“Bixnuengx(beixnuengx) hei, ngoenzneix angqfaengz ndaej doengxhaen(doxraen), dawz cenj doengxbungq(doxbungz) saem(sim) doengxlienz(doxlienz), bixnuengx (beixnuengx) hei, cab(cingj) hek gw(gwn) laeuj, gw(gwn) roengz dungx ya lei, amq(gaemz) laeuj roengz dungx saem(sim) mij(mbouj) aih (luemz), saem(sim) mij(mbouj) aih (luemz), bixnuengx(beixnuengx) hei.”5 nyied 7 hauh, youq Denzlinz Yen yienhsingz Nanzdizlu giz guh donq ngaizbakranz, souj go aeu Vahcuengh Denzlinz ciengq neix, ndaej vunz ciengq bae ciengq dauq, neix hawj yienhciengz gya hoengh. Ngoenzde lajbyonghngoenz donq ngaizbakranz neix hainduj lo, vunzhek daj diegwnq daeuj comz daengz yienhciengz, caencik baengzyoux comz youq giz ndeu, doq dingq gogingqlaeuj, doq gwn gijgwn ndei Bouxcuengh, yienghneix hainduj camgya Denzlinz Yen 2015 nienz ciet Heiqcuengh “Haeujgamj”.

Heiqcuengh《Haeujgamj》ndeiyawj raixcaix

5 nyied 7 hauh banhaemh, Heiqcuengh《Haeujgamj》(bouh Heiqcuengh gofoux Denzlinz) youq aen yienh neix vwnzva gvangjcangz yienjok. Baez neix yienjok gyawj 2 aen cung, 70 boux ganbu cizgungh、godijhu、ginzcung daengj daj ndaw yienh gak hangznieb nem segih daeuj de youq gwnz daiz yienj, 600 lai boux ginzcung youq laj daiz yienj, song bang yenjyenz doxboiq gig ndei dwk byaujyenj bouh Heiqcuengh neix. Miz fanh lai vunz daeuj yienhciengz yawj.

Ciuq cam rox, bouh Heiq- cuengh neix youz bouxbien roengz haujlai rengz guhbaenz, comz miz gak yiengh maenhndei, ndaej dangguh baez ciet neix bouh Heiqcuengh ceiq hungnaek de. Bouh heiq neix faen baenz haeujgamj、guh gijgwn、gwn haeujgamj、 doiq fwen、doxheuhyouq haj ciengz; aeu gangjvah、ciengq gak cungj diuh fwen Bouxcuengh Denzlinz nem diuq gij foux gig nemgyawj saedceij de, gangj le cit goj vunz Bouxcuengh gaenxguh、maij hek nem doxgiet.

“Haeujgamj”, Vahcuengh Denzlinz daihgaiq eiqsei dwg hamj haengj haeuj mbanj. Hauj nanz gaxgonq, mbanj Bouxcuengh cungj laeb haengj bauj bingzonj, neix couh hawj bouxcoz guhyoux、 aeu bawx hoj. Daengzlaeng bouxcoz mbilaux caeg hamj haengj haeuj mbanj ra vunz guhyoux, doiq fwen gyau sim, daengzlaeng bienqbaenz bi guh baez“ciet funglouz”(Vahcuengh heuhguh“haeujgamj”).

Comz yienj Heiqcuengh bouxyawj angqvauvau

5 nyied 8 daengz 21 hauh, Denzlinz Yen youh vwnzva gvangj- cangz nem daizheiq Lozlij comz yienj Heiqcuengh, moix giz moix ngoenz yienj ok sam ciengz. Youq duenh neix, ndaw yienh gak yanghcin gungh miz 78 aen heiqduenz lajmbanj doxlwnz hwnj daiz, yienj gij Heiqcuengh youz gyoengqde gag bien gag lienh gag yienj de, hawj bouxmaijyawj lumj ndaej gwn donq ngaiz gig ndei ndeu.

Gaenh bi daeuj, Denzlinz Yenveij、Yen Cwngfuj haenqrengz fazcanj Heiqcuengh, laebdaeb 8 bi banh ciet Heiqcuengh; dawz Heiqcuengh baijyienj dangguh hangh hozdung youqgaenj ndeu, hawj heiqduenz miz daiz yienjok. Doengzseiz, laebdaeb geij bi bangfuz nem guhgiengz yezyiz heiqduenz, dawz neix dangguh hong vih vunzlai banh saehsaed. Laeb heiqduenz fazcanj gihginh, moix bi bued fanh maenh doxhwnj hawj moix aen heiqduenz. Dangqnaj, daengx yienh yezyiz heiqduenz gaenq youz 8 aen (banh ciet Heiqcuengh gaxgonq) fazcanj daengz 84 aen.

Baez neix miz 78 aen heiq- duenz camgya comzyienj, ndawde Luzlungz Cin 25 aen、Licouh Yangh 14 aen、Giucouh Cin 8 aen、Lozlij Cin 6 aen、8 aen yanghcin wnq miz 25 aen, neix beij bi’gvaq 58 aen lai miz 20 aen.

Bi’gvaq 12 nyied, Denzlinz Yen ndaej guekgya vwnzvabu bingzguh“Cungguek Mbanjranz vwnzva yisuz ndawbiengz (Heiqcuengh)”.

Fwen minzcuz lai daegsaek noengz

5 nyied 8 hauh, Denzlinz Yen youq vwnzva gvangjcangz gawjhengz song ciengz hozdung comz eu fwen, ciengz ndeu dwg comz eu fwen ndawbiengz Bouxcuengh, youz canghfwen lajmbanj Denzlinz yienj; ciengz ndeu dwg Denzlinz Yen sanhgoh gohvei, youz ndaw yienh ganbu cizgungh yienj. Youq seiz guh song hangh hozdung neix, doengh- boux yenjyenz Bouxcuengh、Yauzcuz、Myauzcuz、Bouxgun daengj gyoeb- baenz 18 aen dui, aeu Vahcuengh、Vahyauzcuz、Vahgun daengj daeuj eu fwen minzcuz, gyoengqde doenggvaq doiqciengq、gagciengq、siujcuj ciengq、habciengq daengj lai cungj hingzsik, hawj bouxyawj dingq ndaej gig gvaqyinx.

Ciuq cam rox, Denzlinz Yen miz 11 aen minzcuz caemh youq, ndaw yienh minzcuz funghcingz lai, minzsuz hozdung lai. Youq ndaw yienh, gak cungj saeh nem doenghyiengh cungj ndaej bien haeuj ndaw fwen bae, hai bak couh eu, eu fwen gaenq baenz cungj fuengsik vunzlai gag guh gag angq ndeu.

Cawzliux gij hozdung baihgwnz neix, aen yienh neix lij youq 5 nyied 7 hauh lajbonghngoenz banh ngaiz- bakranz、5 nyied 21 hauh banh fatciengj vanjvei、5 nyied 7 hauh daengz 21 hauh baijok ndangdaenj minzcuz ceiqndei、5 nyied 8 hauh daengz 15 hauh gawjhengz Denzlinz gijgwn ndei Bouxcuengh nem daegsaek nungzcanjbinj baij gai daengj hozdung.