Bonjbauq siusik (gicej Veiz Yennaz/韦愿娜） Vihliux daezsang Cuengh Gun song vah saw sonhag yozcenz lauxsae conhyez suijbingz, bang Cuengh Gun song vah saw youwzyenz beizyangj boux lauxsae habgek Cuengh Gun song vah saw haenx, 4 nyied 22 hauh daengz 26 hauh, bi 2015 daengx gih Cuengh Gun song vah saw yozcenz lauxsae Sawcuengh gihcuj cihsiz beizyinbanh geiz daih’it youq Vanzgyangh Mauznanzcuz Swciyen gawjbanh, aen ban beizyin neix dwg youz Swcigih Gyauyuzdingh cawjbanh、Gvangjsih Sawcuengh Yozyau ciepbanh. Hozciz Si 17 aen Cuengh Gun song vah saw siujyoz haenx gungh miz 34 boux lauxsae yozcenzbanh camgya beizyin.

Baez beizyin neix, beizyin neiyungz dwg Sawcuengh singmeh yinhmeh caeuq Sawcuengh sawloih gihcuj cihsiz; beizyin fuengsik daegbied moqsag, boux lauxhangz youq gwnzdangz son saw sat le, lij roengz daiz daeuj yienhciengz sonyinx gyoengq yozyenz. Gvangjsih Minzcuz Gyauyuz Fazcanj Cungh- sinh yizsinj Lingz Hinghningz, Gvangjsih Sawcuengh Yozyau fuyaucangj、gauhgiz gyangjswh Moz Gwzli, Gvangjsih Sawcuengh Yozyau gyangjswh Nungz Cinfung fucwz hawj yozyenz hwnjdangz. Gyoengq yozyenz bouxboux cungj nyinhcaen hagsib, roengzsim hag ndei Sawcuengh, dauqbae hagdangz le, dawz hag ndaej gij cihsiz Sawcuengh son hawj hagseng swhgeij.

Lingz Hinghningz yizsinj youq gwnz dangz gyangjco《Fuengfap Son Lwgnyez Youwzyenz Hag Sawcuengh》seiz naeuz, youwzyenz dwg aen dieg lwgnyez ndangcangq hungmaj ndeu, de cujyau dwg son lwgnyez hag baenz sibgvenq ndei, hag rox saeh swhgeij aeu sawhgeij gag guh, rox souj gvicaek, rox gaenx doengh uk, beizyangj lwgnyez hagsib naengzlig. Son lwgnyez youwzyenz hag Sawcuengh, mbouj ndaej lumj son siujhagseng nei, heuh lwgnyez noix guhcaemz, lai doeg saw, aeu doeg saw guhgoek. Yienghneix guh, ndaej sawj lwgnyez caengz haeujhag couh mbwq hag, gamhanh caizganq lwgnyez cienzmienh fazcanj. Ndigah, lauxsae youwzyenz aeu rox lwgnyez hagsib daegdiemj, ndaej doenggvaq guh’angq daeuj nyinh cihmeh yinhmeh. Lwgnyez youwzyenz dwg yungh “hengzguh” daeuj naemj saeh, baengh “roxnaj” daeuj hagsib.

Moz Gwzli lauxsae hwnj goq gihcuj cihsiz liux le, lij hawj gyoengq yozyenz gangj le gij cihsiz Sawcuengh suijbingz gaujsi caeuq minzcuz vwnzva haeuj hagdangz haenx, sawj gyoengq yozyenz engq- gya rox daengz gij yiyi youqgaenj caeuq cozyung Cuengh Gun song vah saw sonhag haenx.

Gvangjsih Sawcuengh Yozyau yinhyoz lauxsae Cinz Cwnghuz, leihyungh seiz yietnaiq bae daengz aen hagdangz Cuengh Gun song vah saw——Yinzhoz Siujyoz, sonyinx gij hong minzcuz vwnzva haeuj hagdangz, ndaej daengz saeseng angqcoux caeuq haenhndei.

Ciuq Swcigih Gyauyuzdingh naeuz, bineix, Swcigih Gyauyuzdingh yaek banh 4 geiz daengx gih Cuengh Gun song vah saw yozcenz lauxsae Sawcuengh gihcuj cihsiz beizyinbanh.