7 nyied 7 hauh daengz 11 hauh, Swcigih Minzyijveij fucujyin Yangz Gijbyauh daiq ndaw gihgvanh Minzcuz Yijvwnz Fanhyizcu nem Yingyungcu mbangj vunz bae Baksaek Si Nazboh、Cingsih、Dwzbauj nem Denzyangz daengj yienh diuyenz gij cingzgvang gvendaengz fanhoiz nem book gvangjbo denyingj densi vah saw minzcuz caeuq ndawbiengz sawj- yungh vah saw minzcuz. Baez hozdung neix doenggvaq hai codanzvei nem daengz dieg cazyawj song cungj fuengsik bae guh. 4 aen yienh neix minzyij nem gvangjden bumwnz lwnh le cingz- gvang mizgven.

Youq guh diuyenz codanz seizde, dingq le gak yienh lwnh cingzgvang, Yangz Gijbyauh nyinh- dingh gak yienh haenqrengz guh hong, doengzseiz vixok, hong fanhoiz nem book gvangjbo denyingj densi vah saw minzcuz bungz daengz hojnanz, baugvat vunz、cienzcaiz、doenghyiengh daengj, danhseih gaendwk bumwnz gyoebcomz nem guekgya、swcigih mizgven bumwnz yawjnaek, gij gungzhoj neix yaek cug mbaek ndaej gaijgez. Gij lanzmuz vah minzcuz aeu lai gyahaeuj vah saw minzcuz; gij lanzmuz sinhvwnz vah saw minzcuz aeu lai book minzswngh. Yangz Gijbyauh lij giengzdiuh, aeu nyinhcaen gvancez lozsiz Swcigih Dangjveij、Swcigih Yinzminz Cwngfuj《Aen Fangh’an Saedhengz Gvendaengz Gvancez Lozsiz》, gyagiengz hawj gak dieg lai haenqrengz guh hong senhconz、hezdiuz nem genhduz hongsaeh yungh vah saw minzcuz.

(Liuz Yizningz/刘瑜宁)