Bi 2015 hawyw Cungguek·Cing- sih youq ngoenz 6 nyied 20 hauh haihaw, yenveij fusuhgi Yangz Sicoz guh ciswz.

Haihaw ngoenzde, ndaw haw baijgai goyw ndaw doengh ndaw lueg lairaeuh. Gak dieg canghbuenqyw foenfoen daeuj genj cawx. Ndaw haw miz canghbuenqyw caeuq giyez gai yw 350 lai gya, miz 5 fanh lai vunz(baez) camgya, 2000 lai aen dan baij gai yw, caemhcaiq baez daih’it yinx Yinghgoz、Majlaizsihya、Menj- den、Genjbujcai、Laujvoh daengj guekgya yihyozgai lingjdauj nem conhgyah daeuj camhaeuj ndawde bae dem.

Cingsih Yen diegyouq Yinz Gvei Gauhyenz henzbien baih doengnamz, seizdoeng mbwn mbouj nit, seizhah mbwn mbouj ndat, gig hab goyw sengmaj. Ciuq dungjgi, daengx yienh miz 3000 lai cungj goyw. Daih- iek ciemq daengx gih doengh go ywyungh sam faenh cih it, ndawde miz haujlai binjcungj noix raen haenx deng lied haeuj ndaw guekgya cungdenj baujhoh bae.

Hawyw Cingsih dwg youq Dangzcauz Sungcauz seizgeiz hainduj banhguh, daengz Mingzcauz caeuq Cinghcauz banh ndaej ceiq hoengh, daengz seizneix gaenq miz baenz cien bi lizsij lo. Moix bi liggaeuq ngux nyied co’ngux, Cingsih dangdieg caeuq henzbien Nazboh、Dwzbauj、Dasinh caeuq Yinznanz Funingz Yen daengj dieg gyoengq bouxndaemyw、bouxgaiyw foenfoen ra aeu gak cungj goyw daeuj daengz Cingsih Yienh- singz gaicawx, dwg gij daegsaek yihyoz vwnzva gyoengq Bouxcuengh fungsug daegbied ndeu, deng lied haeuj swcigih gaep feihvuzciz vwnzva yizcanj mingzloeg ndawde bae. Daegbied dwg gaenh 10 bi daeuj, youq cwngfuj dazyinx lajde, hawyw ngux nyied co’ngux gveihmoz mboujduenh bongqhung, moix bi gipyinx geij fanh beksingq daeuj camhaeuj hawyw bae, gaicawx doengh goyw cungjloih dabdaengz 1000 lai cungj, guhbaenz gaicawx mauhgvaq 400 dunh, cujyau goyw miz lingzcih、gaeulwedgaeq、dienzcaet、hozsoujvuh、vagimngaenz、seyangh、aekez、vuengzcungq daengj. Danhseih mbouj miz saek aen gveihfan guding ciengzsoj, mbouj baenz maz gveihmoz, hanhhaed goyw canjyez fazcanj haemq youqgaenj.

Vih hawj hawyw guh ndaej baenz hai ndaej baenz, youq bi 2013, ndaw yienh doenggvaq ciu hek yinx ngaenz, doeklaeng yinxhaeuj“Lozhoz Cunghyozsingz” ndaej baenzgoeng. Aen hanghmoeg neix gyonj roengzngaenz 11 ik maenz ngaenz, ciemq dieg menciz 427 moux, gyonj gencuz menciz 50 lai fanh bingzfuengmij. Dangqnaj gaenq miz 70 lai gya canghbuenqyw daeuj cabyouq Cingsih, caemhcaiq miz Gvangjcouh Cingdaz Douzswh Faz- canj Gunghswh、Ningzboh Cunghyoz Ciyoz Youjhan Gunghswh 2 gya giyez siengj daeuj Cingsih guh gyagoeng goyw.

Seizneix, Cingsih daengx yienh goyw canjyez daj conzdungj canjyez iq faensanq ndaem yw haenx cingq deng baenzbenq sifan gihdi daeuj daiqlawh. Daj 2010 nienz ndaem 260 moux daengz bi 2014 ndaem daengz 4793 moux, ndaem godienzcaet menciz cingq cugciemh mbehung, dienzcaet canjlieng hix youz 2010 nienz 39 dunh swng hwnj daengz 2014 nienz 390 dunh, fan baenz 10 boix. Daengz 5 nyied daej, daengx yienh ndaem goyw cujyau miz godienzcaet、gienghenj、batgak、vagimngaenz daengj 40 lai cungj, menciz dabdaengz 4.38 fanh moux, ndawde ndaem godienzcaet menciz 4796 moux. Gaenq laebbaenz ndaem goyw conhyez hozcozse 6 gya, laebbaenz lienzbenq ndaem goyw sifan gihdi 15 aen, goyw canjyez fazcanj gaenq baenz le aen daegsaek youhsi canjyez gyoengq nungzminz Cingsih demgya souhaeuj ndeu, caemhcaiq mizrengz dwk bae doidoengh daengx yienh daegsaek lijyouzyez fazcanj.