De lij genjcaz le Aengiuz Denz- yangz cingq sihgungh haenx, ciep- raen bouxdaeuz gyoengq bing cabyouq Denzyangz、Denzdungh, caemhcaiq caeuq gyoengqde doxyaeng gij vwndiz mizgven cunjbeij hoenxciengq dem. Doeklaeng, youh bae Daibingz、Denh- maj daengj diegbya Vujmingz cazyawj hong cunjbei hoenxciengq. Dauqma daengz Namzningz, de doq comz mizgven bumwnz ngeixyaeng fuengz feihgih daeuj caq caeuq baenzlawz sanqdeuz nem caepcoih aen gihbwnj cijveihsoj swcigih daengj vwndiz.

Vih baujhoh diuzmingh caeuq caizcanj lwgminz ancienz, bi 1965 buenqbilaeng, swcigih dangjveij、cwngfuj haucau daengx gih gyoengq bing caeuq lwgminz, sikhaek hengzdoengh hwnjdaeuj, youq aen yenzcwz siuj yungh ngaenz lai banh saeh neix lajde, cungfaen leihyungh gij diuzgienh mizleih haenx, cing- leix conghgamj, caepcoih conghgamj conghnamh, fuengzre feihgih Meijgoz sawqmwh daeuj caeg caq. Doengz- seiz, iugouz gak aen singzsi gihgvanh、hagdangz、yihyen caeuq cangjgvang giyez caeux di genj ndei yaek deuz gvaq gizlawz bae, ciuqei geizcaeux sosanq、gaenjgip sosanq、mwh yaek hoenx sosanq sam cungj fangh’an bae guh ndei giva. Gij doxgaiq ndawsingz, aeu youq baujcwng swnghcanj、bauj- cwng bingdoih、baujcwng gunghawj cenzdiz lajde, miz giva dwk bae guh sosanq, caemhcaiq hengzguh gamhanh cawx huq, daezgonq ok huq, noix comz yo, lai cuengq youq gihcwngz danvih caeuq ciuq giva daezgonq gunghawj gij fuengfap neix, caenhliengh gaej hawj doxgaiq comz youq ndawsingz daiq lai.

Youq soujfuj Namzningz、dieg- henz Namzningz caeuq ranghdieg “sam sienq”, cungj caepcoih miz cijveijsoj caeuq doengsaenq sezbei daengj sezsih boiqdauq. Aen Cijveihsoj Cinghsanh vunzlai sug haenx, couhdwg youq mwhhaenx guhbaenz. Mwh ginhsw yaek doiq ok Namzningz, yamqnduj doiq bae gizlawz, aen cijveij soj guh youq gizlawz, yamq daihngeih doiq daengz gizlawz, cijveihsoj guhlawz baijbouh, gijneix, Veiz Gozcingh caeuq gij goengdaeuz dangj cwng ginh cungj nyinhcaen ngeixyaeng gvaq, caemh- caiq roengzfwngz bae baijbouh ndei bae.

(caengz sat)