4 nyied 16 hauh, Cingsih Yen Vadung Cin Cunghsinh Siujyoz 19 boux lauxsae, youz yienh de gyauyuzgiz Couh fugizcangj daiq doih, daeuj daengz Vanzgyangh Mauznanzcuz Swciyen Swh’wnh Cin Yinzhoz Siujyoz guh Cuengh Gun song sawvah sonhag yawjhag hozdung.

Aen yawjhag hozdung neix, gungh faen baenz sam aen bouhfaenh daeuj gawjhengz. Bouh- faenh daih’it dwg haeuj ndaw bangaep bae dingq goq, cujyau dingq le yozcenzbanh “Angqyangz Hag Sawcuengh” caeuq ngeih nienzgaep goq Sawcuengh. Ndawde, yozcenz- banh go sonhag youz Yinzhoz Siujyoz Vangz Denzcwng lauxsae son, ngeih nienzgaep youz Yinzhoz Siujyoz Cinz Yivangj lauxsae son. Bouhfaenh daihngeih dwg hagseng Yinzhoz Siujyoz guh dagogenh hozdung baijyienj, cujyau baijyienj le hagseng diuq foux faexsaux、daenj haizgieg doxdax、gveng aendomq、gwih maxgyaeg、dwk geizdoj, geij cungj hozdung neix guh liux le, gyoengq hagseng lij hawj gyoengq daibyaujdonz yienj 6 aen cietmoeg gig miz minzcuz daegsaek haenx, ndawde miz hagseng yozcenzbanh byaujyenj, miz yozyoz vwnzyi daibyaujdui byaujyenj, miz ciengq miz diuq, miz yungh Vahcuengh gangjgoj, yungh Vahcuengh eu fwen daengj. Bouhfaenh daihsam dwg guh gyauhliuz ginghyen veibau hozdung. Swh’wnh Cin Cunghsinh Siujyoz Mungz Ningz yaucangj sien daibyauj Swh’wnh Cin gaisau miz- gven cunghsinh siujyoz baenzlawz cujciz Sawcuengh hagdangz guh hong Cuengh Gun song sawvah sonhag, Yinzhoz Siujyoz Luz Yinzhwz yaucangj daibyauj hag- dangz gyoengqde gaisau bingzseiz ndaw hagdangz baenzlawz giethab minzcuz daegsaek guh dagogenh hozdung, baenzlawz laebguh hag- dangz minzcuz vwnzva gensez, Vanzgyangh Mauznanzcuz Swciyen Gyauyuzgiz Lanz Yiz fugizcangj hawj Cingsih Yen gyauyuz daibyaujdonz gaisau mizgven Vanz- gyangh hong minzcuz gyauyuz sonhag, doeklaeng Cingsih Yen gyauyuzgiz Couh fugizcangj hix gaisau Cingsih Yen mizgven gyauyuz cingzgvang, lij gangjgangj gij souhaeuj caeuq gamjsouh baez yawjhag hozdung ndaej daengz de.

Vanzgyangh、Cingsih song aen yienh guh baez Cuengh Gun song sawvah sonhag hozdung neix, hawj gyoengq lauxsae song aen yienh neix engqgya yawjnaek hong Sawcuengh sonhag, gyoengq lauxsae cungj laeb gietsim, itdingh dawz Sawcuengh sonhag guh ndei guh ak bae.

(Mungz Ningz Luz Gaisenj/ 蒙 宁 陆介选)