij Gen lauxsae doengzseiz ndaej youhsiu cijdauj ciengj. 2010 nienz ndaej daengz Fuzsuih Yen caizyi doxdax siujyozcuj heiqfoux sam daengj ciengj, swnghyozlei sam daengj ciengj, Lij Gen lauxsae doengzseiz ndaej youhsiu cijdauj ciengj. 2012 nienz, saeseng faenbied ndaej daengz Fuzsuih Yen Daihseiq Gaiq Lwgnyez Caizyi Doxdax siujyoz cuj swnghyozlei sam daengj ciengj. Lij Gen lauxsae doengzseiz ndaej youhsiu lauxsae ciengj. 2012 nienz ndaej daengz Fuzsuih Yen hagdangz seifaenz doegsaw doxdax hagseng cuj ngeih daengj ciengj, lauxsae cuj sam daengj ciengj, Liuz Sauyungz caeuq Lij Gen song boux lauxsae doengzseiz ndaej biujyienj ciengj、 youhsiu cijdauj ciengj, hagdangz doengzseiz ndaej daengz youhsiu cujciz ciengj. Youq 2012 nienz, Fuzsuih Yen banh gaiq daih’it minzcuz dijyuz yindungvei ndawde, aen hagdangz neix hagseng youq nyezmbwk 100 mij, yiengq raeblaeng vut giuzsaedsim, aemq laep ciep domq doxdax ndawde faenbied ndaej daengz daihsam mingz、 daihseiq mingz、 daihroek mingz. 2014 nienz daengx gih gaiq daihsam siujhagseng gangj goj Vahcuengh doxdax ndawde, miz song boux hagseng ndaej sam daengj ciengj.

Aen hagdangz neix guh ndaej ndei, cujyau ca lajneix geij diuz:

It dwg hagdangz yawjnaek ca goqdaez yenzgiu. Hagdangz genj guzgan lauxsae gyoebbaenz yaubwnj gocwngz gohyenzcuj, doenggvaq caz swhliu, ok rog bae cunzcam, lauxhangz bingzdiemj, cwkcomz sucaiz, biensij yaenq ok sawson minzcuz vwnzva haeuj hagdangz. Sawson daj yinzvwnz dilij、saehsaed bouxokmingz、ndaw- biengz minzfungh minzsug、cienzseiq meijdwz、foux conzdungj ndawbiengz、go caeuq vahsug ndawbiengz daengj geij aen fuengmienh daeuj bien sij, mizyauq dwk bae yinx saeseng cienzyiengz vwnzva conzdungj maenhndei.

Ngeih dwg aen hagdangz neix dawz minzcuz vwnzva coqhaeuj ndaw sawson bae, hailaeb Cuengh Gun song saw vah ngeihloih mozsi saedniemh sonhag, hawj hagseng daj iq couh beizyangj baujhoh minzcuz vwnzva yisiz. Hagdangz banlingjdauj doengjit swhsiengj, daezsang yinsiz, laebbaenz le lingjdauj siujcuj, caemhcaiq yenzgiu saedhengz fangh’an. Daj 2012 nienz seizcou haggeiz hwnj, aen hagdangz neix yozcenzbanh hainduj guh Cuengh Gun song saw vah ngeihloih mozsi saedniemh sonhag. Dangqnaj, gij ban hwnj goq Sawcuengh de yozcenzbanh miz 3 aen, hagseng 71 boux; itnienzgaep 3 aen ban, hagseng miz 145 boux; ngeih nienzgaep 3 aen ban, hagseng 144 boux. Hagdangz ciengzseiz haihoih yenzgiu gij hong song saw vah sonhag, ndaej daengz cawjranz lijgaij caeuq haeujcoengh.

Sam dwg hagdangz doenggvaq yinhyoz、meijsuz、dijyuz、cawjdaez banhduivei caeuq govai hozdung lai roenloh guh minzcuz vwnzva gyauyuz senhconz, daihlig guh gij daegsaek Bouxcuengh dijyuz hozdung, lumj doenggvaq dwkgyangq、dik lwggienq 、diuq fouxfaexsaux daengj minzcuz conzdungj dijyuz hanghmoeg, hawj hagseng youq ndaw hozdung ndawde roxdaengz minzcuz fungsug, demgya minzcuz gamjcingz.

Lai bi daeuj, aen hagdangz neix sonyinx hagseng hag ciengq go minzcuz， hag diuq foux minzcuz, hag guh minzcuz soujgungh gunghyibinj, hag rox hangh saujsuz minzcuz conzdungj dijyuz hanghmoeg ndeu daengj hozdung, hawj hagseng youq ndawde beizyangj minzcuz doxgiet, gaenxgyaek maenh’ak, ndiepgyaez hozbingz, seizseiz hawj bonjfaenh ak daengj minzcuz cingsaenz.

Aen hagdangz neix lij gujli hagseng youq ngoenzciet caeuq ngoenz gyajgeiz dauqma ranzyouq segih bonjfaenh guh segih fuzvu, camgya sevei sizcenj, hawj hagseng caencingq roxdaengz gijmaz dwg minzcuz cingsaenz.