Youq Namzningz Si Hinghningz Gih Sanhdangz Cin Ludungh Cunh, miz aen mbanj gyaeundei、Hinghningz Gih “mbanj doengzsim” hwnjguh sifandenj ndeu—Mbanjmoq Bouxcuengh Louzsiu. Youq ndaw mbanj, doengh dem doengh ranz- laeuz daengjdwt moqsak, yienhok fungcingz Bouxcuengh naekgywg, minzcuz vwnzva hozdung cungsim、aending baijcuengq doxgaiq vwnzva Bouxcuengh、douhung haeuj mbanj、daizheiq、luengqhongh senh- conz vwnzva minzcuz doenghgij gizdieg boiqdauq neix yienghyiengh yienjok daegsaek Bouxcuengh, hawj vunz yawj le angqyangz youh hozhaenz.

Mbanjlouzsiu gungh miz 340 lai vunz, ca mbouj lai cungj dwg Bouxcuengh. Mbanjmoq dwg Guek- gya Minzveij、 Caizcwngbu buek daih’it aenmbanj daegsaek minzcuz baujhu caeuq hwngfat sawqdiemj, soujfuj Namzningz Si seveicujyi lajmbanj moq hwnjguh sifandenj. Doengh bi neix daeuj, vunzlai ndaw mbanj youq dangjveij cwngfuj baihgwnz caenhrengz bangcoengh lajde, ciuq seizdaih moq naemjfap moq bae maeuzveh mbanjmoq, lid gaeuq guh moq, aeu cizdij caeuq nungzhoh ok gij lai, cwngfuj boujdiep saek di aen fuengsik neix, gonqlaeng roengzngaenz 3000 lai fanh maenz youq ndaw gvaengz 48 moux dieg de guhbaenz 88 aen ranzlaeuz caeuq 35 moux dieg guh daihsam canjyez, lij comz ngaenz hwnjguh le laeuzcunghab cunh cizdij、lanzgiuzcangz nem baecat faqciengz、ndaem faex ganq va、bu roen guh douhung doenghgij dieg boiqdauq neix, aenmbanj bienq ndaej moqsak gyaeundei.

Mbanjmoq guh baenz le, vunzlai ndaw mbanj gaenxgoemx bae guh daihsam canjyez caeuq nungzgyahloz doenghgij lijyouz fuzvu dakdaih siminz neix, laeuzcunghab ndaw mbanj gungh miz bouqhung bouqiq gyawj bakngeih aen, co okbae hawj vunz dajgai ngaenzco moix bi souhaeuj seiq hajcib fanh maenz; vunzmbanj caemh caenhrengz bae ciengx gaeq、ciengx bya, ndaem dingova dinfaex, seizneix moix vunz moix bi cinghsouhaeuj mauhgvaq fanh maenz ngaenz.

Vih swnjcienz vwnzva maenh- ndei minzcuz, Hinghningz Gih Minzcuzgiz lij youq Mbanjmoq Louzsiu banh le daemj man、siuq aendomq beizyinbanh, yungh buenq bi seizgan cingj lauxsae caeuq lauxhangz bae son vunzmbanj daemj man guh aendomq, hawj vunzmbanj lai rox cungj dinfwngz ra ngaenz ndeu, demlai vunzlai souhaeuj.

Byaij haeuj ndaw mbanj, vunzraeuz ndaej bae suenva、luengqmbanj youzcet, ndaej bae henz daizheiq yawj yienjheiq, bae ndaw ranzsaw yawj saw, bae gwnz gvangjcangz diuq foux, ranz gyaeu、mbanj gyaeu、seiqlengq gyaeu hawj vunzmbanj ndawsim angqyangz, caenhcingz bae yiengjsouh gij vuenyungz gaijgwz hailangh daiq daeuj hawj haenx.