Vihliux cungjgez gyauhliuz Cuengh Gun song vahsaw gyauyuz sonhag gingniemh, daezsang lauxsae Cuengh Gun song vahsaw sonhag suijbingz, coicaenh hong sonhag sawqniemh Cuengh Gun song vahsaw yamqonj fazcanj, 5 nyied 28 hauh daengz 29 hauh, Swcigih Gyau- yuzdingh Minzcuz Gyauyuzcu youq Vanzgyangh Mauznanzcuz Swciyen hai aen hoih “Bi 2015 Daengx Gih Cuengh Gun Song Vahsaw Sonhag Damqra(Benq Baihbaek)”.

28 hauh ngoenzde, miz 130 boux Cuengh Gun song vahsaw sonhag gyauyenzyenz caeuq lauxsae Sawcuengh ak haenx bae daengz Vanzgyangh Mauznanzcuz Swciyen Swh’wnh Cin Yinzhoz Siujyoz, dingq goq sifan sonhag Cuengh Gun song vahsaw. Yinzhoz Siujyoz lauxsae Sawcuengh Cinz Yivangj caeuq Vangz Denzcwng song boux lauxsae hawj daihgya hwnj dangz Sawcuengh. Song boux lauxsae hwnj goq cungj guh daengz sonhag muzbyauh mingzgoz, lohnaemj cingcuj, sonhag fuengfap lingzhoz lai yiengh, doedok cungdenj. Hoeng, song boux sonfap youh gak miz daegdiemj: Cinz lauxsae youq hwnj goq moq gaxgonq, sien daezok vwndiz, hawj hagseng daiq aen vwndiz bae doeg saw, bae lijgaij gij eiqsei ndaw saw. Vangz lauxsae cix doenggvaq mbaw gajben gwnzde sij miz singmeh yinhmeh Sawcuengh haenx, hawj hagseng bae gyoepyaem, youh hawj hagseng guhcaemz daeuj nyinhrox cihmoq. Song boux lauxsae hwnjdangz ndei raixcaix, ndaej daengz gyoengq boux gyauyenzyenz caeuq lauxsae Sawcuengh ak haenx haenhndei. Boux lauxsae Sawcuengh ak Vujmingz Yen Gingloz Siujyoz Luz Cenzyau dingq goq le haenh naeuz: “Gij sifan goq Cuengh Gun song vahsaw Yinzhoz Siujyoz neix, dwg gij denjfan Cuengh Gun song vahsaw sonhag gih raeuz.”

29 hauh ngoenzde, youq gwnz hoih guh bingz goq caeuq damqra haenx, gyoengq gyauyenzyenz caeuq lauxsae bouxboux cungj haengjheij gangjvah, gangj ngeixfap swhgeij. Daihgya siengj gangj couh gangj, gangjlwnh ndaej gig nauhyied.

Gvangjsih Minzcuz Gyauyuz Fazcanj Cunghsinh yizsinj Lingh Hinghningz youq gwnz hoih sijsaeq gejdap le gij vwndiz gyoengq lauxsae daezcam haenx.

Swcigih Gyauyuzdingh Minzcuz Gyauyuzcu cucangj Veiz Lanzmingz youq gwnz hoih daezok seiq diemj yauhgiuz: It dwg aeu caenh’itbouh daezsang gij roxnyinh Cuengh Gun song vahsaw sonhag haenx, rox gij yiyi youqgaenj de; ngeih dwg aeu gyagiengz hong sonhag yenzgiu Cuengh Gun song vahsaw; sam dwg aeu yawjnaek conhyez fazcanj gensez bingzdaiz; seiq dwg caux aen gyauyenz bingzdaiz hagdangz lajmbanj.