8 nyied 4 hauh banhaet, Gvangjsih Gaiq Daihroek Sawcuengh Sejcoz Beizyinbanh youz Gvangjsih Sam Nyied Sam Cazcise gawjbanh haenx youq Nanzningz haibanh. Swcigih Minzyijveij fucujyin Yangz Gijbyauh camgya aen haiban yizsi caeuq hwnj le haiban dangz goq daih’it. Sawcuengh sejcoz beizyinbanh yozyenz daj daengx gih gak hangz gak nieb daeuj haenx caeuq Gvangjsih Sam Nyied Sam Cazcise daengxcungq cizgungh gungh 50 lai boux dingq le baez dangz neix.

Yangz Gijbyauh hwnj dangz goq daezmoeg heuhguh “laj cangzdai moq, Gvangjsih hong minzyij caeuq hong minzcuz doxyiengq bae guh”, doiq dangjcunghyangh、 gozvuyen 《Aen Yigen Gven- daengz Hingzseiq Moq Lajde Gyagiengz Caeuq Gaijcaenh Hong Minzcuz》 daj giz sang nyinhrox bae guh, giethab gih raeuz hong minzcuz saedsaeh, daj sam fuengmienh gangj le seiz hingzseiq moq baenzlawz guh ndei hong minzcuz caeuq hong minzyij. Gangj daengz gij vwndiz baenzlawz yungh ndei Gvangjsih saw vah minzcuz, Yangz Gijbyauh giengzdiuh, aeu lai doxrox, lai baujhoh; ra cinj fuengyiengq, hab seiz bae guh; habrengz haenqguh, aeu miz cingzcik. Doeklaeng, Yangz Gijbyauh gujli yozyenz gaenxgoemx sij faenzcieng、 lailai douzgauj, insik baez beizyin neix, roengzrengz hagsib, ciengjaeu baenz boux cozgyah Sawcuengh maenh- ndei he.

Youq seiz haiban yizsi, Gvangjsih Sam Nyied Sam Cazcise secangj Veiz Vahyungz naeuz, baez beizyin neix dwg seiq ngoenz, iucingj ndaw gih rog gih Sawcuengh conhgyah、 Sawcuengh bauganh lauxhangz daeuj hwnjdangz, beizyin neiyungz fungfouq, baugvat Sawcuengh sij faenzcieng、 sij faenzcieng gi’gyauj、fwen Sawcuengh cekgej daengj fuengmienh neix.

(Vangz Subingz/黄素萍)