5 nyied 20 hauh, Lungzanh Yen Gvangjbo Densidaiz doiok aen lanzmuz《Sinhvwnz Vahcuengh Lungzanh》, bouxcawjbo daenj ndangdaenj minz- cuz, aeu Vahcuengh dangdieg (Vahcuengh Lungzanh Yen Cwngz- siengh Cin), vunzlai dangdieg faenfaen souyawj, gangjlwnh gig lai.

Ciuq cam rox, Lungzanh Yen miz 40 fanh vunz Bouxcuengh, ciemq vunzsoq daengx yienh 96%, vunz dangdieg aeu Vahcuengh doxgyau lai, vunz Bouxcuengh maqmuengh miz densi cezmuz vah dangdieg. Aen yienh neix haibo densi lanzmuz《Sinhvwnz Vahcuengh》, cobouh guh ndaej daengz hawj vunzlai mboujdanh“dingq ndaej nyi、yawj ndaej raen”, vanzlij“dingq ndaej rox、yawj ndaej rox”, neix doiq saedyienh aen muzbyauh“hawj sing dangj nem guekgya ndaej haeuj cien ranz fanh hoh” miz yungh gig lai.

Aen lanzmuz 《Sinhvwnz Vah- cuengh Lungzanh》neix moix geiz book 15 faencung, moix singgeiz guh sam geiz. Neiyungz dwg aeu Vahcuengh bo《Sinhvwnz Lungzanh》ngoenz gonq, moix singhgiz ngeih、seiq、roek 21:00 bo baez daih’it, moix singhgiz sam、haj 8:00、 13:00 bo baez daihngeih. Duenh baihlaeng neix, aen yienh neix lij laebdaeb gyarengz guh hong ok cezmuz Vahcuengh, ceng youq ndaw gvangjbo、denyingj、densi cungj miz cezmuz Vahcuengh book.

(Veiz Yenzfuz/韦元福)