Vunz baez haeuj geq, couh bienq doekcaw.

Mwh gou dayoz bizyez faenboiq daengz danhvei, raen daengx hongh cungj dwg cozgyah、yisuzgyah. Gyoengqde faenzcieng sij ndaej ndei, dozveh raiz ndaej baenz, bouxboux daekeiq foedfoed. Yaepyet gou hix daengz cungnienz, gyoengqde boux riengz boux duiyouh lo. Lumjbaenz caengz gvaq geijlai nanz, byoemgyaeuj bouxboux cungj hausak liux, mbangj boux daemx dwngx, mbangj boux naengh eijloek, gij yienghsiengq bihaenx mbouj raen lo. Miz mbangj vunz gaenq gvaqseiq.

Vunz baez haeuj geq couh hawj bouxwnq causim. Lumjbaenz bohmeh gou. Gyoenqgde cungj caetcib lai bi lo, ranzyouq liz ndawsingz cib geij goengleix. Dou beixnuengx seiq vunz, bingzseiz daengz ngoenzsinggeiz cij ndaej dauqbae. Daxboh yinx doegsaw, haet daengz haemh caenh goq yawj saw, hongranz cungj dwg daxmeh gag guh, cawx byaek cawj haeux cungj bau liux. Hoeng daj bineix nienzco gvaqdaeuj, dinfwngz daxmeh hainduj mbouj lingzvued lo, gij hong cawj byaek cawj haeux haenx cungj camhseiz hawj daegsam、bawxsam caeuq gyoengqde caemhyouq haenx daeuj guh.

Gou couh naemj, dwg mbouj dwg cingj boux baujmuj he daeuj ciuqleix gyoengqde ne. Hoeng daxboh naeuz mbouj yungh, gyoengqde lij ndaej swhgeij ciuqgoq swhgeij.

Hoeng bouxvunz baez baenzgeq, cungj miz ngoenz he doenghdanh mbouj ndaej. Lijmiz, danghnaeuz songde doxriengz gvaqseiq, byawz daeuj ciuqgoq daxboh roxnaeuz daxmeh caengz gvaqseiq haenx?

Gij saeh neix, gaxgonq cungj mbouj naemj gvaq. Vunz daengz cungnienz, couh mbouj ndaej mbouj bae naemjngeix lo.

Lauheiq dwg naemj lai le, couh caen oksaeh lo.

Geij ngoenz gonq banringzgvaq haj diemj lai cung, dahnuengx daj dienhvah daeuj, naeuz daxmeh okdaeuj ra gou, cam gou raen de liux mboujcaengz? Gou naeuz mbouj law.

Gou gipmuengz buet daengz bakdou danhvei bae cam bouxhendou, bouxhendou hix naeuz mbouj raen.

Daxmeh dwg sam diemj lai ok dou. Daengz seizneix gaenq song diemj lai cung lo, ciuq dauhleix gaenq daeuj daengz lo. Caenh ndaej baenzneix gangj, daxmeh mbouj raen lo.

Bineix nienzco le, daxmeh baenz binghngawh, mbouj caeuq bouxwnq lwnhgoj gangjvah, byaij roen hix mbouj aiq baenz, geiq mbouj ndaej doenghgyiengh. Roengz laeuz byaijroen roxnaeuz cawx doxgaiq, miz geij baez cungj loeng loh ra mbouj daengz ranz.

Gou sikhaek dajdienh hawj daegnuengx dahnuengx, heuh caezgya bae ra. Daegngeih dwg gingjcaz, de sikhaek doengbauq geij aen baijcujsoj henznden, heuh gyoengqde bang ra, roxnaeuz haeujsim haemhneix miz mbouj miz vunz bauqanq naeuz bouxgeq ndaw ranz mbouj raen.

Gwn song sam gaemz haeuxcaeuz le, gou caeuq mehyah hai ci riengz diuzroen bohmeh gingciengz naengh ci gvaq haenx bae ra. Seizhaenx gaenq haeujhaemh, dauqcawq daeng ronghsagsag, vunz lai vunz daih. Gou mbouj rox hai ci, dwg mehyah hai ci. Lwgda dou cungj cimyawj song mbiengj loh. De yawj mbiengjswix, gou yawj baihgvaz. Hoeng aen ngaeuz daxmeh youq gyawz ne?

Ra daxmeh, ndaw sim cungj mbouj cwxcaix. Bohmeh ra lwgnyez raen lai lo, lwgnyez ra bohmeh cix mboujraen geijlai baez. Gaxgonq aenvih dahlwg cuengqhag dauqma menh le gou youheiq dwk bae ra gvaq, you de ngaiz vunz dawz bae gai roxnaeuz ngaiz bouxyak haephangz. Mbouj you daxmeh gijneix, couh lau de deng sieng ngaiz nanh.

Liuh mbouj daengz dwg aen bouhfaenh ciuhvunz he.

Gij saeh liuh mbouj daengz haenx miz lai cungj lai yiengh.

Cungj liuh mbouj daengz lawz cungj gag miz leixyouz, hix dwglau raixcaix. Bouxnaemj youq seizhaenx cungj cingznyienh dawz gij saeh siengj daengz ceiq yakrwix, baenzneix mboujdanh ndaej engq ndei bae wngqdoiq, mwh cencingq miz saeh swhgeij hix mbouj lau, seizhaenx, ceiq niem、ceiq you haenx couh dwg vunzcaen lo. Ndigah gou youq gwnz roen cimh daxmeh, youh simgaenj youh dwglau, nyapnyuk dangqmaz.

Daxmeh, seizneix mwngz youq gizlawz? Mwngz dwg mbouj dwg aenvih ra mbouj raen gou nyapnyuk raixcaix? Roxnaeuz aenvih mbouj rox roen dauqranz cix dwglau raixcaix ne?

Baeznduj ra daxmeh, couh baenzneix nauhsim.

Sawqmwh baez naemj, ndaw ciuh daxmeh ginglig gvaq geijlai baez cimhra ha!

Gou raen gvaq daxmeh baenzlaenz bae cimhra geij baez gvaq.

Mwh youq ranzmbanj doeg siujyoz, miz ngoenz he banringz, haujlai nanz mbouj raen daegngeih dauqranz. Cigdaengz banringzgvaq liz seiz hwnjdangz lij ca buenq diemj cung, daxmeh gip lo, sikhaek heuh gou caeuq de bae cimh.

Ranz gou youq ndawhag. Henznden miz diuz rij he cawzhah cij miz raemx. Binaengz ndwencaet, mbouj rox ngoenzlawz couh doek fwnraq, ngoenzlaeng raemxhoemz couh rim mieng. Mbouj geij nanz, raemx cengh lo, duzbya hix daeuj lo, gyoengqdou couh daengz gizdieg mieng gvangq raemx laeg haenx bae youz raemx ep bya. Ngoenz haenx, daxmeh daiq gou, doq byaij doq cam gou: Daegngeih dwg mbouj dwg youz raemx ngaiz dumh dai la? Sou bingzseiz maij youq gyawz youz raemx?

Gou couh cigsoh daiq daxmeh daengz gizdieg dou gingciengz youz raemx haenx. Diuzmieng youq gizhaenx utvan, ndigah raemx laeg、mieng gvangq、raemxlae hix haenq. Ndwn youq gwnz hamq, raen raemx sawdikdik, yawj mbouj raen daej, lij miz raemxgeujgaeq dem. Daxmeh naeuz, gou mbouj rox youz raemx, mwngz roengzbae vax ba. (1)

人一老，就变得可怜。

我大学毕业分配到单位时，见满院子都是作家、艺术家。他们意气风发，满腹经纶，各领风骚。转眼我人到中年，他们纷纷退休了。似乎转眼的功夫，个个白发苍苍，有拄拐棍的，有坐轮椅的，全然不见当年的风姿。有的甚至乘鹤西归，作古了。

人一老就让人操心。比如我父母。他们都七十多岁了，家住市郊十多公里处。我们兄妹四人，平时只有周末才能回去。父亲是书呆子，一天到晚只顾读书，母亲只好操持家务，买菜煮饭菜一人包了。但自今年初以来，母亲手脚就开始不太灵便了，煮饭菜的活都由暂时跟他们住的三弟、三弟媳做了。

我就想，是不是请个保姆，帮助他们打理生活。可父亲说不用，他们还能自己照顾自己。

但人毕竟老了。他们总有动弹不了的那一天。还有，他们将无法避免地相继离世。那么，谁来照顾最后的父亲或母亲？

这些事情，以前是不会考虑的。人到中年，就不得不瞻前顾后了。

也许是想多了，事情真的发生了。

前些天一个下午五点多钟，妹妹打来电话，说母亲出来找我，问我她在不在我这里？我说不在。

我连忙跑到大门问门卫，门卫说没见着。

母亲是三点多出门的。至今已有两个多小时，按理已经到达。这只能说明，母亲失踪了。

今年初开始，母亲出现了老年痴呆症的症状。不与人交流说话，行动迟缓，容易健忘。下楼散步或买东西，好几次都迷路找不着家。

我立即给弟妹打电话，发动大家找。二弟是警察，他立即给附近的几个派出所通报，帮助寻找。或留意今晚是否出现老人失踪的报案。

匆匆吃过晚饭，我和妻子开着车沿着平常父母外出乘坐的公车线路寻找。那时夜幕已经降临，到处灯火灿烂，人影憧憧。我不会开车，是妻子开车。我们的眼睛一直注视着两旁的人行道。她负责看左边，我负责看右边。可哪里是母亲的身影啊？

寻找母亲，这样的感觉怪怪的。相信大多数家庭，在正常情况下，只有父母寻找孩子的份，没有孩子寻找父母的。我就曾因为孩子放学迟归而惊恐万状地去寻找过。担心她被拐或被歹人所欺。母亲不用担心这一点，就担心有什么闪失而造成不幸。

意外是人生的一部分。

对于意外的发生，可以作出多种设想。

任何一种设想都是有理由成立的，都是可怕的。作为设想者，在那种特定的时刻，总愿意把事情往最坏处想，这不仅仅是为了更好地应对意外，为意外做好各种思想准备，更是出于对处于危机中的亲人的思念、担心、牵挂。所以，我在寻找母亲的路上，总被各种设想带来的焦虑和恐慌充斥着，压制着，难以开怀。

母亲，此刻你在哪里？你是不是因为找不到我而焦躁不安？或是因为迷失了返家的路而恐慌不已呢？

寻找母亲，第一次这样的经历实在闹心。

忽而一想，而作为母亲，一生当中则要经历多少次寻找的折腾啊！

我亲历过母亲那几次惊心动魄的寻找。

在老家读小学的时候，有一天中午，久久不见二弟回家。直到下午离上课时间还差半个小时，母亲急了，立即叫上我跟她去寻找。

我们住在小学校园里。附近有一条季节性的小溪流。每年七月份，不知哪一天突然来了一场电闪雷鸣的暴雨，第二天，水沟里就长满了浑浊的溪水。不久，水清了，鱼也来了，我们就到水面宽、水底深的地方游泳、钓鱼。那天，母亲带着我，边走边问我：二弟是不是游水被淹了？你们平时喜欢在哪游水？

我就直径把母亲带到我们常常游水的地方。那个地方的水沟有一个拐弯，所以水深，水面宽，水流也急。站在岸边，看见水面清得泛绿，但漩涡涟涟，深不见底。母亲说，我不会游水，你下去捞吧。 （一）