Seizneix, vunzraeuz byaij haeuj Denzdungh Yen Cozdwngh Yauzcuz Yangh Mbanjluengxgungz, caenhraen diuzroen suijniz bingzbwd iet baenaj, ndaw mbanj ranz baenz coij luengq seuqcingh, ranzlaeuz moq ndoj youq laj raemhfaex, gyoebbaenz fuk veh lajmbanj gyaeundei ndeu. “Gaxgonq ranzhaz vaihvad seiqlengq cungj doeng rumz, seizneix ranzlaeuz sang- vid ndeiyawj daengj ndaw rungh”, coenz vah neix caensaed lwnhgangj le gij bienqvaq Mbanjluengxgungz.

Mbanjluengxgungz dwg aen cunhlienzhaeh swcigih、Baksaek Si、Denzdungh Yen caeuq Cozdwngh Yauzyangh seiq gaep dangjveij suhgih caenndang haeujdiemj guh fuzbinz gunggeng ndeu. Daengx cunh 759 vunz, hoeng reihnaz ngamq miz 218 moux, moix vunz bingzyaenz cij miz reihnaz 0.3 moux, aenvih diegmbanj diuzgen yaez lai, gaxgonq ndaw mbanj roen gaeb mbouj doeng ci, ranzhaz vaihvad, raemxgwn uqboemh, guh mbouj gaeuq gwn, moix vunz moix bi bingzyaenz cinghsouhaeuj mbouj daengz 170 maenz, 95% vunzmbanj imqraeuj vwndiz caengz ndaej gaijgez.

2008 nienz 10 nyied caeuq 2011 nienz 4 nyied, Cunghgung Cungh- yangh Cwngcigiz nyuenz cangzveij、Daengx Guek Yinzda Cangzveijvei nyuenz veijyenzcangj Vuz Banghgoz gonqlaeng song baez bae daengz ndaw mbanj neix guh diuyenz, rengzrwd dwk doidoengh gij hong fuzbinz gunggeng ndaw mbanj. 2011 nienz 12 nyied gvaqlaeng, Swcigih Dangjveij nyuenz suhgi、Swcigih Yinzda Cangzveijvei nyuenz cujyin Goz Singhgunh caemh gonqlaeng haj baez bae daengz ndaw mbanj neix guh diuyenz, sonyinx guh hong fuzbinz gunggeng. Ginggvaq gak gaep dangj- veij cwngfuj caeuq sevei gak gyaiq nem vunzmbanj haenqrengz bae guh, Mbanjluengxgungz bienqvaq fan mbwn boek deih: Roengzngaenz 500 lai fanh maenz guh ranzyouq gaijguh gunghcwngz、raemxgwn gunghcwngz、roensuijniz doeng mbanj gungh- cwngz、hagdangz gaijguh gunghcwngz doenghgij neix, hawj yiengh mbanj bienq moq bienq lengj, swnghcanj swnghhoz diuzgen ndaej gaijndei haujlai.

Vih vaiqdi ndaej vut gungz baenz fouq, Mbanjluengxgungz aeu “gunghswh + gihdi + hozcozse + nungzhoh” aen mozsi neix guh daiq- doengh, roengzngaenz 60 lai fanh maenz laebbaenz noufaexcuk daj- ciengx guhyiengh beizyin gihdi, daengz 2013 nienz daengx mbanj miz 130 ranz ciengx noufaexcuk gungh 3250 duz, moix bi cinghsouhaeuj 248 fanh maenz; fatdoengh vunlai youq laj faex ciengx gaeq, 2013 nienz daengx mbanj miz 20 lai ranz ciengx gaeq ndaej gai gaeqnoh 8 fanh duz, souhaeuj 560 fanh maenz; bangbouj nungzhoh youq gwnz bya dieg ndaej ndaem faex haenx ndaem gofaexcuk, vat rangz caeuq guh dajsan, moix bi ndaej souhaeuj 60 lai fanh maenz; doengzseiz lij laebbaenz le duhmeuz dajndaem gihdi、makhojlungzgoj dajndaem gihdi doengh cungj hong neix, demlai vunzmbanj souhaeuj. Ndaw mbanj lij cingj gisuzyenz daengz ndaw mbanj guh cienhangh ginwngz guhhong caeuq saedyungh gisuz beizyin, cujciz bouxcoz okrog dajgoeng, moix bi cungj miz 240 lai vunz okrog dajgoeng, ngaenzhong souhaeuj dabdaengz 102.6 fanh maenz. Vunzmbanj souhaeuj bi beij bi onjdingh demhwnj, vunzlai saedceij yied gvaq yied vuenyungz.