Gaenh bi daeuj, Denzlinz Yen ok banhfap gig miz yungh, haenq- rengz guh ndei hong doidoengh ndawbiengz henhoh nem swnjcienz vwnzva Heiqcuengh dangdieg (lauxhangz heuhguh Heiqcuengh baihbaek).

It dwg son’gyauq lwgnyez, dawz vwnzva Heiqcuengh yinxhaeuj goqdangz cunghyoz、siujyoz. Aen yienh neix lai fuengmienh haeuj- laeg guh hong dawz feihvuzciz vwnzva yizcanj yinxhaeuj hagdangz, dawz vwnzva Heiqcuengh yinxhaeuj goqdangz, cingj bang lauxhangz Heiqcuengh haeuj hagdangz son- gyauq hagseng. Dangqnaj, aen yienh neix Lozlij Cin Cungsim Yau、Lucwngz Yauzcuz Yangh Cungsim Yau、Denzlinz Gaugaep Cunghyoz daengj hagdangz hai ban son’gyauq Heiqcuengh, guh ndaej haemq hoengh.

Ngeih dwg roengzrengz coengh lajmbanj hwngfat Heiqcuengh, bangfuz ndawbiengz doenghgij duenz Heiqcuengh yezyiz ndaej hwngfat bienq ak. Dangqnaj, daengx yienh laeb miz yanghcin cunghab vwnzvacan 14 aen, daizheiq minzcuz 60 lai aen, haemq ndei dwk hawj doenghgij duenz Heiqcuengh yezyiz miz gizdieg lienh nem yienj cezmuz. Linghvaih, aen yienh neix lij haeujcoengh nem dazyinx gak aen duenz Heiqcuengh yezyiz liebcunz doxgyau yienjok. Daj bi 2007 daeuj, Denzlinz Yenveij、Yienh Cwngfuj gonqlaeng cujciz gawjbanh 9 baez Heiqcuengh baijyienj gveihmoz gig hung, dandan 2015 nienz Ciet- heiqcuengh“Haeujgamj”, daengx yienh couh miz 78 aen heiqduenz camgya. Dangqnaj, daengx yienh gij duenz Heiqcuengh yezyiz de hwngfat daengz 90 lai aen, yezyiz yenjyenz 3500 lai vunz.

Sam dwg haenqrengz ok saw, roengzrengz vatgud cingjleix vwnzva Heiqcuengh. Gaenh bi daeuj, aen yienh neix cujciz haujlai vunz、doenghyiengh nem roengz cienzngaenz vatgud vwnzva Heiq- cuengh, biensij le saw《Sawson Heiqcuengh Baihbaek Gvangjsih》《Cezmuz Maenhndei Heiqcuengh Baihbaek》《Saw Comz Heiqcuengh Cungguek》(gienj Denzlinz gwnz、gyang、laj) daengj. Neix comz ndei swhliu hawj vunz daihlaeng engq ndei yenzgiu hagsib vwnzva Heiqcuengh.

(Banh Sauginh/潘少君)