Fuzsuih Yen Cunghdungh Cin Sinhlungz Siujyoz dwg gih raeuz aen hagdangz guh Cuengh Gun song saw sonhag haemq caeux ndeu, youh dwg aen hagdangz miz daegsaek minzcuz ndeu, hagdangz miz bang lauxsae nienzcoz youh miz sonhag gingniemh ndeu. Lai bi daeuj, hagdangz swnj gonq daiq laeng, caeuq seizdaih doengz baenaj, genhciz aeu gohyoz fazcanjgvanh guh cijdauj, gyagiengz ciengzgvi guenjleix, doedok gungh- coz cungdenj, haeujlaeg guh son- gyauq sonhag gaijgwz, cienzmienh coicaenh suciz gyauyuz, aeundaej cingzcik ndei.

Sinhlungz Siujyoz hagseng cungj dwg Bouxcuengh, vah diegde caeuq Vahcuengh byauhcunjyinh haemq doxdoengz. Vihneix, 1985 nienz couh ndaej swcigih dinghdiemj guh Cuengh Gun song saw vah sonhag sawqdiemj hagdangz. Lai bi daeuj, hagdangz genhciz aeu “aeu Cuengh guhcawj、Cuengh Gun giethab 、aeu Cuengh coi Gun、 Cuengh Gun cungj rox” cibroek cih fuengcim guh dazyinx, nyinhcaen guh hong Cuengh Gun song saw vah sonhag, yaugoj haemq ndei. Geij bi neix, aen hagdangz neix lauxsae caeuq hagseng camgya Sawcuengh gangjhag doxdax caeuq Vahcuengh yienjgangj doxdax lai baez ndaej ciengj.

Hagdangz youq saedhengz suciz son’gyauq ndawde, aeu cienzzyiengz minzcuz vwnzva guhcawj, dawz minzcuz vwnzva yinxhaeuj gwnz dangz bae. Hagdangz doenggvaq yinhyoz、meijsuz、dijyuz caeuq cujdiz banh duihoih、govai hozdung daengj lai diuzloh guh minzcuz vwnzva senhconz, daihlig gaihcanj minzcuz dijyuz hozdung lumj dwk lwggyangq、dik lwggienq、fouxfaexsaux daengj hozdung, sawj hagseng rox minzcuz vwnzva minzcuz funghcingz, daegbied dwg Bouxcuengh fungsug sibgvenq daengj, doengzseiz roengzrengz senhconz baujhoh dangdieg minzcuz vwnzva vwnzvuz, soucomz fwen Bouxcuengh dangdieg, soucomz goj ndawbiengz, sonyinx hagseng camgya dangdieg ndawbiengz vwnzva hoz- dung daengj, hawj hagseng youq guh’angq guhcaemz ndawde roxyiuj vwnzva minzcuz, saenqhwng cing- saenz minzcuz.

Hagdangz cienzmienh gvancez dangj gyauyuz fanghcinh, aeu gohyenz hwng hag, daegsaek giengz hag. Daih’it, hagdangz ca ndei lauxsae sonhag cizlieng, daezsang lauxsae haglig, gujli lauxsae bae cinsiuh daezsang haglig，dangqnaj, daengx hagdangz lauxsae haglig habgek dabdaengz 100%. Daihngeih, hag- dangz ca ndei lauxsae gihbwnjgungh yinlen, lumj bujdunghva、suhfaz、dennauj daengj yinlen. Daihsam, hagdangz lij soucomz gak cungj beizyin saenqsik, ciuq hagdangz fazcnaj sihyau baij mbangj lauxsae camgya gak cungj gyauhliuz yenzdauj hozdung, romcomz sonhag gingniemh. Daihseiq, hagdangz giethab saedsaeh, yinx lauxsae “youq sonhag ndawde yenzgiu, youq yenzgiu ndawde sonhag”, guh daengz sonhag caeuq yenzgiu “doxcaez youq doxcaez bouj”. Linghvaih, gyagiengz cidu gensez, cungfaen diuhdoengh lauxsae hagseng cizgizsing, daezsang banhhag suij- bingz. Hagdangz giengzvaq ciengzgvi gunghcoz guenjleix, dawz daengx hagdangz boux hagseng youhsiu caeuq boux hagseng doeklaeng guenjleix dangguh hangh hong cungdenj daeuj ca, sawj hagdangz sonhag cizlieng daezsang ndaej gig vaiq.

Geij bi neix daeuj, Sinhlungz Siujyoz doenggvaq gyahfangj, ciuhai aenhoih bohranz caeuq ginzcung daibyauj, daengz ndaw gyang ginz- cung dingq gij yigen gyoengqde, roengzrengz gaijndei hong hagdangz, ndaej daengz ginzcung haenh. Doengzseiz, hagdangz youh gaenx bae comz ngaenz, gaijndei banhhag diuzgen. Geij bi neix gvaqdaeuj, hagdangz gonqlaeng ceng’aeu baih- gwnz cihciz caeuq bouxvunz ndiep- gyaez mbanjranz bangcoengh ndaej 50000 lai maenz ngaenz, coih ranzhag, cawx daizdaengq, canggyaeu hagdangz daengj, hawj hagdangz banhhag diuzgen ndaej gaijndei haujlai.