Lozyez Yen Sinhva Cin Cungsim Siujyoz gaemdawz gihvei, gyarengz guh Cuengh Gun song saw vah sonhag, aeundaej cingzcik haemq hung. Aen hagdangz neix guh hong sonhag Cuengh Gun song saw vah 30 lai bi daeuj, baengh baihgwnz cawjguenj bumwnz lingjdauj, doenggvaq daengx hagdangz lauxsae nem hagseng doengzcaez haenqguh, doenggvaq saedniemh、yenzgiu、caiq saedniemh、caiq yenzgiu, ndaej gingniemh, caemhcaiq cugmbaek caezcienz, mboujduenh doigvangq. Neix laeb giekdaej ndei hawj aen cin neix hagseng saujsu minzcuz hag Sawcuengh Vahcuengh caiq hag Sawgun Vahgun, hawj hagseng maij hag Sawcuengh Vahcuengh nem Sawgun Vahgun. Guh Cuengh Gun song saw vah sonhag gaxgonq, daengx hagdangz gungh miz 215 boux hagseng, seizneix gyalai daengz 800 lai boux. Gaenh bi daeuj, aen hagdangz neix laebdaeb ndaej mingzdaeuz ndei, 2011 nienz ndaej bingzguh Lozyez Yen cangzgveih gensez youhsiu danhvei, 2012 nienz ndaej bingzguh Bwzswz Si aen danhvei“bak aen cueng fuzvu ndei”, 2013 nienz ndaej bingzguh Lozyez Yen senhcin cizdij.

Sinhva Cin Cungsim Siujyoz laeb youq 1921 nienz, youq baihdoeng- namz Lozyez Yen, dieg youq henz Dahgyazlijhoz, gvihaeuj ranghdieg cin cwngfuj, liz yienhsingz 25 goeng- leix. Aen hagdangz neix ciemqdieg 7593.6 bingzfanghmij, gencuz menciz 8002 bingzfanghmij. Miz laeuzsonhag aen ndeu、laeuzcunghab sonhag 2 aen、laeuzsuzse 2 aen、laeuz lauxsae youq aen ndeu、laeuz fandangz hagseng aen ndeu、laeuz hagseng gwnngaiz aen ndeu. Aen hagdangz neix it daengz roek nienzgaep gungh 17 aen ban, seizneix miz hagseng 841 vunz, ndawde hagseng Bouxcuengh 530 boux, Bouxgun 318 boux, Yauzcuz 10 boux. Dangdieg lwgnyez hab haeuj hagdangz cungj haeuj caez. Miz 625 boux hagseng youq ndaw hagdangz gwn ninz. Gungh miz gyaucizgungh 48 boux, ndawde lauxsae 44 boux, gunghyinz 3 boux, vunz hingzcwng boux ndeu. Lauxsae miz daconh yozliz doxhwnj 42 boux, cunghconh yozliz 2 boux, lauxsae hozgwz caez. Lai bi daeuj, aen hagdangz neix gaenxmaenx gaijbienq gyauyuz nem sonhag aeu lai habngamj gij daegdiemj hagseng dieg Bouxcuengh, baugvat daegdiemj minzcuz nem vahgangj, gaenxmaenx guh Cuengh Gun song saw vah sonhag, doidoengh gyauyuz sonhag cizlieng mboujduenh daezsang.

Sinhva Cin Cungsim Siujyoz guh Cuengh Gun song saw vah sonhag 30 lai bi daeuj, gak duenh cungj aeundaej cingzcik ndei. 1983 nienz 9 nyied daengz 1984 nienz 7 nyied, aen hagdangz neix youq ndaw ban saedniemh sonhag Cuengh Gun song saw vah ciuq aen fuengcim“aeu Cuengh guhcawj、Cuengh Gun giethab、aeu Cuengh coi Gun、Cuengh Gun cungj rox”bae hengz. Doenggvaq sonhag bi lai, youq song loih bangaep, bansaedniemh(sonhag Cuengh Gun song saw vah) nem banbujdungh, faenbied aeu Sawcuengh Sawgun caemh gauj faenh sigenj ndeu, liuxle bansaedniemh bingzyaenz(70.3 faen) sang gvaq banbujdungh(54.7 faen) 15.6 faen; gizgwzliz 89.5%, beij banbujdungh (62.4%) daihgaiq sang 27%; youhsiuliz 46.3%, beij banbuj- dungh (19.2%) hix daihgaiq sang 27%.

1984 nienz 9 nyied daengz 1988 nienz 7 nyied, aen hagdangz neix caenh’itbouh guh Cuengh Gun song saw vah sonhag. Baez daengz haggeiz doeksat guh gaujsi, aen hagdangz neix cungj dawz gij cingzcik song cungj bangaep (bansaedniemh nem banbuj- dungh) doxbeij, liuxle couh rox it daengz haj nienzgaep bansaedniemh gak cungj bijliz cungj sang gvaq banbujdungh. Ndawde, guh cuhgauj, bansaedniemh yijvwnz、suyoz cienz- bouh gizgwz, cienzbouh ndaej ndaw yienh minzcuz cunghyoz luzcij bae; hoeng banbujdungh yijvwnz、suyoz song goh neix lij miz mbangj mbouj gizgwz.

1988 nienz 9 nyied dauqlaeng, aen hagdangz neix vih sevei beiz- yangj le haujlai vunzcaiz youq gak hangznieb guh bouxdaeuz, ndaej ndawbiengz haenhndei.

Gaenh bi daeuj, aen hagdangz neix gaenxmaenx guh gyauyenz caemhcaiq camgya doxdax, aeundaej cingzcik yienhda. Dan 2013 nienz, lauxsae sij gyauyoz lunvwnz miz 44 bien ndaej swcigih、si gaep gyauyoz lunvwnz bingzbeijciengj, ndawde miz 15 bien ndaej fatbiuj; hagseng camgya gak cungj doxdax miz 108 vunzbaez ndaejciengj; bizyezbanh doengjit cwzci cingzcik baiz youq doengz loih hagdangz baihnaj. Gaenh bi, aen hagdangz neix guh aen si gaep godiz《Gij Diegvih Dwzyuz Gyauyuz Youq Ndaw Sonhag》ndaej ngeihdaengj- ciengj; yienh gaep godiz《Gagdingh、Doxboiq、Damqra》ndaej itdaengj- ciengj.

Ndei liux naemj aeu lai ndei dem, aen hagdangz neix laebdaeb naemjngeix gaijbienq、okmoq、hwng- fat, ciuqriengz gyauyuz fuengcim dangj raeuz, gyarengz guenj hagdangz, laemxsim ceng dawz hagdangz banh baenz daih’it gaep yanghcin cungsim siujyoz.