“Ciuq vunz hengz, yawj dieg guh, raen vunz maz gangj vah maz”, Denzdungh Yen Yinzminz Fazyen gyoengq fazgvanh gangj song cungj vah de, roengz mbanj haeuj ranz banh’anq, couh baenzneix hengzguh. Fazgvanh gangj vah dangdieg, singyaem sug, vunz cungj rox, sim diepgyawj, hawj fazgvanh caeuq boux daeuj banh saehgauq doxgyau lai fuengbienh. Fazgvanh aeu Vahcuengh banh’anq, hawj vunzlai dangdieg dingq ndaej rox, vunzlai Mbanjcuengh souh’ik haujlai.

8 nyied 6 hauh, aen fazyen neix Yincaz Fazdingz aeu Vahcuengh daeuj saemjleix anqgienh, aen anq neix dwg Mungzmouj gauq 8 boux lwg doxceng cienzngaenz ciengxlaux. Youq saemj- leix seizde, fazgvanh aeu Vahcuengh dangdieg gangj gak diuz faplwd, hawj bouxgauq nienzgeij geq dingq. Doeng- gvaq gangj dauhleix, ciuq faplwd, gaijgez le gienh saehgauq neix, hawj bouxbangxhenz yawj le haenhndei.

Ciuq cam rox, aen yienh neix dwg dieg lai aen minzcuz comzyouq, ndawde vunz Bouxcuengh ciemq dingzlai, vunzmbanj dangdieg ndawde doenghboux nienzgeij geq mbouj rox Vahgun Sawgun. Aen fazyen neix laeb fazdingz Vahcuengh, Bujdunghva nem Vahcuengh doxlawh gangj, daengz gak dieg aeu song cungj vah liebcunz hai fazdingz 10 lai baez. Neix youq lajmbanj cienzbo faplwd, hawj vunzlai lai fuengbienh banh saeh doxgauq, hawj banh’anq yauliz lai sang.

(Vangz Feih/黄飞 Veiz Yizvan/韦益万)