Sozfaz Siujyoz dwg aen hagdangz diegbya Denhngoz Yen saedhengz Cuengh Gun song saw vah sonhag he. Mbanj Sozfaz youz 19 aen mbanjiq habbaenz, 2030 gyaeujvunz, miz Mauznanz caeuq Bouxcuengh daengj minzcuz cabyouq, gak minzcuz doxgiet doxhuz doxndei. Sozfaz Siujyoz laeb youq ndaw mbanj Sozfaz, 1960 nienz laebbanh, seizneix miz 136 boux hagseng, dwg aen hagdangz hagseng geiqninz ndeu. Lwgnyez ngamj haeujhag dabdaengz 100%, hagseng hingzveiz habgeklwd dabdaengz 100%; miz 7 boux lauxsae, lauxsae habgeklwd hix dwg 100%. Hagdangz ciemq dieg menciz youz nyuenz 800 bingzfuengmij gyahung daengz 3200 bingzfuengmij, miz laeuzsonhag、laeuzcunghab、laeuz- suzse hagseng gak doengh ndeu.

Ciuq liujgaij, aen hagdangz neix itcig yawjnaek hong guenjleix. Hagdangz laebhwnj le lauxsae swhsiengj cwngci hagsib cidu, cujciz lauxsae hagsib 《Gyauswh Faz》、 《Yivu Gyauyuz Faz》、《Cungh Siujyoz Gyauswh Cizyez Daudwz Gveihfan》、 《Gunghminz Daudwz Gensez Sizsih Ganghyau》daengj, gveihfan gamhanh lauxsae hingzveiz, saekdimz lauxsae famhloek famhfap. Vih guenjleix ndei hag- seng, son hagseng bae hag sug 《Siujhagseng Ngoenznaengz Hingz- veiz Gveihfan》 caeuq 《Siujhagseng Soujcwz》, yiemzgek ciuqei 《Cungh Siujyoz Dwzyuz Gunghcoz Gveihcwngz》bae banhsaeh. Ndigah, aen hagdangz neix itcig gvaqdaeuj, hagseng mbouj miz famhcoih famhfap gvaq, hagseng hingzveiz gveihfan habgeklwd dabdaengz 100%. Bi 2010, hagdangz deng bingz guh yienh gaep Cangzgveih Guenjleix Maenh- ndei Hagdangz; bi 2011 deng bingz guh si gaep Cangzgveih Guenjleix Haemqndei Hagdangz.

Lwgnyez lajmbanj aen hagdangz neix ca mbouj lai mbouj haeuj youwzyenz gvaq couh cigciep haeuj siujyoz doegsaw lo, hagseng giekdaej ca, haujlai hagseng daeuj hagdangz lij caengz rox gangj vah Gvei Liuj, Bujdunghva engq mbouj rox gangj lo, youq ndaw hagdangz cungj dwg gangj vah bonjdieg. Siengj daezsang sonhag cizlieng, sonhag nanzdoh daih, haujlai cawjranz cungj heiqlau hagdangz sonhag cizlieng dwk mbouj hwnjbae, heiqlau lwgnyez swhgeij deng nguh cenzduz, hagdangz gietsim yungh sonhag cingzcik daeuj gangjfug cawjranz. Youq ndaw sonhag, dawz hong Vahgun sonhag cizlieng cuengq youq giz doedok bae ca ndei, lauxsae cingsim bwh ndei moix dangz goq、hwnjdangz gvaqlaeng nyinhcaen baegaij cozyez caeuq fujdauj hagseng yaez, sonhag miz giva miz cungjgez miz dauqngeix, doiq hagseng gaujsi guh bingzgyaq, moix aen hothoh sonhag cungj nyinhcaen bae guh ndei, mbouj yawjsiuj caemhcaiq mbouj cuengq gvaq moix boux hagseng cingzcik yaez. Lauxsae cawz youq ndaw hagdangz doxcaez hagsib aeu ndei bouj yaez, hagdangz lij ciengzseiz cujciz lauxsae okrog bae gvanhmoh hagsib. Gaenh geij bi daeuj, lauxsae coz camgya ndaw gih rog gih gak loih doxdax cungj aeundaej cingzcik ndei, Loz Gingjgvanh lauxsae 2009 nienz camgya daengx gih Cuengh Gun song saw vah gangjgoq doxdax aeundaej ngeih daengj ciengj, 2010 nienz camgya daengx cin suhfaz doxdax aeundaej ngeih daengj ciengj; Hanz Gencunh lauxsae 2000 nienz cijdauj Banh Yengiz、Danz Cangzcwngz camgya daengx gih Vahcuengh gangjgoj doxdax faenbied aeundaej it、ngeih daengj ciengj, 2010 nienz cijdauj Dangz Cangzsiuh、Banh Dunghmeiz、Danz Linaz camgya daengx gih cozvwnz Cuengh doxdax faenbied aeundaej it、ngeih、sam daengj ciengj; Vuz Cunhmeiz lauxsae 2012 nienz camgya daengx cin youhcizgo doxdax aeundaej it daengj ciengj. Lauxsae coz cingzcik maenhndei yinxhwnj daengx cin lauxsae dahoengz. Lai bi gvaqdaeuj, hagdangz sonhag cingzcik cungj baiz youq daengx cin cunghdwngj sangdwngj suijbingz. Miz geij boux hagseng youq aen hagdangz neix doegsaw bizyez le gauj hwnj daihhag caemhcaiq doeg daengz yenzgiuswngh bizyez.

Hagdangz liglaiz yawjnaek hong dwzyuz, son hagseng gingqcungh banlaux, ndiepgyaez mbanjranz, ndiepgyaez guekcoj; youq ndaw ngoenznaengz swnghhoz hagsib, hag rox gangj vwnzmingz gangj laexmauh, gaenxgiemh mbaet yungh, hag rox gijmaz dwg ndei gijmaz dwg rwix.

Lai bi gvaqdaeuj, hagdangz vih gaijndei banhhag diuzgen cizgiz yiengq baihgwnz aeu hanghmoeg, ndaej daengz baihgwnz daihlig cihciz, 1998 nienz hwnj ndaej doengh laeuzsonhag moq ndeu, 2004 nienz youh hwnj doengh laeuzsuzse hagseng ndeu, 2012 nienz caiq hwnj ndaej doengh ranzcouhconj lauxsae he. Ndaw hagdangz hix ok vunz、roengzngaenz cang gyaeu hagdangz, seizneix ndaw hagdangz engqgya lengj lo.