Sihlinz Yen Nazlauz Yangh Mbanjnazlauz dwg aen mbanj Bouxcuengh diegbya doekgungx ndeu, daengz seizneix ndaw mbanj lij louz miz gij ranzcaep gaeuqgeq seiz Ciuhcingh hwnjguh haenx. Geij bi neix daeuj, aen yienh neix aeu gij ranzcaep gaeuqgeq Gunghbaujfuj singq Ginz de guh cungsim, ietnangq daiqdoengh hwngguh nungzgyahloz、gizdieg guh’angq mbanjbya、baijyienj fungsug aeubawx baehaq Ouhgvei、mbaet mak、ep bya doenghgij hanghmoeg lijyouz henz Dahdoz- niengz haenx, ginghci dangdieg guh ndaej vaiqriengj, vunzmbanj demlai souhaeuj, cauxbaenz aen gingjdenj lijyouz okmingz ndeu, hawj gyoengq hekyouz ndaw guek rog guek angqyangz bae youzcet, ndaw mbanj caemh nauhyied hoenghhwd hwnj- daeuj.

Mbanjnazlauz youq henz Dah- dozniengz, lizsij gyaenanz, vunzmbanj simsoh gaenxhong, goekgaen vwnzva laeglwd, ndaw mbanj couh miz ranz vunz ndeu gonqlaeng miz song boux vunz dang daengz cungjduz gvaq, Ciuhcingh Gvanghsi conienz Yinz Gvei cungjduz Ginz Yiyingh caeuq Ciuhcingh satbyai song Gvangj cungjduz、Swconh cungjduz Ginz Cinhsenh couhdwg vunz aen mbanj neix, baenzneix couh miz gij ranz- youq、aenmiuh、doxgaiq geiqniemh ginggvaq Ciuhmingz、Ciuhcingh hwnjguh de louz roengzdaeuj, daengz seizneix lij miz Gunghbaujfuj、ranznajrongh、ranzsaw Nanzyangz、Miuhciengginh、 coengceiz singq Ginz、laeuzdemgyaeu、laeuzngeixlwg、baizlwghauq doengh 10 giz rizgeq neix. Gij ranzgeq neix ginggvaq bak lai bi fwnfwn rumzrumz, lij hen louz ndaej haemq ndei, 1994 nienz ginggvaq Swcigih Yinzminz Cwngfuj baecinj, ndaej lied haeuj swcigih vwnzvuz baujhoh danhvei. Ranzgeq singq Ginz ginggvaq Ciuhmingz Ciuhcingh song ciuh yienjbienq、hwngfat, baij ok le gij rizroen baihraeg dujswh cidu dieg minzcuz vunz noix baihsaenanz guek raeuz, caemh baij ok le gij lizsij ranz singq Ginz Ciuhcingh, youq ndaw ranzcaep gaeuqgeq Bouxcuengh miz gij diegvih youqgaenj de, ndaej bangcoengh yenzgiu lizsij, caemh ndaej guh gizdieg lijyouz ngonzyawj, baenz gizdieg gaeuqgeq okmingz ranghdieg doxgap Yinznanz、Gveicouh caeuq Guengjsae haenx.

Mbanjnazlauz lizsij vwnzva gyaenanz, daj seiz satbyai Ciuhmingz seiz codaeuz Ciuhcingh, ndaw mbanj couh laeb miz heiqban Heiqcuengh, geij bak bi gvaqbae, Heiqcuengh ndaej daih dem daih swnjcienz roengzdaeuj. Seizneix, Heiqcuengh Nazlauz youq bouxswnjcienz daih daihseiq Suh Suisiengj daiqlingx lajde, vanzlij louz miz aen heiqduenz gaglaeb ndeu, Heiqcuengh caemh ndaej swnjciep caeuq cienzyiengz roengzbae. Aen heiqduenz neix youq gij yienh henzgyawj de gig mizmingz, ciengzseiz ndaej cingj bae camgya yienjok, gonqlaeng bae daengz Denzlinz、 Lungzlinz gij yienh ndaw gih caeuq Funingz、Gvangjnanz、Lozbingz gij yienh Yinznanz Swngj haenx bae yienjok gvaq, caemh aeundaej haujlai ciengjhangh gvaq, daiq hawj vunzlai faenh yiengjsouh daegbied youh simsangj ndeu.

2013 nienz 4 nyied, “fwen Bouxcuengh” Nazlauz ndaej lied haeuj swcigih gaep feihvuzciz vwnzva yizcanj mingzloeg; 5 nyied, gij ranzgeq ranz singq Ginz ndaej Gozvuyen dingh guh buek daihcaet daengx guek cungdenj vwnzvuz baujhu danhvei; 7 nyied, Mbanjnazlauz ndaej bingz guh buek daihngeih swcigih aencin、aencunh lizsij vwnzva okmingz, aeundaej swcigih “aencunh lizsij vwnzva okmingz” aen mingzdaeuz miznaj neix.