Yizcouh Si Lozdungh Cin Bohlanj Siujyoz laeb youq 1921 nienz, dieg youq Yizcouh Si Lozdungh Cin Hawlozdungh baihsaenamz, liz Hawlozdungh daihgaiq song goengleix, youq din Byavangzsanh. Hagdangz menciz daihgaiq gungh 1.3 fanh bingz- fanghmij; ranz ndaw hagdangz laeb ndaej habngamj, sezsih sezbei miz haemq caez. Seizneix miz 8 aen ban, 265 boux hagseng; 12 boux lauxsae, ndawde 11 boux miz daconh yozliz, ciemq lauxsae cungjsoq 91.7%, yozliz cienzbouh hab iugouz. Siujyoz gaugaep lauxsae miz 11 boux, ciemq lauxsae cungjsoq 91.7%. Lai bi daeuj, Bohlanj Siujyoz aeu“vwnzmingz、gaenxguh、gouzcaen、okmoq”guh yaufungh, aeu“nyinh- caen、gyaezlai、doxgap、rox son”guh gyaufungh, aeu“gaenxhag、maijhag、gagdingh、doxgap”guh yozfungh, son- gyauq ndaej baenz bang baenz gyoengq vunzcaiz Cuengh Gun song saw vah.

Haenqrengz sonhag Cuengh Gun song saw vah, hwngfat vah saw minzcuz

Bohlanj Siujyoz youq 2008 nienz ndaej Swcigih Gyauyuzdingh dinghguh Cuengh Gun song saw vah saedniemh yozyau. Neix liux, aen hagdangz neix giethab cingzgvang caensaed, ok lai aen banhfap, nyinhcaen guh ndei hong sonhag Cuengh Gun song saw vah.

Gyarengz beizyangj lauxsae. Daengxcungq lauxsae camgya Sawcuengh gihcujbanh, aen ban neix youz Swcigih Gyauyuzdingh banh; ginggvaq gaujhwz, cienzbouh gih- bwnj hab iugouz. Liuxle lij comz mbangj lauxsae camgya ban daezsang Sawcuengh, cungj aeundaej cinbu. Moix aen haggeiz anbaiz lauxsae, doxlwnz camgya Vahcuengh Sawcuengh sonhag beizyin hozdung, hozdung youz Swcigih Gyauyuzdingh banh.

Anbaiz ndei dangz goq Saw- cuengh. Moix aen ban moix cou cungj hwnj dangz Sawcuengh, lauxsae doxlawh hwnjdangz doxlawh dingq, doxgyau doxyaeng, haenqrengz doenggvaq son Sawcuengh, hawj Sawgun son ndaej gya ndei, guh- daengz baengh Cuengh coi Gun、Cuengh Gun cungj rox.

Comz hagseng gaenxmaenx camgya gak cungj hozdung. Aen hagdangz neix miz dajsuenq dwk guh Sawcuengh hozdung, moix haggeiz cungj guh hozdung doxdax gangj gojgaeq Vahcuengh、doxdax doeg Sawcuengh daengj. Liuxle, lij comz lauxsae nem hagseng camgya gak cungj doxdax hozdung; hozdung youz Swcigih Gyauyuzdingh Minzgyaucu banh. Doenggvaq hozdung, hawj hagseng maij hag Sawcuengh, yinx lauxsae gyarengz son Sawcuengh, daezsang son’gyauq suijbingz.

Lai caeuq ginzcung doxgyau doxyaeng. Aen hagdangz neix comz lauxsae diepgyawj ginzcung, doxgyau doxyaeng, hawj gyoengqde lai rox vah saw minzcuz miz maz yungh, lai gyaezmaij Vahcuengh Sawcuengh, sawj gyoengqde engqgya miznaj, lai mizsim okrengz haeujcoengh hag- dangz son Sawcuengh.

Haenqguh bonj hagdangz beizyin, coengh lauxsae daezsang suciz

Lai bi daeuj, aen hagdangz neix aeu cungj banhfap“comz aeu”bae hagsib, yinx lauxsae giethab gyauyuz gaijgwz, dauqyawj、naemjngeix gij gyauyoz yenzgiu gaxgonq guh de. Nyinhcaen dauqngeix gaxgonq ndaw hagdangz guh hong sonhag yenzgiu miz maz vwndiz. Hagdangz ciuqriengz lohnaemj guh sonhag yenzgiu, aen lohnaemj neix couhdwg“gaem deng vwndiz, rox yaek aeu maz, aeu ciendaez dazyinx, naemj aeu cingzcik”, gaenxmaenx laeb lai aen bingzdaiz guh sonhag yenzgiu, baugvat bingzdaiz aeu conhyez yinxlingx、bingzdaiz aeu lingjdauj yinxlingx、bingzdaiz guh ciendaez daujlun、bingzdaiz youz guzgan yinxlingx、bingzdaiz dauq naemj nem fazcanj、bingzdaiz mbouj dinghseiz yenzdauj daengj.

Hagdangz gaenxmaenx damqra nem hengzguh“gaihfangsi sonhag mozsi”. Ginggvaq damqra nem hengzguh, cobouh yenzgiu ok geij cungj hagsib fuengsik, couhdwg vixyinx hagseng gag guhcawj、damqra、doxgap hagsib.

Laebdaeb banhhag aeu ok daegsaek, sonhag yenzgiu cingzcik caemh lai

Aen hagdangz neix laebdaeb aeu sonhag guh cungsim、aeu cizlieng guh goekgaen、aeu guenjleix guh banfap、aeu okmoq guh rengzdoengh、baengh gohyenz coi fazcanj, haenqrengz guh suciz gyauyuz nem guenjleix. Sezbei sonhag engqgya caezcienz, sonhag cizlieng mboujduenh daezsang, gyauyuz gohyenz aeundaej cwngzyau. Gaenh bi daeuj, lauxsae sij gak loih lunvwnz miz 5 bien ndaej swcigih gaep it、ngeih、sam daengjciengj; song bien ndaej si gaep ciengj, 2 bien ndaej yienh gaep ciengj. Hagseng moix bi camgya Yizcouh Si cungh siuj hagseng vwnzva yisuz cozbinj baijok、vehveh、gangj gojgaeq、sij faenzcieng daengj doxdax, cungj ndaej cingzcik ndei; hagdangz ndaej bingzguh Hozciz Si cangzgveih gvanjlij youhsiu yozyau.