6 nyied 10 hauh, dwg liggaeuq 4 nyied ngeihcib seiq,Yungzsuij Myauzcuz Swciyen Hozmuz Cin gawjbanh daih ngeihcib sam gaiq ciet bauqva, ciengj bauqva、diuq foux- yanghgoh、foux lungz、foux saeceij、caijcaz daengj gij vwnzdij cezmuz neix, yinx haujlai bouxyouz daeuj yawjngonz.

Hozmuz Cin ciet bauqva cezmuz lai cungj lai yiengh, miz caijcaz、Heiqgvei、vwnzvangz、fwen、bengcag、foux lungz、foux saeceij、ciengj bauqva daengj.

Gvaq ciet bauqva, dwg geiqniemh Dungh- han seizgeiz boux ciengginh Maj Yenz. Dingq- gangj Maj Yenz youq bingzdingh Namzfueng fanjluenh seiz, bae daengz gizlawz cungj coihlaeb ginyen、ceihleix ndaw ciengz、caux mieng guenq raemx, cienzson gij gisuz senhcin reihnaz Cunghyenz, gveihfan cingjleix faplwd diuzvwnz, bang dangdieg cawz bae gij cwngling mbouj ndei haenx, ndaej daengz vunzlai haenhndei. Vunzlai vihliux geiqniemh gij goenglauz hungmbwk Maj Yenz, youq liggaeuq 4 nyied ngeihcib seiq (cienzgangj dwg ngoenzseng Maj Yenz) gawjbanh ciet bauqva.

Seizneix, moix daengz ciet bauqva, gyoengqvunz daj seiq mienh bet fueng daeuj gizneix gvaq ciet, daengx aen cin vunz angqhoh ngoenzciet, nauhyied dangqmaz.

(Liu Swjyenh/廖子渊）