Gaenh bi daeuj, Swcigih Minzveij laebdaeb haenqrengz haeujcoengh gih raeuz gak dieg guh hongsaeh hwngfat gvangjbo denyingj densi vah minzcuz.

It dwg laebdaeb heuh nem cingjgouz Cunghyangh nem guekgya. Bi’gvaq、bineix daengx guek “song hoih”nem seiz wnq, Daengx Guek Yinzda daibyauj、Swcigih Minzveij cujyin Luz Yenbenj cungj ca ndei gihvei, oksing nem cingjgouz guekgya haeujcoengh gih raeuz gyarengz guh hong gvangjbo denyingj densi vah minzcuz, daegbied aeu dauqfuk gvangjbo cezmuz binzliz Vahcuengh, laebdaeb haenqrengz haeujcoengh gih raeuz, hawj Gvangjsih Densidaiz、Gvangj- sih Yinzminz Gvangjbo Dendaiz ndaej gya cezmuz Vahcuengh、gyalai cezmuz neiyungz、gya raez book seizgan、hai veisingh densi binzdau nem binzli Vahcuengh daengj.

Ngeih dwg comz vunz guh ciendaez diucaz. 2013 nienz, Swcigih Minzveij nem Swcigih Minzyijveij、Swcigih Gvangjdengiz doxgap guh diucaz, cienmonz caz gij cingzgvang gih raeuz vunz saujsu minzcuz cojyouq yungh vah saw. 2014 nienz, Swcigih Minzveij doenghboux lingjdauj daeuz lij daegdaengq guh diucaz yenzgiu, caz rox gak dieg guh hongsaeh gvangjbo denyingj densi vah minzcuz. Guh gij hong neix, baezlaeng dingh cwngcwz、laeb faplwd nem baihgwnz ok geiqmaeuz couh miz baengzgawq haemq sijsaeq.

Sam dwg gaenxmaenx bang- coengh cienzngaenz. Yienznaeuz Swcigih Minzveij cienz mbouj lai, hoeng hix roengz cienz rengz haeujcoengh gak dieg guh hongsaeh gvangjbo denyingj densi vah minzcuz. Dangqnaj, daengx gih gaenq miz Cungzcoj Si nem 21 aen yienh(si、gih) haibo lanzmuz gvangjbo densi vah minzcuz, baugvat Vahcuengh、Vah Yauzcuz、Vah Myauzcuz、Vah Dungcuz.

(Swcigih Minzveij)