Nazboh Yen Cwngzsiengh Cin Lungzvaz Cunh Mbanjdoenliz beix- nuengx Bouxucengh gaenxhong gvaigvet, youq gak gaep cwngfuj sonyinx bangcoengh lajde, vatcimh caeuq cienzyiengz vwnzva minzcuz maenhndei, cauxguh binjbaiz lijyouz, laebhwnj aensuen fungcingz minzcuz Bouxcuengh, gyamaenh caeuq catbae canggyaeu aen ranzcanx gaeuq, aeu benjrin bu roen ndaw mbanj, guh le aen ciengzdiuqfoux gvangqbingz ndeu, hwnj miz mbangj ranzhek gig miz daegsaek, banh hwnj le ranz- gwnngaiz miz feihhom minzcuz, cauxlaeb le lijyouz fuzvu cungsim, aeu baengzromj ndaem guh baenz gij doxgaiq lijyouz lai cungj lai yiengh haenx, hawj hom baengzromj riuz bae gyae, ciengxlwenx homrang.

Mbanjdoenliz dieg youq ndaw runghbya baihbaek yienhsingz Naz- boh, liz yienhsingz 14 goengleix gyae, miz 57 ranz 370 lai vunz, cienzbouh dwg Bouxcuengh. Diegyouq aenmbanj bya sang lueg laeg, cix mbouj ngamj vunz youq geijlai, hoeng vunzmbanj sim genq vunz ak, daih dem daih youq daengz seizneix, lij louzce miz gij sibgvenq fungsug gaeuqgeq sengcingz Bouxcuengh dangdieg. Vunzmbanj simsienh simsoh, hek daengz cix angq daih, fwen coux fwen soengq, hawj bouxhek sim’angq simsangj. Vunz- mbanj lij haengj daenj gij buhvaq baengzdoj aeu raemxromj nyumx dwk ndaemndwt haenx, daengz seizneix lij ngoenzngoenz nyumx baengz daemj- rok, baengh dinfwngz gaeuqgeq canggyaeu bonjfaenh caeuq vunzranz; gyoengqde singqcingz hailangh, saedceij lai cungj lai yiengh, saimbwk lauxnyaeq cungj rox eu fwen diuq foux, baez daengz ngoenzciet roxnaeuz hek daengz, ndaw mbanj sing fwen sing go goksasa, vunzlai angqyangz diuqfoux doenghyegyeg. Cawz gijneix le, ndaw mbanj lij swnjcienz gij fungsug gaeuqgeq cangqhaem、aeuyah haqlwg haenx, hawj vunzhek haeuj mbanj le engq roxnyinh miz cungj heiq gaeuqgeq gyaegiq laeglwd yinxvunz ndeu.

Vih gaijbienq yienghsiengq runghbya gungzndoq de, baijyienj ok gij fungcingz vwnzva minzcuz gaeuqgeq sengcingz neix youq baihnaj vunzbiengz bae, daj bi 2002 gvaqdaeuj, Nazboh Yenveij Yen Yinzminz Cwngfuj couh dajveh hwngfat hong lijyouz Mbanjdoenliz, caemhcaiq comz ngaenz henhoh ndei gij ranzcanx gaeuqgeq ndaw mbanj, vatcimh baujhoh gij vwnzva minzcuz Bouxcuengh ndaw mbanj, hawj yiengh mbanj louzce gij yiengh gaeuqgeq gaxgonq de, fuengsik gaeuqgeq gvaq saedceij vunzlai caemh ndaej louz- cienz roengzdaeuj, baenz aen mbanj fungcingz minzcuz lijyouz gyawjgyae mizmingz ndeu. Daj bi de gvaqdaeuj, ndaw mbanj gaenq gonqlaeng ciep- coux daihhek cibgeij fanh vunzbaez, lijyouz souhaeuj gyawj 2000 fanh maenz. Vunzmbanj caemh doenggvaq caeuq vunz rog bya doxgyau, bienq- baenz uk lingz fwngz riengj, mbangj hauxseng okrog dajgoeng, mbanj mehmbwk cix youq ranz daemjrok guh buhvaq baengzromj、aendomq、gaenhoz gai, souhaeuj bi beij bi lai, saedceij caemh yied gvaq yied vuenyungz.

Byaij haeuj Mbanjdoenliz, vunzhek ndaej caenndang daejniemh gij sibgvenq fungsug Bouxcuengh dangdieg、dinfwngz ndawbiengz caeuq gij yienjok daiq miz yiengh gaeuqgeq sengcingz doenghgij vwnzva minzcuz Bouxcuengh neix, dingq vunzmbanj eu fwen couxhek gingqlaeuj, lij ndaej caeuq lwgsau ndaw mbanj diuq foux guh’angq, caemh ndaej bae yawj nyumx baengzromj caeuq daemjrok, vanjlij ndaej caenfwngz bae muh haeuxyangz guh daeuhfouh dem, hawj bouxhek ndaej angqyangz yiengjsouh gij saedceij cwxcaih vuenyungz mbanjbya haenx.