“30 lai bi daeuj，baez daih’it banh cungj beizyinbanh neix, neix couhdwg hongsaeh Cuengh Gun song saw vah sonhag youh fazcanj baenaj haemq lai.”7 nyied 28 hauh banhaet, Gvangjsih Minzcuz Gyauyuz Fazcanj Cungsim cujyin Couh Gwzyih, doiq bang yozyenz ndaw ban son’gyauq baenzlawz bien sawson Cuengh Gun de naeuz,“Banh baez beizyinbanh neix, vihliux engq ndei hawj hongsaeh ok sawson Cuengh Gun gya ndei fazcanj baenaj, hawj doenghboux biensij sawson Cuengh Gun ndaej daezsang suijbingz, gya vunz guh hong biensij sawson Cuengh Gun.”Ngoenzde, aen ban beizyinbanh neix cingq guh daengz ngoenz daihsam, Couh Gwzyih geij coenz vahsoh neix, gangj cingcuj le vihmaz banh aen ban neix.

Ndaej son lai rox aeu lai ak

Baenzlawz hawj doenghboux biensij sawson Cuengh Gun ndaej daezsang suijbingz? “Vihneix, dou cingj le lai boux lauxhangz daeuj hwnjdangz son’gyauq, gyoengqde lai bi daeuj cienmonz guh hong nem yenzgiu Cuengh Gun fanhoiz、Vah- cuengh Sawcuengh、vwnzva Boux- cuengh、vwnzyoz Bouxcuengh、biensij nem fanhoiz sawson Cuengh Gun、gocwngz haifat、biensij sawson deihfueng daengj. Raeuz aeu laemx- sim dingq lauxhangz gangj, hag aeu cihsiz, bouj gij cihsiz raeuz mbouj rox de.”Couh Gwzyih daengq naeuz,“Baez neix gihvei nanz miz, muengh gak boux yozyenz gaemdawz baez gihvei neix, itsim dingq lauxhangz son- gyauq, aeu lai rox cihsiz, daezsang suijbingz biensij, comz rengz ce daengzlaeng engq ndei guh hong biensij.”

Lauxhangz damz fwen daeuj soengq“bauj”

“Sanglinz raen lauxyoux, ndawsim gou vuenheij. Hag hwnj- dangz ngoenzneix, Sien gangj geij coenz gonq. Gou dungxcaiz mbouj lai, Fanhoiz caiq mbouj ak. Gangjvah miz loekcak, Cingj bouxak lai son.”7 nyied 26 hauh banhaet, dwg dangz daih’it, Cunghgoz Minzcuz Yijvwnz Fanhyizgiz yizsinj(gaugaep cizcwngh) Gvanh Swgingh, gag bien cit fwen neix, aeu Vahcuengh byauhcunj daeuj damz. Gyoengq yozyenz dingq liux, bekfwngz bobbob. Haet de, Gvanh Swgingh gangj le“sawson cungh siuj yozyau baenzlawz youz Cuengh hoiz Gun”. Dangz neix diepgyawj hong bingzciengz, vih yozyenz gejdap vwndiz, hawj gyoengqde ndaej son lai rox.

Ciuq cam rox, baez beizyinbanh neix gungh cingj le 10 boux lauxhangz daeuj hwnjdangz, gyoengqde dwg lauxhangz fanhoiz、vahgangj、minzcuz、vwnzva、gyauyuz daengj.

Yozyenz eu fwen gyo’mbaiq lauxhangz

“Ndaej raen lauxhangz daeuz, Ciuh neix raeuz vuenheij. Dingq liux dangz goq neix, Lai ndei doeg cib bi.”7 nyied 28 hauh banhaet, dingq liux Gvangjsih Minzcuz Vwndiz Yenzgiu Cungsim yenzgiuyenz Cinz Caijlonz gangj dangz goq“vwnzva Boux- cuengh”, Gvangjsih Sam Nyied Sam Cazcise cungjbenhciz Cinz Siengzcouh gag bien ok cit fwen neix, yinxlingx gyoengq yozyenz doengzcaez ciengq. Gyoengqde itmienh ciengq itmienh bekfwngz, sing eu fwen、singriu、sing bekfwngz caemh yiengj, yienhciengz vunzlai angqyangz dangqmaz. Dingq yozyenz caez eu fwen caemh angq, Cinz Caijlonz hix naj riu sim hai. Yozyenz eu fwen gyo’mbaiq laux- hangz son’gyauq, aeu fwen cienz cingz, gig miz daegsaek Bouxcuengh.

Ciuq cam rox, Gveigangj Si Cinzdangz Gih Mungzgungh Yangh Gujsanh Siujyoz、Dwzbauj Yen Sawcuengh Yozyau、Majsanh Yen Bwzsanh Cin Hozlungz Siujyoz、Vujsenh Yen Sawcuengh Yozyau daengj 21 aen danhvei gyawj 40 boux yozyenz camgya baez beizyin neix. Gyoengq yozyenz neix dwg boux biensij sawson Cuengh Gun, daeuj hwnjdang liux, gya ndaej lai rox, caen dwg lumjbaenz“ndei gvaq doeg cib bi saw”.

Baez beizyin neix daj 7 nyied 26 hauh daengz 30 hauh youq Sanglinz gawjhengz. Youq haj ngoenz de, cawzliux dangz Gvanh Swgingh nem Cinz Caijlonz, gyoengq yozyenz lij dingq Gvangjsih Minzcuz Dayoz yenzgiuyenz Mungz Yenzyau gangj vwnzyoz Bouxcuengh、Gvangjsih Minzcuz Dayoz gyausou Veiz Su- gvanh gangj daegdiemj Vahcuengh、Gvangjsih Sam Nyied Sam Cazcise yizsinj Cinz Siengzcouh gangj fwen Bouxcuengh、Swcigih Minzyijveij Fanhyizcu yizsinj Luz Yaujli gangj fanhoiz baiz danhvei、Gvangjsih Gauhcungh Gogaij Cungsim yenz- giuyenz Bungz Yinfungh gangj gij iugouz nem gveihfan biensij sawson、 Gvangjsih Minzcuz Dayoz fu’gyausou Luz Yungjbinh gangj《Fangh’an Sawcuengh》、 Gvangjsih Minzcuz Cuzbanjse fuyizsinj Veiz Caijgenh gangj biensij nem doiqyawj sawson Sawcuengh、Gvangjsih Swhfan Yozyen fu’gyausou Huj Ginwngz gangj sawson deihfueng nem banhfap biensij daengj goq dem.

Baez beizyin neix youz Gvangj- sih Minzcuz Gyauyuz Fazcanj Cungsim cawjbanh.