Liujgyangh Yen Bwzbungz Cin Vaizhungz Cunh Mbanjyalwnz, diegyouq baihsaenamz Liujgyangh Yen, daengx mbanj ranzranz ndaem go’ngaeux, saimbwk lauxnyaeq rox dajsan, caezsim bae guh daegsaek youqndwi lijyouz nungzyez, byaij diuzroen swnghdai baenzfouq, moix bi moix vunz cinghsouhaeuj mauhgvaq 1.2 fanh maenz, gonqlaeng ndaej bingz baenz “Guengjsae nungzyez lijyouz sifandenj”、“daengx guek nungzyez lijyouz sifandenj”、ndaej senj haeuj aen mingzdan “Cungguek doenghnaz gyaeundei”、“Guengjsae cib aen mbanj ceiq yinxvunz”、“Liujcouh Si cib aen mbanj ceiq gyaeundei” doenghgij mingzdaeuz ndei neix.

Mbanjyalwnz ing bya hwnjguh youh dep daemzngaeux, daengx mbanj 278 ranz gungh 1250 vunz, hangh hong ceiq youqgaenj de couhdwg ndaemganq go- ngaeux, ranzranz moix bi ndaem song sauh go’ngaeux, geij bi neix daeuj aen gihdi go’ngaeux aeu Mbanjyalwnz guh haedsim de gaenq iet doh daengx cin, lienzbenq ndaem go’ngaeux dabdaengz 3.3 fanh moux, gyoebbaenz aen gingj “aenhaij go’ngaeux fanh moux” gyaeundei yinxvunz ndeu, aenngaeux hungloet naeng hau, hoh raez noh byoiq, feihdauh diemzvan, ndaej vunzlai haenh guh “ngaeuxnyawh”, Cungguek Gijgwn Saekloeg Hwngfat Cungsim nyinhdingh de dwg gijgwn saekloeg A cibgaep, moix bi aenngaeux gai daengz Guengjdoeng、Huzbaek、Yanghgangj daengj dieg caeuq Yizbwnj、Meijgoz、Gyahnazda daengj guekgya bae. Gyoengq vunzmbanj lij swnh seiz hongsoeng san laepngaeux gai, daengx mbanj lauxnyaeq saimbwk bouxboux rox dajsan, gawq fuengbienh gai ngaeux, youh ndaej demlai souhaeuj.

Geij bi neix daeuj, Mbanjyalwnz leihyungh aen gingj ndeiyawj “haijngaeux song sauh fanh moux” caeuq gij byaraemx henz mbanj gig miz daegdiemj de, haenqrengz hwngfat swnghdai nungzyez yawj gingj lijyouzyez, lij youq cwngfuj baihgwnz cihciz lajde hoengh banh ciet vwnzva ngaeuxnyawh hozdung, gij vwnzyi biujyienj caeuq hangh hozdung civaiz ciep bawxmoq gig miz daegsaek minzcuz haenx, hawj gyoengq hekyouz yawj le roxnyinh mizyinx dangqmaz.

Seizneix, Mbanjyalwnz gaenq guh miz aen daemz- mboq caemxraemx ndeu caeuq lijgvanj、canhgvanj nungzgya daengj buek gihcuj sezsih ndeu, miz ranghdieg yawjngonz go’ngaeux swnghdai nungzyez、 gorungzgeq buenzrag daengj 9 aen lijyouz gingjdenj. Ndaw mbanj lij guh ndei ndaem faex ganq va canglengj gunghcwngz, aeu suijniz bu ronmbanj 1500 mij, roen dieg gingj 1100 mij. Moix bi 4 nyied co daengz 11 nyied co, daemzngaeux heuswdswd, va’ngaeux daengjroebroeb, ndeiyawj yinx vunz, hekyouz doxcaeh caenx haeuj ndaw mbanj, yawj va’ngaeux, cimz gwn byaekndoeng, cwxcaih angqyangz raixcaix.