Seizhah mbwn ndat seizgan nanz, bouxlaux wngdang haeujsim re fatsa. Cawz haeujsim diuzleix gwnndoet le, ngoenz sam donq wng guh daengz gwn cit、noix manh、yungzheih siuvaq. Lai gwn di byaekheu caeuq lwgmak hamz veizswnghsu lai he. Engq youq- gaenj diemj ndeu dwg, ciengz gwn di dang fuengz hwngq cangq ndang ndeu haemq ndei.

Daih’it, ciengz gwn dang cehmbu. Cehmbu 20 gwz, haeux- lidlu caeuq haeuxgyaeujgaeq gak 10 gwz, raetmoegngaex hau duj ndeu(dwk raemx fat gvaq). Sien dwk cehmbu、haeuxlidlu、haeux- gyaeujgaeq caeuq youz roengz rek loq cauj yaep ndeu, caiq dwk raemx caeuq raetmoegngaex hau roengz itheij oemq cug. Gwn de ndaej nyinh yaem ciengx saenz、cawz ndat siu hwngq. Hab seizhah bouxlaux fanz ndat、ninz mbouj ndaek gwn.

Daihngeih, ciengz gwn dang maenzcienz. Aeu maenzcienz 100 gwz, dat naeng bae swiq seuq, caeuq 50 gwz noh ndoksaen mou ronq baenz sei, ndingq roengz dangnoh bae hai feiz coemh goenj, dwk gyu le gwn. Ndaej nyinh yaem bouj mak、cangq dungx dingz siq. Hab bouxlaux ndang hawnyieg、bouxlaux fanz ndat ninz mbouj ndaek、bouxlaux gwn bouj mbouj ndei gwn.

Daihsam, ciengz gwn dang haijdai. Aeu haijdai sauj 20 gwz, raemx cimq gawh le swiq seuq ronq baenz sei dwk raemx naengj yaep ndeu. Sien coemh dang ndoksaen goenj, caiq dwk haijdai roengz cawj naemz, dwk di meiq he diuz feih gwn. Ndaej bouj lwed、 bouj gai, daegbied doiq yawhfuengz bouxlaux hezyaz sang、bouxlaux souhyiengh doenghmeg giet ndongj、bouxlaux lauz ndaw ndang daiq lai caeuq bouxlaux ndok soeng ndok byoiq daengj bingh miz haemq ndei cozyung.

Daihseiq, ciengz gwn dang byaekaeuj. Aeu 15 gwz byaekaeuj (dwk raemx cimq gawh), 50 gwz raetdoeng, 100 gwz rangzngox. Sien ronq raetdoeng caeuq rangz- ngox baenz sei, doengzcaez dwk roengz raemxgoenj bae cawj, dwk youz、veicingh、laeujhaeux diuz feih gwn. Cungj dang neix yingzyangj gyaciz sang, gwn de ndaej siu hwngq bouj ndang. Ciengz gwn ndaej fuengz bouxlaux doenghmeg giet ndongj caeuq gamhanh hezyaz swng sang.

Daihhaj, ciengz gwn dang sanhcah. Aeu 30 gwz maksanhcah, 150 gwz ndoksej mou, hai feiz- numq aeuq cug, dwk gyu diuz feih le dwk di mbaw byaekginzcai he gwn. Ndaej siu hwngq vaq cwk、dingz siq, ndaej baujgen sai simlwed.

Daihroek, ciengz gwn dang naengmou. Aeu 250 gwz naeng- mou, 200 gwz makyungz. Sien swiq naengmou seuq ronq baenz gaiq, dwk di raemx he hai feiznumq aeuq baenz dang gwd, caiq dwk makyungz、coeng caeuq youzhom gwn. Ndaej nyinh yaem liengz lwed、ciengx daep siu hwngq gaij hozhawq.