Seizhah, lwgnding hozdung ciemh ngoenz ciemh lai, danhseih conghsaej supsou siuvaq goengnaengz lij caengz caezcienz, sikwngq naengzlig ca, daegbied yungzheih cauhbaenz goengnaengz dungxsaej fanzluenh, roxnaeuz baenzsiq、rueg gijgwn、dungxraeng daengj bingh. Haujlai lwgnding okyienh nanz bwnq haeux、mbouj siengj gwn cij、haexgaz daengj yienhsiengq. Ndigah, anbaiz ndei gij gwnndoet seizhah lwgnding, daegbied dwg baujcwng yingzyangj de cibfaen youqgaenj.

Seizhah mbwn ndataeng, ok hanh lai, aeu siengj banhfap hawj lwgnding lai gwn doxgaiq, cijndaej baujcwng yingzyangj cukgaeuq. Naengh lwg- nding ndang haemq yox roxnaeuz dungxsaej mbouj ndei, ceiq ndei gaej youq seizhah mbwn ndat seiz duenh cij. Aenvih lwgnding mwh mbwn ndat seiz siuhvameiz iemq ok haemq noix, yungzheih yinxhwnj baenz dungxraeng roxnaeuz ganjyenj baenz saej humz.

Gij lwgnding ndaej 4 ndwen doxhwnj haenx, gijgwn de aeu daj noix daengz lai, daj saw daengz gwd, hawj de lienh nyaij gwn doxgaiq, hawj aenndang de yingzyangj caezcienz bae. Aenvih lwgnding seizhah gwn haemq noix, wng hawj de gwn lai cungj lai yiengh, lumj daepmou makyungz gya yingzyangj mijfwnj、nohgaeq byaekheu gya yingzyangj mijfwnj、nohbya byaekheu gya yingzyangj mijfwnj、DHA byaekheu yingzyangj mijfwnj daengj, daj gak fuengmienh bouj yingzyangj hawj de.

Linghvaih, aenvih mijfwnj yungzheih siuvaq supsou, daegbied hab amqbak lwgnding gwn. Gijgwn wnq lumj bya、nyauh、 doxgaiq duh guh caeuq byaekheu hix haemq hab lwgnding gwn. Aenvih seizhah ok hanh lai, raemx ndaw ndang sied bae lai, mwh de hozhawq seiz sibauh gaenq duetraemx lo. Duetraemx youqgaenj seiz, couh rox yinxbaenz fatndat. ngoenznaengz cijnaengz youq gwn cij caeuq gwn gijgwn wnq ndawde ndaej daengz 800 hauzswngh raemx, danhseih seizhah moix ngoenz wng hawj de gwn 1100 daengz 1500 hauzswngh raemx cij ndaej.

Lwgnding