Lungzanh Yen Nazdungz Cin Nazmwnz Cunh Siujyoz youq hamq Dahyougyangh, daengx yozyau miz 5 aen ban、182 boux hageng、7 boux lauxsae. Lai bi gvaqdaeuj, aen yozyau neix nyinhcaen gvancez lozsiz gyauyuz fuengcim dangj raeuz, genhciz aen naemjngeix banhhag“cienzmienh son vunz、gag boux fazcanj、unglumx naengzlig”, sawj sonhag cizlieng onjdangq daezsang, 2014 nienz ndaej Swcigih Gyauyuzdingh dingh baenz swcigih dajcaux minzcuz vwnzva gyauyuz sifan yozyau.

Nazmwnz Siujyoz dwg Lungzanh Yen haj aen Sawcuengh sonhag sawqdiemj ndawde aen he. Geij bi neix, gak cungj sezsih yozyau ndaej gaijndei lo: 2012 nienz Swcigih Gyauyuzdingh bang yozyau guhbaenz le vwnzva senhconzlanz, bihaenx yozyau lij guhbaenz aen laeuzsonhag 1050 bingzfuengmij caeuq aen ranzdajcawj hagseng 100 bingz- fuengmij he, doengzseiz ndaej gak bumwnz cihciz demgya daizdaengq caeuq dennauj daengj sonhag sezbei.

Vih cienzswnj minzcuz vwnzva, Nazmwnz Siujyoz giethab gij saedcaeq hagdangz, hengzguh Cuengh Gun song vahsaw sonhag. Vihneix, hagdangz cienmonz laebbaenz le minzcuz vwnzva gyauyuz gunghcoz lingjdauj siujcuj, dawz minzcuz vwnzva gyauyuz nabhaeuj yozyau sam bi fazcanj gveihva ndawde bae, cimdoiq gij daegdiemj hagseng, yungh gak cungj fuengfap daeuj sonhag. Doenggvaq hengzguh song vahsaw sonhag, sawj sonhag cizlieng ndaej daezsang, hagseng hix aeundaej cingzcik ndei, mbangj hagseng lij youq gak cungj doxdax swcigih caeuq yienh gawjbanh haenx ndaej ciengj: 2012 nienz Lungzanh Yen siuj- hagseng byauhcunj Vahcuengh dungxcaiz doxdax ndawde, aen cezmuz 《Beij Sangdaemq》Nazmwnz Siujyoz aeundaej ngeih daengj ciengj; 2014 nienz 11 nyied Vangz Siuhhanz doengzhag camgya daihsam gaiq daengx gih siujhagseng gangjgoj Vahcuengh doxdax ndaej sam daengj ciengj.

Nazmwnz Siujyoz lij haenqrengz beizyin lauxsae, cawzbae leihyungh seiz cuengqgyaj guh beizyin le, lij gujli lauxsae camgya gak cungj beizyinbanh gak bumwnz cujciz haenx hagsib beizyin, doengzseiz lij daiq lauxsae daengz Dwzbauj、Gveigangj、Bahmaj daengj gij yienh Cuengh Gun song vahsaw sonhag guh ndaej ndei haenx bae hagsib, doenggvaq beizyin hagsib, daezsang le sonhag suijbingz.

Hagdangz lauxsae youq haenq- rengz sonsaw le, lij cizgiz camgya gak cungj doxdax caemhcaiq aeundaej cingzcik ndei: 2010 nienz, Vangz Duhcungh camgya daengx yienh lauxsae Cuengh Gun song vahsaw gangjgoq doxdax, ndaej ngeih daengj ciengj; 2011 nienz, bien lunvwnz Vangz Binghyen aeundaej daengx gih Cuengh Gun song vahsaw gyauyuz lunvwnz doxdax ngeih daengj ciengj; Veiz Haijli、Vangz Yenzsinh、Vangz Lifung daengj lauxsae hix youq gak cungj doxdax youq swcigih、yienh gawjbanh haenx aeundaej cingzcik ndei.

Minzcuz vwnzva gyauyuz sawj Nazmwnz Siujyoz ngoenz beij ngoenz ndei.