Lozyez Yen Lozsih Yangh Cungsim Siujyoz 1959 nienz 9 nyied hainduj laeb, dieg nemgyawj Gveicouh Swngj, liz yienhsingz 54 goengleix. Ciuq Lozyez Yen Gyauyuz Vangj lwnh, daengx aen hagdangz gungh ciemq dieg 8200 bingz- fanghmij, dieg guh hagdangz 7690 bingzfanghmij, ranz hagdangz 2410 bingzfanghmij. Seizneix miz hagseng 554 boux, lauxsae 27 boux, ndawde 13 boux miz cunggaep cizcwngh doxhwnj, lauxsae yozliz cienzbouh hab iugouz.

Geij bi neix, aen hagdangz neix gyarengz gaijndei nem cauxguh diuzgen, gak fuengmienh gaijndei gig lai. Bang lingjdauj ndaw hagdangz nyinhcaen banh saehsaed, haenq- rengz beizyangj buek lauxsae suciz sang ndeu, ciensim son’gyauq hag- seng maenhndei, sonhag cizlieng mboujduenh daezsang, lai baez ndaej bingzguh yienhgaep“senhcin yozyau”.

It. Hagdangz: Baengh Vah- cuengh guh daegsaek sonhag

Daj aen hagdangz neix son- gyauq Cuengh Gun song saw vah daeuj, cugmbaek cauxbaenz banhhag daegsaek moq, couhdwg“aeu Cuengh guh cawj, Cuengh Gun giethab, aeu Cuengh coi Gun, Cuengh Gun cungj rox.”

Gaenh bi daeuj, aen hagdangz neix ciuq gyauyuz gveihliz nem vahgangj fazcanj gveihliz, ciuq gij cingzgvang gvendaengz vahgangj dangdieg, roengzrengz raroen nem guh ndei Cuengh Gun song saw vah sonhag. Gawjbanh hozdung doxdax gangj gojgaeq Vahcuengh, senj hagseng maenhndei bae Namzningz doxdax gangj gojgaeq Vahcuengh, aeundaej cingzcik ndei. Youq daihngeih gaiq daengx gih siuj- hagseng doxdax gangj gojgaeq Vahcuengh byauhcunj, aen hagdangz neix roek(ngeih) ban boux hagseng heuhguh Bungz Suhgiz camgya, de gangj goj《Liuz Sanhcej》, ndaej ngeihdaengjciengj; youq daihsam gaiq daengx gih siujhagseng doxdax gangj gojgaeq Vahcuengh byauhcunj, aen hagdangz neix sam(it) ban boux hagseng heuhguh Loz Sinhyingj camgya, de gangj goj《Guenqngvax Caeuq Guenqdiet》, ndaej ngeih- daengjciengj.

Lozsih Yangh Cungsim Siujyoz youq ndaw cin dwg aen hagdangz siujyoz vunzsoq haemq lai. Daengx hagdangz gungh miz 13 aen ban, gyoengqde cungj guh Cuengh Gun song saw vah sonhag.

Ngeih. Lauxsae: Caemhsim haenqguh son’gyauq ndaej ndei

Dangqnaj, aen hagdangz neix miz buek lauxsae maenhndei ndeu, gyoengqde gyaez hong gaenxguh、nyinhcaen guhhong、gingniemh fungfouq, neix bauj ndaw hagdangz gak hangh hong, daegbied dwg hong sonhag guh ndaej swnhleih.

Aen hagdangz neix sonhag hozdung lai cungj lai yiengh, moix haggeiz cungj doxdax hwnj youhcizgo. 2014 nienz haggeiz seizcin, aen hagdangz neix baij Moz Yenjcwngh lauxsae camgya aen hozdung doxdax hwnj yijvwnz (youz Lozyez Yen Gyauyuzgiz banh), de aeundaej ngeihdaengjciengj. 2014 nienz haggeiz seizcou, aen hagdangz neix baij Cinz Siujginz lauxsae camgya aen hozdung doxdax hwnj suyoz (youz Lozyez Yen Gyauyuzgiz banh), de aeundaej ngeihdaengj- ciengj. Neix yienh’ok le doenghboux lauxsae ndaw hagdangz gingniemh fungfouq, yienghsiengq maenhndei. Gyoengqde caemhsim gyaez hag- dangz、okrengz cauxmoq, gyaez hagseng, nyinhcaen guh, mboujduenh naemjaeu fazcanj lai ndei, gak hangh hong guh ndaej gig ndei.

Sam. Hagseng: Gangj daengz guh daengz, suciz haemq sang

Dangqnaj, aen hagdangz neix gungh miz 554 boux hagseng, dieg hagdangz mbouj suenq gvangq, hoeng moix baez roengzdangz、guh caujcauh roxnaeuz gogenhcauh, noix raen hagseng doxcaenx doxloengh dox- gyaep. Aen hagdangz neix hengz aen cidu“ngoenz baet sam mbat”, gak ban bouxcizyizswngh gag rox guh ndei hong baetseuq. Gaxgonq miz hagseng luenh vit nyapnyaj, seizneix mbouj miz lo. Dangqnaj, moix baez ngaizromh、ngaizringz、ngaizhaemh, noix raen hagseng luenh couq(dauj) ngaizlw byaeklw; youq ndaw hag- dangz, seiz haeujok hwnjroengz, hagseng gag rox lej byaij lej gangj, byaij roen roxveq doxnyiengh, neix dwg hagseng roxsoq roxyiuj yienghsiengq ndei. Son ndei hagseng baenzlawz gangjvah nem hengzguh, hawj hagseng lai gag rox guenj bonjndang、 rox aeu cinbu.

Dangqnaj, aen hagdangz neix doenghyiengh caezcienz, gak cungj gunghnwngzsiz miz haemq caez. Daegbied dwg geij bi neix, aen hagdangz neix leihyungh 10 fanh maenz(youz Swcigih Minzyijveij soengqhawj) daeuj cawx sezbei sonhag, daezsang le gij yendaiva suijbingz gvendaengz sezbei sonhag. Seizneix, ndaw hagdangz lingjdauj“gag rox aeu lai maenhndei、gaenxguh maij hag、rox guh guenjleix、gamj bae cauxmoq、haenq aeu baenaj”, lauxsae“gyaez hong gaenxguh、rapdawz cwzyin、ging- niemh fungfouq”, hagseng“da yawj baenaj、suciz cienzmienh、gosing fouqmiz”, gak baih caemhsim haenqguh, mboujduenh guh ndei Cuengh Gun song saw vah sonhag, aeundaej gyauyuz cingzcik moq.