Lwgnyez aenvih dienheiq ndataeng cix baenzbingh ciemh ngoenz ciemh lai, conhgyah daezsingj naeuz, seizhah aeu daegbied singjgaeh lwgnyez baenzbingh.

Lwgnyez dwgliengz yungzheih baenz dungxsiq.

Aenvih seizhah mbwn ndataeng, lwgnyez daengx ndang gak aen gi’gvanh goengnaengz cungj rox fatseng bienqvaq. Riengzdwk mbwn ciemh ngoenz ciemh ndat, siuhvameiz iemqok gemjsiuj, dungxsaej doenghlig doekdaemq, siuvaq hidungj yungzheih ndaej bingh.

Seizhah mbwn ndat youh caep lai, gijgwn yungzheih hwnjmwt, danghnaeuz mbouj siujsim gwn gijgwn hwnjmwt le, mbaeu cix dungxsiq, naek cix fatseng gijgwn dengdoeg; mbangj lwgnyez maij gwn yinjliu gyoet、gijgwn gyoet、byaekliengzban gyoet, danghnaeuz gwn daiq lai, hix yungzheih baenz dungxsiq. Linghvaih, seizhah aenvih mbwn ndat, lwgnyez dam liengz cix ciengzseiz hai gunghdiuz roxnaeuz cimq raemxgyoet, lwgnyez dwgliengz gvaqbouh, couh yinxhwnj binghdoeg ganjyenj cauhbaenz dungxsiq.

Bingh saidiemheiq aeu nyinhcaen ceihyw.

Ciuq conhgyah gaisau naeuz, bingh saidiemheiq lwgnyez cujyau biujyienh dwg lwgnyez baenz saidiemheiq donh baihgwnz ganjyenj lumj benjdauzdijyenz ok nong daengj, hai gunghdiuz dwg aen cungyau yenzyinh yaeuhfat baenzbingh he. Lwgnyez itbuen nanz dinghdingh youq giz ndeu, baenzneix fanfoek haeujok cauhbaenz ndangraeuj doxca haemq daih, gyoetndat gyauca rox hawj ndang vunz gamjdaengz mbouj cwxcaih, yienghneix couh yungzheih baenz saidiemheiq ganjyenj. Ndigah, ndaw rug gunghdiuz mbouj hab hai daiq gyoet lai, ceiq ndei gaej hawj rumz cigciep boq lwgnyez, hix gaej hawj rumz denfunghsan cigciep boq lwgnyez. Ok rog ranz hozdung seiz aeu haeujsim gwn di dangz caeuq raemxgyu cit he.