“Bineix 4 nyied 20 hauh daengz 5 nyied 31 hauh dwg yienh raeuz duenh haenqguenj saeh fuengzre feiz dawz ndoeng, rangh dieg ndoengfaex mbouj ndaej diemj feiz, sauqmoh baiq cojcoeng mbouj ndaej cuengq bauqciengh.” Neix dwg Cingsih Yen Gizyangz Cin aeu Vahcuengh senhconz cihsiz fuengzre feiz dawz ndoeng, hix dwg yienh cwngfuj aen mingling haenq- guenj vunzlai mbouj ndaej youq gyangdoengh luenh yungh feiz. Duenh neix, moix ngoenz doenghgij ci senhconz neix hai gvaq daengx cin 22 aen cunh(haw) 300 aen mbanj.

Vih gyarengz senhconz fuengzre feiz dawz ndoeng, cauxguh aen fwnveiz ndei“fuengzre ndoeng deng feiz、boux boux aeu guh daengz”, aen cin neix dingh aen fangh’an senhconz fuengzre ndoeng deng feiz, hai ci senhconz aeu Vahcuengh boqok、bienfat donjsin re feiz、venj fukvang re feiz、diep byauhyij re feiz、yaenqfat《Fung Saenq Hawj Vunzlai》《Aen Mingling Haenqguenh Youq Ndaw Doengh Yungh Feiz》daengj, doenggvaq lai cungj fuengsik cienzmienh、gaenjmaed、dauqcawq senhconz fuengzre ndoeng deng feiz, hawj hong fuengzre ndoeng deng feiz ranz ranz rox, boux boux hengz.

(Yangz Liujcingh/杨柳青 Cau Yinghgyauj/赵英巧)