Gaenh bi daeuj, Siengcouh Yen nyinhcaen hengz gij cwngcwz vah saw minzcuz, gyarengz hawj Sawcuengh Vahcuengh ndaej senhconz doigvangq, sawjyungh ndaej lai gvangq lai hoengh.

Gya’gvangq gizdieg yungh Sawcuengh. Youq seiz hai hoih、gvaq ngoenzciet、banh hozdung gvendaengz hong minzcuz、vah saw minzcuz, cungj aeu Sawcuengh daeuj sij byauhyij、fukvang、gyaeuj banjbau、daezmoeg senhconz swhliu, hix sij coq minzcuz doxgiet gyauyuz canjdingh、baiz minzcuz doxgiet sifan daengj, hawj Sawcuengh ndaej senhconz nem doigvangq.

Hai nem book lanzmuz gvangjbo Vahcuengh. Daj bi’gvaq 5 nyied daeuj, aen yienh neix youq gvangjbo dendaiz hai song aen lanzmuz Vahcuengh, baugvat “Sinhvwnz Siengcouh” nem“Cwngfaz Sieng- couh”, moix ngoenz bo sam baez, bo 40 faencung.

Guh Cuengh Gun song saw vah gyauyuz. Aen yienh neix 2012 nienz haggeiz seizcou hainduj youq Daloz Cunghsinhyau guh Cuengh Gun song saw vah sonhag saedniemh, dangqnaj aen hagdangz neix miz 2 aen Vahcuengh yibeibanh, it、ngeih nienzgaep miz 6 aen ban Cuengh Gun song saw vah sonhag saedniemh, moix singgeiz hwnj 10 dangz Vahcuengh Sawcuengh, miz 260 boux hagseng hag Vahcuengh Sawcuengh.

Gyalai venj baiz Cuengh Gun song saw. Aen yienh neix aeu ndaw yienh dangjcwng gihgvanh、swyez danhvei venj baiz Cuengh Gun song saw, caemhcaiq iugouz sij cinjdeng, baenzlawz nda saw、venjhwnj、coq dieg hix aeu hab gvidingh. Dangqnaj, ndaw yienh dingzlai gihgvanh、swyez danhvei nem mizmbangj hingz- cwngcunh venj miz baiz Cuengh Gun song saw.

Swnjcienz nem hwngfat vwnzva Fwencuengh. Aen yienh neix youq Majbingz Yangh laeb Fwencuengh swnjcienz gihdi, doenggvaq banh Fwencuengh gohvei、Fwencuengh doxdax、 banh canghfwen beiz- yinbanh、Fwencuengh haeuj hag- dangz daengj hozdung, haenqguh hong henhoh、swnjcienz、hwngfat Fwencuengh aen binjbaiz vwnzva minzcuz neix.

(Veiz Veimingz/韦卫明)