Bonjbauq siusik(gicej Suh Gyahgvai) Youz gak dieg minzveij doigawj, ginggvaq guekgya minzveij cujciz conhgyah bingzsaemj, gih raeuz Sanhgyangh Dungcuz Swciyen Linzhih Cin Gvandung Cunh Gvansiuj Dunz daengj 59 aen mbanj deng Guekgya Minzveij aeu diuzmingz hawj guh buek daih’it “Mbanjranz Saujsu Minzcuz Daegsaek Cungguek”(daengx guek ngamq aeu mingz hawj 340 aen mbanj). 4 nyied 28 hauh banhaet, Swcigih Minzveij dangjcuj fusuhgi、fucujyin、sinzsiyenz Vangz Cigen, Liujcouh Si cangzveij、fusicangj Fu Yangdungh song boux de vih Sanhgyangh Dungcuz Swciyen Linzhih Cin Gvandung Cunh Gvansiuj Dunz guh biengjbaiz yizsi.

Ranz Gvansiuj Dunz dwg yungh faex daeuj guh diuqgiek, minzfungh ndeindi, ndaw mbanj seuqsak, minzcuz funghcingz noengznwd, daegsaek canjyez fazcanj vaiqriengj, “ngaiz bak ranz Mbanj Gvansiuj” riuzmingz ndaw guek rog guek, dwg gizdieg sifan minzcuz doxgiet gih raeuz, gonqlaeng deng bingz guh Gizdieg Sifan Nungzyez Lijyouz Daengx Guek 、Gizdieg Ranzfaex Gveiqbaek Siuhfangz、Liujcouh Si Minzcuz Doxgiet Cinbu Mozfan Cizdij、Sanhgyangh Yen “Mbanj Cib Ndei Swnghdai Vwnzva” daengj. Seizneix, aen mbanj neix gaenq baenz le gizdieg hekyouz seiq fueng bet baih daeuj daejniemh minzcuz vwnzva doxhuz、gizdieg hekyouz gwn ngaiz bak ranz caeuq gizdieg hekyouz aeu fukheiq bak ranz ndeu. Doengzseiz, “Gwn Ngaiz Bak Ranz” gaenq baenz gaiq ciubaiz gim Mbanj Gvansiuj gig miznaj he. Bi 2008, Mbanj Gvandung “Ngaiz Bak Ranz Dungcuz” deng lied haeuj Gvangjsih Bouxcuengh Swcigih Feihvuzciz Vwnzva Yizcanj baujhoh hanghmoeg, gij minzcuz daegsaek caeuq funghcingz daegbied de yinx daihliengh hekyouz daeuj cunzcet, baenz le gizdieg ndei hekyouz daeuj cimz ngaiz bak ranz ndeu.