Lwgnyez fatndat couh sim fanz youq mbouj onj, caemhcaiq rox fatseng linjlau dem. Ndigah, cawjranz aeu haeujsim cij ndaej. Danghnaeuz lwgnyez fatndat, mbouj ndaej laepda luenh yungh yw doiq ndat, itdingh aeu loengh cingcuj ndaej gijmaz bingh le, cij ndaej doiq bingh gwn yw.

Lwgnyez fatndat, cawjranz wnggai haeujsim baihlaj geij diemj:

1、Hawj lwgnyez dag ndangraeuj, gvaq 20 faen cung caiq dag bae ndeu, caemhcaiq dawz gezgoj geiq roengzdaeuj.

2、Bang lwgnyez duet saek geu song geu buh, denzdemh hix gaej na lai, yienghneix mizleih biujmienh naengnoh sanq ndat.

3、Dwk geij mbaw gaen roxnaeuz geij gaiq haijmenz roengz bat raemxraeuj bae, doeklaeng nyaenj raemx le dawz daeuj mad najbyak roxnaeuz daengx ndang lwgnyez. Itbuen moix baez mad 5 daengz 10 faen cung, gek 5 faen cung caiq mad baez moq, gaej yungh raemxgyoet daeuj mad. Aenvih yungh raemxraeuj daeuj mad naengnoh, ndaej hawj sailwed naengnoh mbehai, mizleih sanq ndat.

4、Moix gek duenh seizgan ndeu hawj lwgnyez bwnq di raemxgoenj raeuj he, aenvih fatndat seiz aenndang rox sied bae di raemx ndeu.

5、Mwh lwgnyez fatndat ndangraeuj mauhgvaq 39 doh roxnaeuz gaenq fatndat mauhgvaq 24 diemj cung, guh mbangj cosih le lij mbouj raen doiq ndat seiz, wng gibseiz soengq bae yihyen duenq yw.