Lungzlinz Gak Cuz Swciyen Dwzngoz Cin Denzba Cunh Cangh- gyah Cai seiz Ciuhmingz satbyai couh laeb mbanj lo, lizsij gyaenanz, dieg mbanj haijbaz 1600 lai mij, daengx mbanj miz 81 ranz 305 boux beixnuengx Myauzcuz comzyouq, gij ranz ndaw mbanj ing bya hwnjguh, baenz caengz baenz coij, caeuq gij gingj byasang faexheu seiqhenz doxdak doxdaengh, gig miz gij yienghsiengq gaeuqgeq sohswd de, ndaej haenh baenz dwg aen “Singzgeq Li’gyangh” Lungzlinz.

Canghgyah Cai vwnzva minzcuz cwkrom nanwt, gyoengq beixnuengx Myauzcuz ndaw mbanj daih dem daih gaenxgyaek guhhong, caux baenz gij vwnzva minzcuz lai cungj lai yiengh de, ndawde seujsiuq Myauzcuz、labnyumx、fouxnyenz daengj doengh- gij feihvuzciz vwnzva yizcanj neix couh gyawjgyae cungj okmingz. Ngeihcib sigij caetcib nienzdaih, bouh denyingj okmingz 《Yihyen Max Doz》 gangjlwnh gij goj boux canghyw Denhcinh caprag diegbya、naihhaemz guhhong neix, couhdwg youq ndaw aen mbanj neix goepingj; Gvangjcouh Densidaiz 《Ndawbiengz Baksaek》 lanzmoeg couhdwg aeu aen mbanj neix guh gizdieg haifat lijyouz sengcingz daeuj goepingj.

Bi 2014 ndwen 4, youq Baksaek Siveij、Swciyen Dangjveij yawjnaek bangcoengh lajde, Canghgyah Cai hainduj hwnjguh mbanj moq nyaengqnyi hoenghhwd hwnjdaeuj, gonqlaeng guh coihcingj ranzfaex、guh ranz moq、bouxvunz doenghduz gwn raemx、coih ranzvaih ranzyiemj、roen ndaw mbanj、roenbenjrin ndaw mbanj、diuzroen hopngomx aenmbanj、ranz- youq caeuq rienghdoenghduz gekfaen、dienhmuengx gaijguh、ndaw mbanj ndaem gova ndaan daengroen、gaijguh diengzhaex、aendiengz yawj gingj、guhseuq guhcingh daengj 20 lai aen hanghmoeg, gyonjgyoeb roengzngaenz 700 lai fanh maenz, gawq ndaej hawj “aenmbanj Myauzcuz miz gij daeg- saek ranzcaep minzcuz naekgywg、doxdaeb doxing guh youq bangxbya caeuq gig miz gij yienghsiengq gaeuqgeq ndeiyawj” de mbouj bienq, youh hawj aenmbanj engq moq engq gyaeundei. Baenzneix guh le, Cangh- gyah Cai yienghsiengq engq ndeiyawj engq yinxvunz, caemh ndaej gaijndei gij swnghcanj swnghhoz diuzgen vunzlai ndaw mbanj baenz haujlai. Seizneix, gij ranzfaex dang vax gwnz bangxbya de caeuq gij byasang faexheu seiqhenz doxdak doxdaengh, daegsaek ranzcaep engqgya yienhda.

Geij bi neix daeuj, Canghgyah Cai gaenq baenz le Lungzlinz caiqlij Guengjsae raeuz aen mbanj okmingz gig miz daegsaek Myauzcuz ndeu, dwg aen sukingj denjhingz gizdieg gyaeundei beixnuengx Myauzcuz gwnyouq caeuq guhhong ndeu, moix bi cungj miz haujlai hekyouz、densidaiz、boux sij faenzcieng boux veh veh daengj bae ndaw mbanj yawjgingj、goepingj、damqcaz daengj, hawj ndaw mbanj yied daeuj yied nauhyied hoenghhwd.