Denzlinz Yen Giucouh Cin Banjgenh Siujyoz diegyouq gig ndei, bi 1972 daj Banjgenh mbanj hung senj gvaqdaeuj, dwg youz ndaw mbanj 7 aen swyenz dunz caeuq mbangj hagseng mbanjnden daeuj haeujhag doegsaw, cienzbouh dwg lwg Bouxcuengh. Aen hagdangz neix dwg Gvangjsih Bouxcuengh Swcigih Gyauyuzdingh ceijdingh guh Cuengh Gun song saw vah sonhhag saedniemh ndawde aen ndeu. Lai bi gvaqdaeuj, hagdangz genhciz aeu aen sonhag fanghcinh “Aeu Cuengh Guhcawj、Cuengh Gun Giethab、Aeu Cuengh Coi Gun、Cuengh Gun Cungj Rox” neix guh dazyinx, aeu “Cuengh Gun Song Saw Vah Doengzbouh Sonhag” guh daegsaek, youq sonhag gyauyuz ndawde aeundaej cingzcik ndei.

Hagseng aen hagdangz neix dingzlai dwg gij lwgnyez louzsouj haenx, bohmeh de cungj dwg okrog bae dajgoeng, lauxsae ndaw hagdangz gawq dwg lauxsae youh dwg bohmeh, youq gyauyuz hagseng fuengmienh cujyau yawjnaek hag- seng singqcingz, genhciz aeu hozdung hingzsik daeuj son hagseng, aeu “Cuengh Gun Song Saw Vah Doengzbouh Sonhag” guh daegsaek, moix aen haggeiz gawjbanh baez bangaep minzcuz vwnzva cawjdaez diegsuen hagsib、baez bangaep Cuengh Gun song vah doegsaw doxdax ndeu; moix bi gawjbanh baez“roekit” youzyenz hozdung caeuq “roekit”vwnzyi veiyenj ndeu; moix bi cujciz hagseng camgya yienh gaep、swcigih gaep siujhagseng byauhcunj Vahcuengh gangjgoj doxdax, hawj hagseng baijok gij bonjlingx de daeuj daezsang goyinz suyangj. 2012 nienz camgya daengx gih siujhagseng byauhcunj Vahcuengh gangjgoj doxdax ndawde, hagseng aeundaej cizdij ngeih daengj ciengj, Vangz Li- nganz、Nungz Bingjcunh lauxsae aeundaej maenhndei lauxsae cij- daujciengj; 2014 nienz camgya Denzlinz Yen siujhagseng byauh- cunj Vahcuengh gangjgoj doxdax ndawde, hagseng faenbied aeundaej it、ngeih、sam daengj ciengj, Vangz Li’nganz、 Nungz Bingj- cunh、Vangz Dez lauxsae aeundaej maenhndei lauxsae cijdaujciengj; 2014 nienz camgya daengx gih siujhagseng byauhcunj Vahcuengh gangjgoj doxdax ndawde hagseng aeundaej ngeih daengj ciengj, Nungz Bingjcunh、Vangz Dez lauxsae aeundaej maenhndei lauxsae cijdauj ciengj. 2014 nienz, hagdangz gawjhengz le “Bauqaen Gyoengq- raeuz Aeu Hengzdoengh” daihhingz gunghyiz yienjgangj, hawj hagseng hag rox gyaez guekcoj、gyaez lauxsae、gyaez bohmeh, hawj lwgnyez daj iq couh hag rox baenzlawz bauqaen、baenzlawz hauqgingq、baenzlawz guh vunz.

Lai bi gvaqdaeuj, aen hagdangz neix yawjnaek beizyangj guzgan lauxsae, moix aen haggeiz cungj baij lauxsae okbae camgya yienh gaep、swcigih gaep beizyin, gujli lauxsae byaij okbae hagsib, daiq gyauyuz sonhag lijnem moq dauqma, daezsang lauxsae yezvu suijbingz. Lauxsae hagsib dauqma le, sij 30 lai bien sonhag lunvwnz youq sengj、si gaep ganhvuz fazbyauj roxnaeuz ndaej ciengj.

Vihliux swnjcienz minzcuz vwnzva Bouxcuengh, hagdangz hai miz Cuengh Gun song saw vah ngeihloih mosik sonhag, daj sam nienzgaep hainduj son hagseng hag Sawcuengh, sam、seiq nienzgaep moix aen singhgiz hwnj sam aen goqseiz, haj、roek nienzgaep moix aen singhgiz hwnj song aen goqseiz. Lauxsae lingzvued gaem ndei Cuengh Gun sonhag fuengsik fuengfap, hawj hagseng yungzheih hag rox gyoepyaem、 doeg、 sij. Mwh hagseng bizyez, Cuengh Gun suijbingz cungj ndaej dabdaengz gyauyoz dagangh yauhgiuz.

Youq gak gaep dangjveij、cwngfuj caeuq gyauyuz hingzcwng bumwnz doengzcaez roengzrengz lajde, seizneix Banjgenh Siujyoz hagdangz menciz miz 6500 bingzfuengmij, gencuz menciz 2000 bingzfuengmij, miz laeuzsonhag、laeuzcouhconj lauxsae、laeuzsuzse hagseng、sizdangz hagseng. Hai miz it nienzgaep daengz roek nienzgaep 6 aen ban sonhag. Seizneix miz 157 boux hagseng, ndawde miz 46 boux hagseng youq ndaw hagdangz ninz, miz 7 boux lauxsae. Hagdangz ciuqei aen yenzcwz“dwzyuz guhdaeuz, sonhag guhgoek” neix, dingh’ok caemhcaiq caezcienz gak hangh guenjleix cidu daeuj gyagiengz gyauyuz sonhag guenjleix, gaenq youq bi 2003 doenggvaq yienh gaep bingzguh, deng lied haeuj “cunhgiz ngeihgaep gyazdaengj hagdangz”, bi 2005 aeundaej “Denzlinz Yen Bujgiuj Gunghgenh Senhcin Danhvei”. 2013 daengz 2014 hagnienzdoh hagseng haeuj- haglwd 100%, mbouj miz saek boux hagseng saethag. Bi 2014 hagdangz aeundaej “Byauhcunj Vahcuengh Gangjgoj Doxdax Maenhndei Cujcizciengj”. Seizneix, aen hagdangz neix youh aeu “Yivu Gyauyuz Cangzgveih Gvanjlij” dangguh seizheiq ndei, haenqrengz gaijndei banhhag diuzgen, gyagiengz loegvaq hagdangz, vih lauxsae caeuq hagseng caepcaux aen gunghcoz hagsib caeuq swnghhoz vanzging ndei ndeu.