7 nyied 14 hauh, Sanglinz Yen Cinhih Yauzcuz Yangh gawjbanh bi 2015 “ciet daxnuj” hozdung, baez hozdung neix faenbied youq yangh cwngfuj caeuq Mbanjbaizbah gawj- hengz. Binaengz liggaeuq ngoenz ngux nyied ngeihcib gouj dwg “ciet daxnuj” Yauzcuz, hix heuhguh “ciet mehcoj”, dwg aen ciet conzdungj Yauzcuz ndawbiengz ceiq hung- hoengh ndeu.

Hozdung dwg dangngoenz banhaet 9 diemj cung hainduj, gyoengq hekyouz、 meizdij gicej caeuq vunzmbanj henzgyawj daj seiq fueng bet baih daeuj haenx comz youq gizneix, bingzseiz aen Yauz- yangh caemdingh neix seizneix yaepyet couh nauhyied hwnjdaeuj, gyoengq beixnuengx Yauzyangh yungh cungj daegbied minzsuz fungcingz caeuq ndatcingz neix daeuj daih hek. Ngoenz ciet, gawjbanh le baenzdauq Yauzcuz minzsuz daegsaek hozdung: Gyangnaz gaeb bya、 gengx hongx duzbit、gaeq doxdoj、 mou buet doxdax、 caen- ndang bae sawq Yauzcai ciepyah caeuq “hwnj byacax、 roengz haijfeiz、 caij daeng’va” daengj . Hawj fanh lai boux hekyouz mbouj nyienh biek bae, caenndang cimz ndaej baez minzsuz funghcingz Yauzyangh naekna ndeu.

Banhaet 9 diemj cung, cawj- hoihciengz laeb youq aen yangh neix Gaicinmaj haenx gyonglaz gyukruru, foux saeceij, gij vwnzyi Yauzcuz fungcingz yenzswnghdai minzcuz daegsaek rimrad naekna hainduj yienj. Aen cezmuz 《Cien Duzlingz Caj Gyong》 youz Cinhih Yauzcuz Yangh Cinmaj Heiqduenz gag bien gag yienj haenx，hawj bouxyawj yawj dwk lwgda cungj mbouj yaep，yienh’ok yauzcuz beksingq siengj- muengh saedceij vuenyungz、 ndiep- gyaez saedceij gyaeundei.

Youq gaiq naz caeng rim raemx ndeu, ndawde cuengq miz bak lai duz bya’ndoek, aen sauq baez yiengj, gyoengq beixnuengx Yauzcuz hainduj doxdax gaeb bya, bouxyawj humx youq henz naz, mboujseiz vih beixnuengx Yauzcuz gaeb ndaej bya haenx bekfwngz angq hemq. Youq gaeq doxdoj yienhciengz, bouxyawj yawj dwk da cungj mbouj yaep. Youq Cinhih Yauzcuz Yangh Cwngfuj gvangjcangz, gij byaujyenj “hwnj byacax、 roengz haijfeiz” ndei yawj raixcaix. Gyang gvangjcangz daengj diuz faex sang 8 mij ndeu, diuz faex cap miz 33 fag caxraeh, boux canghheiq he ginggvaq baiqsax le, lohdin dwk benz hwnj diuz faex cap miz fagcax bae, cix doq boq yiengj gaeuvaiz, dawz dangz vanq hawj vunzlai seiqhenz cimz, yienghneix dwg naeuz hawj fukheiq hawj vunzlai. “Roengz haijfeiz” dwg dangdieg beixnuengx Yauzcuz lohdin caij gvaq gij danq ndat bae, yienghneix dwg naeuz ndaej baujyouh swnh raemx swnh rumz, daengx ranz vunz ndang cangq.

Ceiq yinx dwg gij Yauzcai ciepyah youz Cinhih Yauzcuz Yangh Goyauzsanh Yisuzdonz yienj miz Yauzcuz fungcingz noengznwd haenx, ciengzmienh nauhyied dangq- maz. Youq ciepyah baenzgya aen yizsi neix, aeu caen gvanbaz daeuj yienj, ciuq Yauzcuz baenzgya conzdungj bae guh, dawz gij ciepyah baenzgya yizsi neix hawj vunzlai yawj.

Ngoenzciet dangngoenz, Cinhih Yauzcuz Yangh gwnz gai lij baij ok gak cungj gak yiengh dwzcanj、 minzcuz gunghyibinj caeuq gijgwn ndei. Ndawde, daihgya ceiq maij vagimngaenz. Eu fwen ciep hek、 aeu laeuj gingq hek, aeu vanj gwn laeuj、 gwn gaiq noh hung, dwg fungsug conzdungj Yauzcuz. Gij “ngaiz bak ranz” laeb youq Mbanjbaizbah haenx, yienh’ok gij ndatcingz gyaez hek Yauzcuz, youq gwnz daizlaeuj Yauzcuz gak cungj gak yiengh gijgwn haenx yawj hwnjdaeuj hawj vunz ndwnj myaiz gyoeggyoeg.

Cinhih Yauzcuz Yangh vwnzva goekdaej naekna, miz aen cwngheuh ndei“aen yangh vwnzdij”. 《Go Angq Ranzyauz》、 《Cien Duzlingz Caj Gyong》 raek rim Yauzcuz fungcingz noengznwd， 《Daxnuj》、 《Angqhoh Demsou》 caeuq 《Gyong Lingz Gyaez Souhgyongj》 daengj lai aen cezmuz ndaej camgya ndaw guek、 ndaw gih、 si yienh byaujyenj gvaq, caemhcaiq ndaej haujlai baez ciengj , youq rog gih ndaw gih cungj okmingz.