4 nyied 21 hauh, Gvangjsih Minzcuz Cunghconh(Gvangjsih Sawcuengh Yozyau、Gvangjsih Minzcuz Gauhcungh) aeu “hungzyangz conzdungj vwnzva, caez laeb hagdangz gyaeundei” guh cawjdaez, gawjbanh “sam nyied sam Bouxcuengh” minzcuz doxgiet cinbu gyauhliuz caeuq hagdangz minzcuz vwnzva langhbaij hozdung. Ngoenzde, ndaw hagdangz nauhyied dangqmaz. Banhaet, hagdangz hai hoih hong minzcuz gyauyuz gyauhliuz, cingj boux minzcuz cunghyoz lingjdauj sengj rog daeuj daengz hagdangz guh gyauhliuz, damqlwnh gij vwndiz minzcuz gyauyuz fazcanj. Ndaw hagdangz guh lai cungj lai yiengh minzcuz vwnzva dijyuz hozdung: Guh vwnzyi byaujyenj, doiq fwen, diuq fouxsaux、 diuq fouxdohyeh, bau aendomq, dwk lwggyangq, ciengj bauqva; canjlanj minzcuz gunghyi meijsuz cozbinj hagseng, canjlanj gij doz minzcuz doxgiet cinbu gyauyuz haenx.

Lajbyonghngoenz, swcigih fucujsiz Lanz Denhliz daeuj daengz ndaw hagdangz caeuq gyoengq saeseng angqhoh ngoenzciet, de yawj hagseng guh byaujyenj, yawj le minzcuz gunghyi meijsuz cozbinj caeuq gij doz minzcuz doxgiet cinbu gyauyuz canjlanj haenx, haenh hagdangz guh hong minzcuz vwnzva gyauyuz guh ndaej ndei raixcaix.

(Veiz Yennaz/韦愿娜)