Bahmaj Yauzcuz Swciyen Bahmaj Cin Banzyangz Siujyoz youq baihsaebaek yienhsingz, liz yienhsingz 10 goengleix. Hagdangz youq 1935 nienz laebbaenz, lizsij raez, dwg ndaw yienh aen hagdangz cenzyizci Cuengh Gun song saw vah saedniemh siujyoz dog. Seizneix miz 15 boux gyau cizgungh. Ndaw hagdangz miz siujyozbu nem youwzbu. Siujyozbu miz 7 aen ban, 190 boux hagseng, ndawde 110 boux hagseng ninz ndaw hagdangz. Youwzbu miz banhung、banrauh、ban’iq 3 aen ban, gungh miz 105 vunz. Hagdangz ciemq dieg 6800 bingzfanghmij, gencuz menciz gungh miz 3060 bingzfanghmij; miz doengh laeuzrugninz 3 caengz ndeu, doengh laeuzsonhag 4 caengz ndeu, doengh laeuz lauxsae youq 3 caengz ndeu, doengh laeuzgwnngaiz hagseng 3 caengz ndeu. Gaenh bi daeuj, hagdangz banhhag diuzgen ndaej mbouj- duenh gaijndei. Dangqnaj, hag- dangz moix aen gyausiz cungj cang dohmeizdij sonhag sezbei caemhcaiq ciep vangjloz.

Lai bi daeuj, aen hagdangz neix genhciz gij lohnaemj guhhong couhdwg“damqra、gaijndei、daezswng”, daengxcungq gyau cizgungh roengzrengz haenqguh、laemxsim aeu cinbu, nyinhcaen guhhong, gyaez son maij gyauq, sawj hagdangz baenz aen hagdangz lajmbanj“yaufungh ndei、cizlieng ndei、mingzdaeuz ndei”.

Ndaw hagdangz daegsaek noengznwd

Byaij haeuj douhung Banz- yangz Siujyoz, couh raen doengh laeuzsonhag doiqnaj de baihgwnz miz song hangz saw(hangz gwnz Sawcuengh, hangz laj Sawgun), couhdwg“aeu Cuengh guhcawj, Cuengh Gun giethab, aeu Cuengh coi Gun, Cuengh Gun cungj rox”. Byaij daengz gyawj laeuzsonhag, gicej raen gij cangsiengq henzciengz hix gig miz daegsaek, gwnz cien diep saeulajroq nem ciengz lajroq de diep miz gij singmeh、yinhmeh Sawcuengh. Aeu song saw vah sonhag guh cawjdaez, gij cangsiengq neix cauh baenz le aen fwnveiz song saw vah sonhag.

Byaij haeuj ndaw gyausiz, gicej raen moix aen gyausiz cungj miz daegdiemj, gak aen gyausiz gwnz ciengz cungj anbaiz lai gaiq dieg guh hozdung, gak gaiq dieg cungj sij miz neiyungz mbouj doengz gaiqwnq, neix cauh le hagsib fwnveiz gig ndei.

Boux yaucangj aen hagdangz neix Lij Sauvanj naeuz：“Hagdangz ngamq caepbaenz ciengzhumx nem vwnva cangzlangz, dangqnaj dou cungfaen leihyungh gencuz ndaw hagdangz, youq gak giz coq cawjdaez neiyungz mbouj doengz, doenggvaq gingjdenj ndaw hagdangz daeuj baijok gij naemjfap banhhag nem daegsaek vwnzva, hawj hagseng yawj nanz couh geiq haeuj sim gag rox hengz ndei.”

Daezsang lauxsae suijbingz cingzcik yienhda

Aen hagdangz neix yawjnaek beizyangj bang lauxsae suciz gig ndei ndeu, gujli lauxsae camgya yozliz daezswng beizyin. Yawjnaek hongsaeh vih lauxsae laeb vanz- ging soengset nem raeujsim, hawj gyoengqde ndaej lai ndei guhhong nem hagsib, vih lauxsae laeb aen bingzdaiz gag fazcanj. Yawjnaek hongsaeh ra raen gij youhdenj lauxsae, gikfat lauxsae haiok dungxcaiz, vixyinx lauxsae gaem- dawz gihvei, caemhcaiq doenggvaq yienhciengz yawj godangz sonhag, sawj lauxsae doxbeij doxgyaep aeu baenaj ndaej hwngfat. Moix haggeiz guh hozdung doxdax sonhag, cienzmienh daezsang gyauyuz、sonhag cizlieng. Gaenh geij bi neix daeuj, lauxsae sij lunvwnz ndaej swngj(swcigih) gaep ciengj 4 bien, si gaep ciengj 5 bien, yienh gaep ciengj 20 bien. Lauxsae ndaej gij mingzdaeuz ndei swcigih gaep miz 2 vunzbaez, yienh gaep 18 vunzbaez.

Beizyangj hagseng dwz- cangz banhfap lai

Cawzliux bingzciengz sonhag, aen hagdangz neix moix haggeiz leihyungh ngoenzciet hung guh buek vwnzdij hozdung ndeu, lij gingciengz miz anbaiz dwk gawjbanh sijsaw doxdax、vehveh nem suhfaz doxdax、bauqfwngzcau sezgi doxdax、diuqcag doxdax、yienjgangj doxdax daengj hoz- dung. Aen godangz daihngeih hozdung lai cungj lai yiengh, gig mizyinx, neix hawj hagseng lai maij hag, beizyangj gyoengqde hwngfat dwzcangz, hawj hagseng maj ndei, hawj gyoengqde yienh’ok dungxcaiz. Gaenh geij bi neix, hagseng camgya gak gaep gohmuz cihsiz doxdax couh miz 48 vunz ndaej ciengj, neix hawj hagdangz mingz ndei riuz ndawbiengz.

2008 nienz daengz 2012 nienz, hagdangz laebdaeb ndaej Swciyen Yinzminz Cwngfuj hawj aen cwngheuh“aen hagdangz bingzciengz guenjleix maenh- ndei”, doengzseiz ndaej Swciyen Gyauyuzgiz hawj aen cwngheuh“aen hagdangz sonhag cizlieng maenhndei”.