Vujmingz Yen Senhhuz Cin Cunghgyauz Siujyoz laemxsim ciuq aen fungcim “aeu Cuengh guhcawj, Cuengh Gun giethab, aeu Cuengh coi Gun, Cuengh Gun cungj rox” bae hengzguh, cauxguh aen fwnveiz noengznwd sonhag Cuengh Gun song saw vah, lienzdaemh aeundaej cingz- cik yienhda.

Cunghgyauz Siujyoz youq 1933 nienz laebbaenz, dieg dep cin cwngfuj. Hagdangz faenbouh hableix、vanzging gyaeundei, ciemq dieg 8256 bingzfanghmij, seizneix miz 16 aen ban, siujyozbu miz 583 boux hagseng, yozcenzbanh miz 105 vunz. Ndaw hagdangz miz bang lauxsae binjdwz ndei、son’gyauq ak、cozfungh ndei ndeu, gungh miz 39 boux lauxsae, ndawde siujyoz gaugaep lauxsae 33 boux, Nanzningz Si sonhag guzgan 5 boux, cungj habgek caez.

Hagdangz haenqrengz laemxsim laebdaeb guh ndei hong Cuengh Gun song saw vah sonhag. It dwg boiq ndei lauxsae. Gaxgonq moix aen ban boux lauxsae ndeu, son Sawgun youh son Sawcuengh. Seizneix Sawcuengh nem Sawgun faenbied miz lauxsae son, ndaej bauj dangz Sawcuengh moix aen ban moix singgeiz swnhleih hwnj 3 dangz goq. Ngeih dwg cimhra nem doxyaeng fuengfap sonhag. Hagdangz yungh ngeih loih sawson, ciuq aen fuengfap “cihsaw—sawloih—gawq (coenz) —duenh—bien” bae songyauq, giethab Vah- cuengh dangdieg, aeu hagseng rox gangj rox sij, gangj sij lienh giethab, neix hawj goqdangz hoengh lo.

Vih bauj Sawcuengh sonhag cizlieng, hagdangz daj goek daengz byai guenj ndei Sawcuengh sonhag, daengz duenh cungqgyang haggeiz gyaudaujcu caeuq gyauyenz cujcangj cazyawj gij goqdangz、gyauan sezgi lauxsae nem cozyez hagseng; haggeiz yaek sat gyaudaujcu comz vunz okdaez, youq yozcenzbanh、it daengz roek nienzgaep gauj goh Sawcuengh, dawz gaujsi gezgoj caeuq gyauyoz- ciengj lienzhaeh hwnjdaeuj, neix hawj lauxsae lai haenqrengz.

Hagdangz yawjnaek beizyangj song saw vah lauxsae, daezsang lauxsae ciennieb suijbingz. Hagdangz cawjdoengh cimhra nem daezhawj bingzdaiz hagsib, daihdamj ok loh- naemj moq. It dwg cizgiz cujciz gij vunz mizgven de camgya Cuengh Gun song saw vah hagdangz lingjdauj、lauxsae beizyinban nem sonhag yenzdauj hozdung. Ngeih dwg gujli lauxsae camgya Cuengh Gun song saw vah bwnjgoh hanzsou hagsib nem bak boux Cuengh Gun song saw vah lauxsae mizmingz beizyangj gungh- cwngz, gyawj song bi neix gungh soengq Banh Veilenz、Dwng Aiginz daengj cibsam boux lauxsae camgya Sawcuengh gya yozliz beizyinbanh, Banh Fanghlanz、Banh Bizminj daengj 5 boux lauxsae camgya lauxsae mizmingz beizyangj gungh- cwngz. Sam dwg gawjbanh yenzdauj doxgyau hozdung, moix haggeiz anbaiz guzgan lauxsae hwnj yijyinh Sawcuengh nem doeg saw sonhag yenzdaujgo, doenggvaq guzgan laux- sae sifan nem yinxlingx, daiqdoengh lauxsae daezsang sonhag suijbingz.

Hagdangz haenq ca vwnzva dijyuz gyauyuz, daegsaek yienhda. Lai bi daeuj, hagdangz cizgiz gawjbanh Sawcuengh caizyi baijyienj hozdung, hawj hagseng nem lauxsae ndaej baijyiengh swhgeij. Hagdangz moix bi cungj gawjbanh gangj gojgaeq Vahcuengh doxdax、sij faenzcieng Sawcuengh doxdax、doeg Sawcuengh doxdax daengj hozdung, dazyinx lauxsae nem hagseng hag Sawcuengh maij Sawcuengh. Hagdangz soengq senjsouj bae camgya ndaw swcigih、yienh Cuengh Gun song saw vah hagdangz caizyi doxdax、gangj gojgaeq Vahcuengh doxdax, cungj aeundaej cingzcik ndei.

Hagdangz lij cizgiz haifat minzcuz conzdungj dijyuz hangh- moeg, caemhcaiq dangguh hong youqgaenj daeuj guh, lumjnaeuz fouxfaexsaux、dik lwggienq、ringx gvaengzdiet、haizgieg raez daengj, cungfaen leihyungh duenh dagogenh hozdung guh minzcuz conzdungj dijyuz hozdung, leihyungh seiz govai hozdung gyagiengz lienhguh.

Gaenh bi daeuj, hagdangz aeu minzcuz daegsaek guhdaeuz, genhciz baengh daegsaek hwng hagdangz, haenqrengz sawj sonhag gohyenz nem vwnzva dijyuz doxdaengh hwngfat. Bi’gvaq, hagdangz lauxsae nem hagseng cizgiz sij geiq gaujgen hawj《Gvangjsih Minzcuz Bau》, gungh miz 19 bien ndaej fatbiuj; 5 boux lauxsae sij lunvwnz Sawcuengh faenbied ndaej swcigih gaep it、ngeih、sam daengj ciengj.

Youq 2012 nienz daengx gih siujhagseng Vahcuengh byauhcunj caizyi doxdax ndawde, hagdangz doih’eufwen canghfwen iq Vangz Yajlanz、Banh Hungzyij nem Banh Yincwz 3 boux hagseng neix ndaej byaujyenj itdaengjciengj; youq daengx gih siujhagseng aeu Vah- cuengh byauhcunj gangj gojgaeq doxdax ndawde, Banh Swhyiz ndaej itdaengjciengj, Banh Hungzyij、Maj Cinglinz ndaej ngeihdaengjciengj. Caemh bi de 12 nyied youq Vujmingz Yen siujhagseng doeg govwnz doxdax ndawde, aen hagdangz neix 9 boux hagseng camgya, 4 boux ndaej itdaengjciengj, 5 boux ndaej ngeih- daengjciengj. Youq bi’gvaq 10 nyied daengx gih siujhagseng aeu Vahcuengh byauhcunj gangj gojgaeq doxdax ndawde, Canh Luningz ndaej itdaengjciengj. Youq bi’gvaq Vuj- mingz “sam nyied sam Bouxcuengh” eu fwen doxdax ndawde, Banh Hungzyij ndaej itdaengjciengj, Banh Swhgiz、Liengz Fanghyiz ndaej samdaengjciengj.