Denzyangz Yen Nazboh Cin Bakfung Cungsim Siujyoz laeb youq 1743 nienz, daengz bineix gaenq miz 272 bi nanz lo. Aen hagdangz neix dieg youq baihnamz Denzyangz Yen ndaw Nazboh Cin Mbanjbakfung, liz yienhsingz 25 goengleix. Seizneix, aen hagdangz neix miz 6 aen nienzgaep 13 aen ban, gungh miz 589 boux hagseng; lauxsae nem cizgungh 30 vunz, ndawde lauxsae 28 vunz, bouxguenjleix boux ndeu, boux- houginz boux ndeu, gyoengq lauxsae de 12 boux dwg lauxsae gaugaep, lauxsae hozgwz caez. Lai bi daeuj, aen hagdangz neix gaenxmaenx cauh vwnzva minzcuz noengzna, aeu sim doxgyau gvensim lwgnyez louz mbanj, sonhag cingzcik yienhda ndaej haenhndei.

Cauh vwnzva minzcuz noengzna

Byaij haeuj ndaw hagdangz neix, diuz cangzlangz vwnzva minzcuz miz 40 mij raez de gig yienhda, ndawde miz doz miz saw, gig ndei dwk lwnhgangj le Bouxcuengh gij lizsij gyaeraez、fungsug sibgvenq、vah saw daengj. Ndawde vahbaihnaj baenzneix sij: Bakfung Cungsim Siujyoz dwg Denzyangz Yen aen hagdangz ceiq gonq guh Cuengh Gun song saw vah sonhag ndeu, miz goekdaej minzcuz vwnzva gyauyuz haemq laeg; dingzlai hagseng dwg vunz Bouxcuengh dangdieg, aen hagdangz neix daj banyouwz hainduj guh Cuengh Gun song saw vah sonhag; bingzciengz cungj guh minzcuz vwnzva gyauyuz, hawj hagseng roxyiuj lizsij、vwnzva、sibgvenq bonj minzcuz; gyoengq lauxsae de miz roek boux dwg Sawcuengh conhyez bizyez, doengh- boux lauxsae hwnjdangz cienzbouh ginggvaq swcigih gaep minzcuz vwnzva gyauyuz beizyin, guh ndaej guh ndei hong minzcuz vwnzva gyauyuz.

Aen hagdangz neix doenggvaq vwnzva cangzlangz、denswj yenjsibinz daengj senhconz gij cihsiz vwnzva minzcuz nem gij yiyi minzcuz doxgiet, cauhguh aen fwnveiz ndei “bingzdaengj、doxgiet、doxcoengh、huzndei”. Youq bingzciengz guh sonhag, aen hagdangz neix anbaiz goqdangz son’gyauq minzcuz dox- giet, bauj hwnj gaeuq hwnj ndei goqdangz minzcuz doxgiet, doengz- seiz youq hwnj yijvwnz nem goqdangz wnq seizde cabhaeuj minzcuz gyauyuz, lij yungh seiz hai banhvei、duivei, seiz guh yizsi swnggeiz de guh minzcuz doxgiet gyauyuz.

Ciuq gij daegdiemj hagseng, hwnj ndei goqdangz minzcuz gyauyuz. Goqdangz yungh gij sawson nem yaemsiengq dwg daengx guek doengjit yungh de, moix boux hagseng cungj miz《Cangzsiz Minzcuz》nem《Ranzhung Cunghvaz》, leihyungh sawson dajyinx hagseng rox vwnzva lizsij minzcuz, beizyangj hagseng gag miz saenqsim.

Baenz swcigih Cuengh Gun song saw vah saedniemh yozyau le, aen hagdangz neix gaenxmaenx guh buek hozdung“swnjcienz dijyuz nem yisuz minzcuz”, leihyungh goqdangz dijyuz sonhag fouxfaexsaux、dwkdomq、haizgieg beij vaiq、dik lwggienq、diuq foux minzcuz daengj, doenggvaq guh gij hozdung neix, hawj hagseng saedceij lai fungfouq, hawj vwnzva minzcuz ndaw hagdangz gyalai neiyungz.

Aeu sim doxgyau gvensim lwgnyez louz mbanj

Ndaw hagdangz neix 589 boux hagseng, ndawde 471 boux ninz ndaw hagdangz. Seizneix vunzgoeng lajmbanj okrog ra hong gyalai, lwgnyez louz mbanj gyalai. Aen hagdangz neix gig gvensim gyoengq nyez louz mbanj. Youq ndaw hagdangz, lauxsae gingciengz caeuq gyoengq nyez louz mbanj gangjgoj gyausim, caemhcaiq son gyoengqde aeu doxgiet doxcoengh, doxgyaez doxhaeuj, hawj gyoengqde dawz hagdangz dangguh aen ranz hung, hagdangz dangguh ranz. Son gyoengqde aeu rox gag haenqrengz gag bienq ak, gaenxmaenx cinbu, gag rox swnghhoz, gag rox haenq hag, couhcinj mbouj miz bohmeh youq gyawj hix mbouj gag yawjsiuj. Moix aen haggeiz fat cienzngaenz bangbouj le, aen hagdangz neix anbaiz hawj gyoengq nyez louz mbanj gonq. Aen hagdangz neix lij lienzhaeh ndawbiengz gij donzdij roxnaeuz danhvei gien cienz gien doxgaiq, coengh gyoengq nyez louz mbanj nem hagseng ranz gungzhoj. Youq baihrog hagdangz, lauxsae hix gvensim gyoengq nyez louz mbanj, hagseng yaek bae ranz, lauxsae daengq aeu haeujsim ancienz vwndiz, couhmoz hagseng dauq daengz ranz, hawj hagseng geiqmaenh denva lauxsae, danghnaeuz miz saeh le seizlawz cungj ndaej dwk hawj lauxsae. Aen hagdangz neix yienghneix guh le, bohmeh hagseng haenhndei raix- caix.

Son hag caemh ndei, cingzcik yienhda ndaej haenhndei

Aen hagdangz neix genhciz baengh gohyenz hwnghoengh, okmoq hwngfat, lauxsae gaenxmaenx sij lunvwnz, ndawde miz haujlai bien ndaej guekgya、swngj(swcigih)、si gaep it、ngeih、sam daengj ciengj.

Aen hagdangz neix caezcienz bingzciengz guenjleix, lingjdauj nem lauxsae okmoq naemjfap, doxgiet haenqguh, ceng aeu cinbu, guenjleix suijbingz nem hagseng cunghab suciz mboujduenh daezsang. Aen hagdangz neix bouxboux gaenxmaenx haenq- guh, ndaej baihgwnz nem ndawbiengz gak gyaiq haenhndei. 2006 nienz ndaej bingzguh si gaep vwnzmingz danhvei. 2009 daengz 2014 nienz laebdaeb 6 bi ndaej bingzguh ndaw cin senhcin danhvei. 2014 nienz boux hagseng Liuz Yingjcauh camgya Denzyangz Yen aeu Vahcuengh byauhcunj gangj goj- gaeq doxdax, aenndaej daeg- daengjciengj, de daibyauj Denzyangz Yen camgya daengx gih aeu Vahcuengh byauhcunj gangj gojgaeq doxdax, aeundaej samdaengjciengj, aen hagdangz neix ndaej cujciz daegbiedciengj.